મુંબઈ: 14 એપ્રિલે મુંબઈમાં બોલિવૂડ સુપરસ્ટાર સલમાન ખાનના ઘર ગેલેક્સી એપાર્ટમેન્ટની બહાર ગોળીબારનો અવાજ સંભળાયો હતો. મીડિયા રિપોર્ટ્સ અનુસાર, આજે સવારે 4:50 વાગ્યે અભિનેતાના ગેલેક્સી એપાર્ટમેન્ટની બહાર બે અજાણ્યા શખ્સોએ ફાયરિંગ કર્યુ હતું. ફાયરિંગ કર્યા બાદ મોટરસાઈકલ પર ભાગી રહેલા બે હુમલાખોરોના સીસીટીવી ફૂટેજ સામે આવ્યા છે, જે સોશિયલ મીડિયા પર વાયરલ થઈ રહ્યા છે. તે જ સમયે, હવે મહારાષ્ટ્રના મુખ્યમંત્રી એકનાથ શિંદેએ સુપરસ્ટાર સાથે વાત કરી છે.
સલમાન ખાન સાથે ફોન પર વાત કરી: મીડિયા રિપોર્ટ્સ અનુસાર, સીએમ એકનાથ શિંદેએ રવિવારે સલમાન ખાન સાથે ફોન પર વાત કરી હતી અને તેમને સુરક્ષાની ખાતરી આપી હતી. શિંદેએ આ મુદ્દે મુંબઈ પોલીસ કમિશનર સાથે પણ ચર્ચા કરી છે, જે બાદ સલમાન ખાનની સુરક્ષા વધારવાનું સૂચન કરવામાં આવ્યું હતું. દરમિયાન મહારાષ્ટ્રના ગૃહમંત્રી દેવેન્દ્ર ફડણવીસે કહ્યું કે પોલીસ આ મામલાની તપાસ કરી રહી છે.
5 રાઉન્ડ ફાયરિંગ કરવામાં આવ્યું: પ્રારંભિક મીડિયા અહેવાલો અનુસાર, બે અજાણ્યા વ્યક્તિઓ મોટરસાઇકલ પર આવ્યા હતા અને સુપરસ્ટાર સલમાન ખાનની ગેલેક્સીના બહારના ભાગમાં ફાયરિંગ કરીને ભાગી ગયા હતા. મુંબઈ પોલીસને ટાંકીને એક સમાચાર એજન્સીએ આ મામલાની માહિતી શેર કરી અને કહ્યું કે આજે સવારે લગભગ 5 વાગ્યે બાંદ્રામાં અભિનેતા સલમાન ખાનના ઘરની બહાર બે અજાણ્યા લોકોએ ગોળીબાર કર્યો હતો. પહેલા પોલીસને 3 રાઉન્ડ ફાયરિંગની માહિતી મળી. 5 રાઉન્ડ ફાયરિંગ કરવામાં આવ્યું હોવાનું પ્રાથમિક તપાસમાં બહાર આવ્યું છે. મુંબઈ પોલીસની ક્રાઈમ બ્રાન્ચ તપાસ માટે ઘટનાસ્થળે પહોંચી ગઈ છે.
પોલીસ બંદોબસ્ત ગોઠવી દેવામાં આવ્યો: ઘટના બાદ સલમાન ખાનના ગેલેક્સી એપાર્ટમેન્ટની બહાર ભારે પોલીસ બંદોબસ્ત ગોઠવી દેવામાં આવ્યો છે. ગુનેગારોને પકડવા માટે મુંબઈ પોલીસ આસપાસના CCTV ફૂટેજની તપાસ કરી રહી છે. તાજેતરમાં, પોલીસને એક સીસીટીવી ફૂટેજ મળ્યું છે, જેમાં બાઇક પર હેલ્મેટ પહેરેલા બે લોકો રસ્તાની બાજુએથી ઝડપથી જતા જોવા મળે છે.
