મુંબઈ : ચાલુ કારોબારી સપ્તાહના પ્રથમ દિવસે ભારતીય શેરબજાર મજબૂત વલણ સાથે ખુલ્યું છે. આજે 29 જાન્યુઆરી, સોમવારના રોજ ભારતીય શેરબજારના મુખ્ય સૂચકાંક BSE Sensex ગત 70,700 ના બંધ સામે 268 પોઇન્ટ વધીને 70,968 પર ખુલ્યો છે. જ્યારે NSE Nifty પણ ગત 21,352 બંધ સામે 81 પોઈન્ટના વધારા સાથે 21,433 ના મથાળે ખુલ્યો હતો. શરુઆતી કારોબાર દરમિયાન તેજી નોંધાતા BSE Sensex 600 પોઈન્ટ ઉછળ્યો હતો.
અમેરિકન બજાર : છેલ્લા 2 દિવસથી અમેરિકન બજારમાં ભારે એક્શન જોવા મળી છે. ગુરુવારે DOW 240 પોઈન્ટ ઉછળ્યો હતો, જ્યારે ગઈકાલે 60 પોઈન્ટના વધારા સાથે DOW નવી રેકોર્ડ હાઈ બનાવી હતી. મજબૂત આર્થિક ડેટાના આધારે અમેરિકન બજારમાં તેજીનું વલણ છે. Q4 માં 2% ના અંદાજ સામે US GDP 3.3% પર પહોંચી છે. જ્યારે 2023 માં 1.9% ના અંદાજ સામે US GDP 2.5% નો વધારો થયો છે.
ગ્લોબલ કોમોડિટી માર્કેટ : ક્રૂડ ઓઈલ 2 મહિનાની ટોચે પહોંચ્યું છે. જ્યારે બ્રેન્ટ ક્રૂડમાં સાપ્તાહિક 6.5% નો વધારો નોંધાયો છે. મધ્ય પૂર્વમાં વધતો તણાવ અને છેલ્લા કેટલાક દિવસોમાં લાલ સમુદ્રમાં અનેક જહાજો પર હુમલા થયા છે. 5 અઠવાડિયા પછી ચાંદીમાં શ્રેષ્ઠ સાપ્તાહિક પ્રદર્શન રહ્યું હતું. જ્યારે ઔદ્યોગિક ધાતુઓમાં મજબૂતાઈ છે. રો સુગરના વાયદામાં સતત ચોથો સાપ્તાહિક વધારો નોંધાયો છે.
