નવી દિલ્હી: રાજધાનીમાં ખેડૂત સંગઠનો દ્વારા દિલ્હી તરફ કૂચની જાહેરાતને ધ્યાનમાં રાખીને દિલ્હી પોલીસે કડક સુરક્ષા વ્યવસ્થા કરી છે. જેના પગલે દિલ્હી પોલીસે એક માર્ગદર્શિકા જાહેર કરી છે અને દિલ્હી અને યુપીની તમામ બોર્ડર પર કોઈપણ પ્રકારના જામ પર પ્રતિબંધ લગાવવાનો આદેશ જારી કર્યો છે. આ ઉપરાંત, દિલ્હીની સરહદો પર બેરિકેડિંગ કરવામાં પણ આવી રહ્યું છે અને પોલીસે યુપીથી દિલ્હીમાં ટ્રેક્ટર, ટ્રોલી, બસ, ટ્રક અને અન્ય વ્યવસાયિક વાહનોના પ્રવેશ પર પણ પ્રતિબંધ મૂક્યો છે. જેના કારણે રવિવારે કેટલીક જગ્યાએ ટ્રાફિક જામ જોવા મળ્યો હતો.
દિલ્હી ટ્રાફિક પોલીસની માર્ગદર્શિકા: દિલ્હી ટ્રાફિક પોલીસ દ્વારા બહાર પાડવામાં આવેલી માર્ગદર્શિકામાં કહેવામાં આવ્યું છે કે, પ્રતિબંધોને કારણે સોમવાર અને મંગળવારે રાજધાનીમાં પ્રવેશતા ડ્રાઇવરોને ટ્રાફિક જામનો સામનો કરવો પડી શકે છે. આ ઉપરાંત લોકોને એવી પણ અપીલ કરવામાં આવી છે કે તેઓ જામથી બચવા માટે જાહેર વાહનોનો ઉપયોગ કરે. આ સિવાય દિલ્હીની તમામ બોર્ડર પર આવતા-જતા વાહનોના ચેકિંગને કારણે વાહનોની લાંબી કતારો લાગી શકે છે.
પ્રદર્શનકારી ખેડૂતોને રોકવાનો પ્લાન: ખેડૂતોને રોકવા માટે યુપી અને હરિયાણાની સરહદો પર બ્લોકર પણ લગાવવામાં આવ્યા છે. આ ઉપરાંત દિલ્હીની સરહદો પર પાંચ હજારથી વધુ સુરક્ષા જવાનોને તૈનાત કરવામાં આવ્યા છે. પોલીસ અધિકારીઓના જણાવ્યા અનુસાર સરહદો પર અનેક તબક્કામાં સુરક્ષા ચેકપોસ્ટ હશે. જ્યારે દિલ્હીમાં પ્રવેશતા તમામ વાહનોની સંપૂર્ણ તપાસ કરવામાં આવશે.
દિલ્હીની સરહદો સીલ: આ ઉપરાંત, સરહદો પરની પોલીસ પણ રમખાણ વિરોધી પોશાકથી સજ્જ હશે. ખાસ કરીને ગાઝીપુર સિંઘુ અને ટિકરી સરહદો પર નજર રાખવામાં આવી રહી છે. રવિવાર સાંજથી ગાઝીપુર અને સિંઘુ બોર્ડર સંપૂર્ણપણે બંધ કરી દેવામાં આવી છે અને જો જરૂર પડે તો ટિકરી બોર્ડર પણ બંધ કરી શકાય છે. ગાઝીપુરથી સિંઘુ બોર્ડર તરફ આવતા વાહનોનું પણ ચેકિંગ ચાલુ છે. જેના કારણે સિંઘુ, ટિકરી, ગાઝીપુર અને ચિલ્લા બોર્ડર પર વાહનચાલકોને મુશ્કેલીનો સામનો કરવો પડી શકે છે.
