নগাঁও, 13 মে’: নগাঁৱত অব্যাহত আছে ড্ৰাগছ বিৰোধী অভিযান । নিষিদ্ধ ড্ৰাগছসহ হয়বৰগাঁও আৰক্ষীৰ জালত পৰিল ধিং গেইটৰ মূল ড্ৰাগছ ব্যৱসায়ী (Drugs mafia arrested in Nagaon)। উদ্ধাৰ বহু আপত্তিজনক সামগ্ৰী ।
নিষিদ্ধ ড্ৰাগছৰ বিৰুদ্ধে নগাঁও আৰক্ষীয়ে অব্যাহত ৰাখিছে অভিযান । এইবাৰ নগাঁৱৰ ধিং গেইটৰ ড্ৰাগছৰ মূল ব্যৱসায়ীক আটক কৰিবলৈ সক্ষম হয় নগাঁও আৰক্ষী । শুকুৰবাৰে বিয়লি নগাঁৱৰ হয়বৰগাঁও আৰক্ষী চকীৰ(Haibergaon police out post) ভাৰপ্ৰাপ্ত বিষয়া তৰংগ পাটোৱাৰীৰ নেতৃত্বত আৰক্ষীৰ এটা দলে গোপন সূত্ৰৰ তথ্যৰ ভিত্তিত চলোৱা অভিযানত জালত পেলাবলৈ সক্ষম হয় কুখ্যাত ড্ৰাগছ সৰবৰাহকাৰীজনক । ধিং গেইটৰ লগতে বিভিন্ন প্ৰান্তলৈ ড্ৰাগছৰ যোগান ধৰা বিকি সূত্ৰধাৰ নামৰ ড্ৰাগছ সৰবৰাহকাৰীজনক আটক কৰাৰ লগতে বুজন পৰিমাণৰ নিষিদ্ধ ড্ৰাগছ জব্দ কৰিবলৈ সক্ষম হয় ।
বিকি সূত্ৰধৰৰ বাসগৃহত অভিযান চলাই আৰক্ষীৰ দলটোৱে বহু অপত্তিজনক সামগ্ৰী জব্দ কৰিবলৈ সক্ষম হয় । জব্দ কৰা সামগ্ৰীসমূহ চুৰি বুলি সন্দেহ প্ৰকাশ কৰিছে আৰক্ষীয়ে । উল্লেখযোগ্য যে, ড্ৰাগছ সৰবৰাহকাৰী বিকি সূত্ৰধৰে আৰক্ষীৰ কবলৰ পৰা কেইবাবাৰো পলায়নৰ চেষ্টা কৰিছিল যদিও সফল হ'ব পৰা নাই । সম্প্ৰতি অধিক তথ্যৰ বাবে হয়বৰগাঁও আৰক্ষীয়ে জেৰা অব্যাহত ৰাখিছে ধৃত ড্ৰাগছ সৰবৰাহকাৰী বিকি সূত্ৰধাৰক ।
উল্লেখ্যে, ড্ৰাগছ বিৰোধী অভিযানত নগাঁও চহৰৰ ধিং গেইটৰ প্ৰায় আটাইকেইটা ড্ৰাগছ সৰবৰাহকাৰীক গ্ৰেপ্তাৰ কৰি জে’ল হাজোতলৈ প্ৰেৰণ কৰাৰ পাছত বিকি সূত্ৰধাৰে আৰম্ভ কৰিছিল ধিং গেইটৰ ড্ৰাগছৰ সাম্ৰাজ্য । কিন্তু অৱশেষত নগাঁও আৰক্ষীয়ে বিকি সূত্ৰধৰকো জালত পেলাবলৈ সক্ষম হয় । বিকি সূত্ৰধৰৰ সৈতে ড্ৰাগছ ব্যৱসায়ত জড়িত আন সৰবৰাহকাৰীৰ বিৰুদ্ধেও অভিযান আৰম্ভ কৰিছে নগাঁও আৰক্ষীয়ে ।
লগতে পঢ়ক: মিছামাৰী আৰক্ষীৰ সফলতা: মটৰ চাইকেলসহ আটক বাইক চোৰ
