গুৱাহাটী, 30 নৱেম্বৰ : মঙলবাৰে উচ্চ শিক্ষা আৰু মাধ্যমিক শিক্ষা সঞ্চালকৰ উদ্যোগত গুৱাহাটীৰ শ্ৰীমন্ত শংকৰদেৱ কলাক্ষেত্ৰত আয়োজন কৰা হয় এক অনুষ্ঠানৰ ৷ এই অনুষ্ঠানত উপস্থিত থাকে ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মা (Dr Himanta biswa Sharma) ৷ এই অনুষ্ঠানতে মুখ্যমন্ত্ৰী ড৹ শৰ্মাই ৰাজ্যৰ উচ্চ শিক্ষা আৰু মাধ্যমিক শিক্ষাৰ মুঠ ৭২৩ গৰাকী শিক্ষক আৰু কৰ্মচাৰীক বিতৰণ কৰে নিযুক্তিপত্ৰ ।
ইয়াৰে ভিতৰত উচ্চ শিক্ষাৰ অধীনৰ মহাবিদ্যালয়ৰ ১৩০ গৰাকী সহকাৰী অধ্যাপক, ১৬ গৰাকী তৃতীয় শ্ৰেণী পদত আৰু ১৭ গৰাকীক অনুকম্মামূলক নিযুক্তি দিয়া শিক্ষকক নিযুক্তিপত্ৰ বিতৰণ কৰা হয় । লগতে মাধ্যমিক শিক্ষাৰ অধীনত ৮৮ খন উচ্চতৰ মাধ্যমিক বিদ্যালয় প্ৰাদেশিকীকৰণযোগে ৫৬০ গৰাকী শিক্ষককো বিতৰণ কৰা হয় নিযুক্তি পত্ৰ ।
এই অনুষ্ঠানত ভাষণ প্ৰসংগত মুখ্যমন্ত্ৰী ড৹ শৰ্মাই কয় যে, আগন্তুক বছৰৰ ভিতৰত ৰাজ্যৰ যিবোৰ মহাবিদ্যালয়ে নাকৰ পৰিদৰ্শনৰ (NAAC Assessment) ব্যৱস্থা নকৰে, সেই মহাবিদ্যালয়ৰ শিক্ষকসকলৰ মাহিলী দৰমহাৰ পৰা কৰ্তন কৰা হ'ব ৫০ শতাংশ । পৰৱৰ্তী সময়ত মহাবিদ্যালয়খনৰ প্ৰাদেশিকীকৰণো বাতিল কৰা হ'ব । এই ক্ষেত্ৰত চৰকাৰে কোনোধৰণৰ আপোচ নকৰে ।
মুখ্যমন্ত্ৰীগৰাকীয়ে লগতে কয় যে, আগন্তুক বছৰৰ পৰা আকৌ ৰাজ্যত গুণোৎসৱ আৰম্ভ কৰা হ'ব । যিসকল বিদ্যালয়ৰ শিক্ষকে ভাল দৰে কাম নকৰে, সেইসকলৰ বিৰুদ্ধে চৰকাৰে উচিত ব্যৱস্থা গ্ৰহণ কৰিব । এই ক্ষেত্ৰত শিক্ষকসকল আৰু অধিক দায়বদ্ধ হোৱাটো প্ৰয়োজন বুলি তেওঁ মন্তব্য কৰে ৷
লগতে মুখ্যমন্ত্ৰীগৰাকীয়ে উল্লেখ কৰে যে, ৰাজ্য চৰকাৰে প্ৰতিবছৰে শিক্ষা বিভাগত খালী হৈ থকা পদবোৰ পূৰণ কৰাৰ ব্যৱস্থা গ্ৰহণ কৰিব । আগন্তুক বৰ্ষত ৭০০ খন উচ্চতম মাধ্যমিক বিদ্যালয় আৰম্ভ কৰা হ'ব । লগতে আগন্তুত ১০ মে' মাহৰ ভিতৰত প্ৰাথমিক বিদ্যালয়ত ২২,০০০ গৰাকী শিক্ষকক নিযুক্ত দিয়া হ'ব ।
লগতে পঢ়ক : TET Teachar appoinment : কি পৰ্যায়ত বিটিআৰৰ শিক্ষক নিযুক্তি প্ৰক্ৰিয়া ?
স্বচ্ছ প্ৰক্ৰিয়াৰে ৰাজ্য চৰকাৰে শিক্ষক নিযুক্তি দিয়াৰ ব্যৱস্থা কৰিছে বুলিও উল্লেখ কৰে শিক্ষামন্ত্ৰী ৰণোজ পেগুৱে (Ranoj Pegu) ৷ শিক্ষা উপদেষ্টা ডঃ ননীগোপাল মহন্তই কয় যে, শিক্ষকসকল প্ৰজ্ঞা আৰু সভ্যতাৰ বুনিয়াদ । শিক্ষাক এক নতুন দিগন্তৰ পিনে আগুৱাই নিয়াৰ বাবে তেওঁ শিক্ষকসকলক আহ্বান জনায় । এই অনুষ্ঠানত শিক্ষা বিভাগৰ প্ৰধান সচিব কল্যান বি চক্ৰৱৰ্তী আৰু বিশেষ আয়ুক্ত প্ৰীতম শইকীয়াও উপস্থিত থাকে ।
ইপিনে মুখ্যমন্ত্ৰী হিমন্ত বিশ্ব শৰ্মাই সাংবাদিকৰে হোৱা এক সাক্ষাৎকাৰত যোৰহাটৰ অনিমেষ ভূঞা হত্যাকাণ্ডৰ (Animesh Bhuyan Murder Case) সমগ্ৰ ঘটনাটোক তীব্ৰ ভাষাৰে নিন্দা কৰে । লগতে ঘটনা সম্পৰ্কত উচিত তদন্ত হ'ব বুলিও তেওঁ মন্তব্য কৰে । মুখ্যমন্ত্ৰীগৰাকীয়ে উল্লেখ কৰা অনুসৰি, যোৰহাটৰ অ-মানৱীয় ঘটনাটোৰ সম্পৰ্কত ইতিমধ্যে ১৩ জন অভিযুক্তক আৰক্ষীয়ে গ্ৰেপ্তাৰ কৰিছে ।
অসম আৰক্ষীক অভিযুক্ত এই ১৩ জনৰ বিৰুদ্ধে অভিযোগনামা এমাহৰ ভিতৰত দাখিল (Chargesheet filing time limit) কৰাৰ বাবে নিৰ্দেশ প্ৰদান কৰিছে । লগতে ফাষ্ট ট্ৰেক আদালতৰ জৰিয়তে দোষীক কঠোৰ শাস্তি দিয়াৰ বাবে প্ৰশাসনক নিৰ্দেশ মুখ্যমন্ত্ৰীগৰাকীয়ে । এই ক্ষেত্ৰত ঘটনাটোৰ লগত জড়িত কোনো দোষীকে সাৰি যাবলৈ দিয়া নহ'ব বুলিও মুখ্যমন্ত্ৰীগৰাকীয়ে স্পষ্ট কৰি দিয়ে ।
আনহাতে, বৰবৰ আক্ৰমণৰ বলি হোৱা অনিমেষ ভূঞাৰ পৰিয়ালক ৰাজ্য চৰকাৰে ৫ লাখ টকা সহায় আগবঢ়াব বুলি মুখ্যমন্ত্ৰী ড৹ হিমন্ত বিশ্ব শৰ্মাই উল্লেখ কৰে ৷
লগতে পঢ়ক : Mob Lynching in Jorhat: ফাষ্ট ট্ৰেক আদালতত দোষীৰ বিচাৰৰ নিৰ্দেশ মুখ্যমন্ত্ৰীৰ
