ডিব্ৰুগড়, 10 ছেপ্টেম্বৰ : ডিব্ৰুগড়ৰ বকপৰা বকুল বাইপাছত দেওবাৰে পুৱাৰ ভাগত ৰহস্যজনকভাৱে এগৰাকী যুৱতীৰ মৃতদেহ উদ্ধাৰৰ ঘটনাই লৈছে নতুন মোৰ ৷ বকুল উচ্চ মাধ্যমিক বিদ্যালয়ৰ সন্মুখৰ বাইপাছত পুৱাৰ ভাগত উদ্ধাৰ কৰা হৈছিল যুৱতীগৰাকীৰ মৃতদেহ ৷ এই ঘটনাই ডিব্ৰগড়ত সৃষ্টি কৰিছে তীব্ৰ চাঞ্চল্যৰ ৷
ইফালে যুৱতীগৰাকীৰ কাষতে মুমূৰ্ষু অৱস্থাত উদ্ধাৰ হয় আন এজন যুৱক ৷ মৃত যুৱতীগৰাকী ডিব্ৰুগড়ৰ খলিহামাৰিৰ বুলি জানিব পৰা গৈছে ৷ পৰিয়ালৰ অভিযোগ অনুসৰি যুৱতীগৰাকীক পৰিকল্পিতভাৱে হত্যা কৰা হৈছে ৷ মাইজানৰ আজিজ আহমেদ নামৰ বিবাহিত যুৱকজনৰ সৈতে যুৱতীগৰাকীৰ প্ৰেমৰ সম্পৰ্ক আছিল বুলি জানিব পৰা গৈছে ৷
শনিবাৰে আবেলি আজিজৰ সৈতে যুৱতীগৰাকী গৈছিল নৈশ ভোজলৈ ৷ শেষবাৰৰ বাবে নিশাই মাতৃৰ সৈতে কথা হৈছিল যুৱতীগৰাকীৰ ৷ ইফালে ভৰি, মূৰ আৰু চকুত আঘাত পোৱা যুৱতীগৰাকীৰ মৃত্যুৰ তদন্তৰ দাবী জনাইছে মাতৃয়ে ৷
দাবী-ধমকি তথা ভয়-ভাবুকি দি যুৱতীগৰাকীৰ সৈতে প্ৰেমৰ সম্পৰ্ক গঢ়া আজিজৰ ফাঁচীৰ দাবী জনাইছে মাতৃয়ে ৷ ইফালে দেওবাৰে সংঘটিত হোৱা এই ঘটনাক কেন্দ্ৰ কৰি সম্প্ৰতি ডিব্ৰুগড় চহৰত সৃষ্টি হৈছে তীব্ৰ চাঞ্চল্যৰ ৷ পুৱা দুৰ্ঘটনা প্ৰত্যক্ষ কৰা ৰাইজে এইয়া দুৰ্ঘটনা নহয় বুলি অভিযোগ কৰিছে ৷
এই সমগ্ৰ ঘটনাই বৰ্তমান ৰহস্যৰ সৃষ্টি কৰিছে ৷ কিয়নো যুৱতীগৰাকীয়ে ভৰি, মূৰত যথেষ্ট আঘাত পাইছে যদিও যুৱকজনৰ দেহত আঘাতৰ চিন নাছিল ৷ এতিয়া মাতৃৰ গুৰুতৰ অভিযোগৰ পাছত ডিব্ৰুগড় আৰক্ষীয়ে তদন্ত কেনেকৈ আগবঢ়াই নিয়ে সেয়াহে লক্ষণীয় হ'ব ৷
লগতে পঢ়ক : Gitanagar road accident : ভাৰতী গেছ এজেঞ্চিয়ে খান্দি থোৱা গাঁতত সোমাই আহত i20 বাহনৰ চালক
