বিলাসীপাৰা, 18 জুনঃ বিলাসীপাৰা মহকুমা অসামৰিক চিকিৎসালয়ৰ পৰা লক্ষীগঞ্জ সংযোগী এটা পথে দীৰ্ঘদিনৰ পৰা জলা-কলা খুৱাই আহিছে ইয়াৰে অঞ্চলবসী ৰাইজক । বছৰ-বছৰ ধৰি মেৰামতিৰ অভাৱত এতিয়া পথছোৱাত সৃষ্টি হৈছে প্ৰকাণ্ড-প্ৰকাণ্ড গাত । এজাক বৰষুণতে পথটোত সৃষ্টি হয় একাঠু বোকা । ফলত পথছোৱাৰে নিতৌ যাতায়ত কৰা শ-শ পথচাৰি,ৰোগী,স্কুল,কলেজীয়া ছাত্ৰ-ছাত্ৰীয়ে যমৰ যাতনা ভুগিবলগীয়া পৰিস্থিতি হৈ আহিছে । ইয়াৰ পিছতো কাণষাৰ নাই স্থানীয় বিধায়ক অশোক কুমাৰ সিংহীৰ ।
এতিয়া চব্ কা চাথ চবকা বিকাশৰ শ্ল'গান দি দিছপুৰৰ গাদী দখল কৰা বিজেপি চৰকাৰ খনৰ বিকাশৰ প্ৰকৃত স্বৰূপ উদঙাই দিছে পূৱ বিলাসীপাৰাৰ এই পথছোৱাই । পূৱ বিধানসভা সমষ্টিৰ অন্তৰ্গত বাঘমাৰী গাঁও পঞ্চায়তত মাজেৰে যোৱা এই জৰাজীৰ্ণ পথছোৱাই জীয়াতু ভোগাইছে অঞ্চলবাসীক ৰাইজক । যাৰ বাবে বৃহস্পতিবাৰে অতিষ্ঠ হৈ অঞ্চলবাসীয়ে জৰাজীৰ্ণ পথটোৰ মাজতেই ধানৰ কঠিয়া ৰুই সাব্যস্ত কৰে প্ৰতিবাদ ।
উল্লেখ্য যে, যি সময়ত ৰাজ্য চৰকাৰে কোটি কোটি ব্যয় সাপেক্ষে ৰাজ্যৰ সকলো পথ দলং মেৰামতি আৰু পকীকৰণ কৰি অহাৰ ঢাক ঢোল পিটিছে তেনে সময়ত গুৰুত্বপূৰ্ণ এই পথটো মেৰামতিৰ অভাৱত জহি-খহি জৰাজীৰ্ণ ৰূপ ধাৰণ কৰাত চৰকাৰখনৰ উন্নয়নৰ প্ৰকৃত স্বৰূপটো উদঙাইছে বুলি অভিযোগ স্থাপন কৰিছে স্থানীয় ৰাইজে । গুৰুত্বপূৰ্ণ পথটো মেৰামতিৰ বাবে অঞ্চলটোৰ ৰাইজে স্থানীয় বিধায়কৰ ওচৰত বহু বাৰ আবেদন-নিবেদন কৰিছে যদিও বিধায়কগৰাকীৰ কোনো ধৰণৰ কাণসাৰ নিদিয়া বুলি উল্লেখ কৰি এনেদৰে প্ৰতিবাদ মুখৰ হৈ পৰে অঞ্চলবাসী ৰাইজ ।
হৰলটাৰী,হাউদাৰটাৰী, দ্বীপৰকুটী,চোকাপাৰা আদি কৰি প্ৰায় 20 খন গাঁৱৰ ছাত্ৰ ছাত্ৰী, কৃষক, ব্যৱসায়ী পথচাৰিৰ লগতে ৰোগী সকলে যাতায়তৰ ক্ষেত্ৰত চৰম দুৰ্ভোগ ভুগি অহা পথটোত ধানৰ কঠিয়া ৰুই প্ৰতিবাদ সাব্যস্ত কৰিছে স্থানীয় লোকে । লগতে অতি সোনকালে পথ ছোৱাত মেৰামতি কৰাৰ বাবে চৰকাৰৰ ওচৰত দাবীও জনাইছে ।
লগতে চাওকঃ বিশ্বনাথত অস্ত্ৰসহ গ্ৰেপ্তাৰ চোৰাং চিকাৰী
