নেশ্যনেল ডেস্ক, ২৭ জুলাই : মঙলবাৰে বিৰোধীৰ হুলস্থুলৰ মাজতে ৰাজ্যসভাৰ অধ্যক্ষ এম ভেংকায়া নাইডুৱে সদনৰ কামত ব্যাঘাত জন্মাক লৈ চিন্তা ব্যক্ত কৰে । সংবাদ মাধ্যমৰ প্ৰতিবেদনৰ প্ৰসংগ উত্থাপন কৰি অধ্যক্ষ এম ভেংকায়া নাইডুৱে ভাষণ প্ৰদান কৰে । তেওঁ সংবাদ মাধ্যমে প্ৰকাশ কৰা প্ৰতিবেদনক লৈ চিন্তিত হৈ পৰিছে । সংবাদ মাধ্যমৰ বাতৰি অনুসৰি, সদনৰ একাংশ সদস্যই বৰ্ষাকালীন অধিৱেশনৰ বাকী সময়ছোৱাত সদনৰ কাম ভালদৰে কৰিবলৈ নিদিবলৈ সংকল্পবদ্ধ হৈছে ।
তেওঁ লগতে কয় যে, সংসদত আইন প্ৰণয়ন আৰু ৰাজহুৱা বিষয়বোৰ আলোচনা কৰা হয় । দলীয় নেতাসকলে বৰ্তমানৰ পৰিস্থিতি আৰু ৰাজহুৱা স্বাৰ্থৰ বিষয়বোৰ উত্থাপন কৰাৰ পৰা বঞ্চিত হোৱাৰ বাবে তেওঁৰ ওচৰত চিন্তা ব্যক্ত কৰিছে বুলি মন্তব্য কৰে । সকলোকে এই মনোভাৱৰ বিষয়ে তেওঁ পুনৰ বিবেচনা কৰিবলৈ আহ্বান জনায় । বিৰোধীৰ হুলস্থুলৰ মাজতে মঙলবাৰে দুপৰীয়া ১২ বজালৈ ৰাজ্যসভা স্থগিত ৰখা হয় ।
বৰ্ষাকালীন অধিৱেশনৰ ষষ্ঠ দিনা সদন আৰম্ভ হোৱাৰ লগে লগে বিৰোধী দলসমূহে 'পেগাছাছ' সম্পৰ্কত সংবাদ মাধ্যমে প্ৰকাশ কৰা প্ৰতিবেদনক লৈ শ্ল'গান দিবলৈ আৰম্ভ কৰে ।
সোমবাৰে পাঁচবাৰকৈ উচ্চ সদন স্থগিত ৰখা হয় । চৰকাৰে ইয়াৰ আইনী কাৰ্যসূচী আগবঢ়াব বিচাৰোতে বিৰোধীয়ে হুলস্থুলীয়া পৰিৱেশৰ সৃষ্টি কৰে । দুপৰীয়া ১২ বজা, বিয়লি ২ বজা, আবেলি ৩ বজা, আবেলি ৪ বজা আৰু সন্ধিয়া ৫ বজালৈ পাঁচবাৰকৈ সদন স্থগিত ৰখা হয় । যোৱা সপ্তাহত বৰ্ষাকালীন অধিৱেশন আৰম্ভ হোৱাৰে পৰা সংসদৰ দুয়োখন সদনত বিভিন্ন দাবী জনাই বিৰোধী দলসমূহে প্ৰতিবাদ কৰি আহিছে ।
বিৰোধী দলসমূহে বৰ্তমান পেগাছাছৰ সম্ভাৱ্য নিৰীক্ষণ তালিকাক লৈ শাসকীয় দলক প্ৰশ্ন উত্থাপন কৰি আছে । ইফালে, শাসকীয় দলে এই নিৰীক্ষণ তালিকা ভিত্তিহীন বুলি দাবী কৰিছে । ইয়াৰ পাছতে সদনত অব্যাহত আছে পেগাছাছ বিতৰ্ক ।
লগতে পঢ়ক: ড৹ এ পি জে আব্দুল কালামলৈ শ্ৰদ্ধাঞ্জলি উপ-ৰাষ্ট্ৰপতি ভেংকায়া নাইডুৰ
