শামুকৰ খোলাত মুকুতা; চৰৰ ল'ৰা আজি ন্যায়াধীশৰ আসনত
প্ৰত্যাহ্বান যিয়ে নহওঁক, ইচ্ছা কৰিলে কি কৰিব নোৱাৰি ! সেয়াই কৰি দেখুৱালে চহৰাঞ্চলৰ আবু আৰিফ খানে ।
Published : June 18, 2025 at 1:40 PM IST
নগাঁও : সচৰাচৰ চৰ-চাপৰি বুলিলে সকলো দিশৰ পৰা পিছপৰা বুলিয়ে মানুহে ধাৰণা কৰে । বান বিধ্বস্ত চৰ-চাপৰি উন্নয়নৰ ক্ষেত্ৰতো পিছপৰা । প্ৰায় প্ৰতিটো ক্ষেত্ৰতে অৱহেলিত চহৰাঞ্চলত শিক্ষাগত অৰ্হতাও তেনেই ক্ষীণ । বিশেষকৈ শিক্ষানুষ্ঠানৰ অভাৱ, যাতায়তৰ অসুবিধাৰ বাবেই উচ্চ শিক্ষা গ্ৰহণৰ পৰা বঞ্চিত হ'বলগীয়া হয় চৰাঞ্চলৰ যুৱক-যুৱতী । কিন্তু এনে এক পৰিস্থিতিতে ডাঙৰ দীঘল হোৱা এজন যুৱকে এতিয়া নিজকে যোগ্য কৰি তুলিছে । ন্যায়াধীশৰ দৰে অতি সন্মানীয় আসনত বহিবলৈ সক্ষম হৈছে যুৱকজনে ।
ন্যায়াধীশৰ বাবে নিজকে যোগ্য কৰি তুলিবলৈ সক্ষম হোৱা যুৱকজন হৈছে নগাঁও জিলাৰ কমলসুঁতি চৰৰ আবু আৰিফ খান । কমলসুঁতি চৰৰ আব্দুল মজিদ আৰু আলিয়া বেগমৰ পুত্ৰ আবু অৰিফ খান সম্প্ৰতি নগাঁও অধিবক্তা সন্থাৰ সদস্য হিচাপে নগাঁও আদালতত অধিবক্তাৰ দায়িত্ব পালন কৰি আছে । কিন্তু এই ব্যস্ততাৰ মাজতো ন্যায়াধীশৰ বাবে প্ৰস্তুতি চলাই আহিছিল আৰিফ খানে ।
ন্যায়াধীশৰ আসনত বহিবলৈ এবাৰ দুবাৰ নহয়, ১২ বাৰকৈ পৰীক্ষাত অৱতীৰ্ণ হৈছিল কমলসুঁতি চৰৰ আবু আৰিফ খানে । কিন্তু ১২ বাৰেই ব্যৰ্থ হোৱাৰ পাছতো ভাগি পৰা নাছিল আৰিফ খান । নিজৰ লক্ষ্যত উপনীত হ'বলৈ পুনৰ এবাৰ পৰীক্ষাত অৱতীৰ্ণ হৈছিল আবু আৰিফ খান ।
অৱশেষত ১৩ নম্বৰ বাৰত নিজৰ লক্ষ্যত উপনীত হ'বলৈ সক্ষম হ'ল আৰিফ খান । অতিৰিক্ত ন্যায়াধীশৰ বাবে বাছনি হোৱা আৰিফ খানে নিজৰ সফলতাৰ খবৰ লাভ কৰাৰ পাছতে উৎফুল্লিত হৈ পৰে । এই সন্দৰ্ভত প্ৰত্যাহ্বানৰ কথা সুঁৱৰি ইটিভি ভাৰতৰ সন্মুখত আৱেগিক হৈ পৰে আবু আৰিফ খান ।
নগাঁৱৰ ধিং সমষ্টিৰ বহু ভিতৰুৱা চৰাঞ্চলৰ পৰাই শিক্ষা জীৱন আৰম্ভ কৰা আৰিফ খানে এই প্ৰাপ্তিৰ পাছত ভিতৰুৱা কোনো অঞ্চলৰ জীৱনৰ সফলতাৰ অন্তৰায় হ'ব নোৱাৰে বুলি ইটিভি ভাৰতৰ সন্মুখত মন্তব্য কৰে ।
উল্লেখ্য যে, কমলসুঁতি চৰৰ অপ্ৰাদেশিকৃত প্ৰাথমিক বিদ্যালয়ৰ পৰা শিক্ষা জীৱন আৰম্ভ কৰা আৰিফে টুলুঙা নাওঁ, খোজকাঢ়ি, বাঁহৰ সাঁকো পাৰ হৈ প্ৰায় ৭-৮ কিলোমিটাৰ নিলগৰ কান্দুলিমাৰী হাইস্কুলৰ পৰা হাইস্কুল শিক্ষান্ত পৰীক্ষাত উত্তীৰ্ণ হৈ পৰৱৰ্তী সময়ত ধিং মহাবিদ্যালয়ৰ পৰা স্নাতক ডিগ্ৰী লাভ কৰি নগাঁও আইন মহাবিদ্যালয়ৰ পৰা এল এল বিত উত্তীৰ্ণ হয় ।
পৰৱৰ্তী সময়ত ওকালতি কৰি যোৱাৰ উপৰিও এল এল এম ডিগ্ৰী লাভ কৰিবলৈ সক্ষম হৈছিল । আৰিফ খানৰ সফলতাত এতিয়া আনন্দমুখৰ পৰিৱেশ কমলসুঁতি চৰৰ তেওঁৰ ঘৰত । উৎফুল্লিত হৈ পৰিছে আৰিফ খানৰ পিতৃ-মাতৃৰ লগতে আত্মীয় । ভিতৰুৱা চৰাঞ্চলৰ আৰিফ খানৰ সফলতাত এতিয়া কমলসুঁতি চৰবাসীৰ লগতে নগাঁৱৰ বিভিন্নজন আনন্দিত হোৱাৰ লগতে এই সফলতাৰ বাবে তেওঁক শুভেচ্ছা জনাইছে ।
ইটিভি ভাৰতৰ আগত তেওঁ কয়, "নথৈ আনন্দিত হৈছো । বিগত ১২-১৩ বছৰ ধৰি নিৰৱচ্ছিন্নভাৱে চেষ্টা কৰি আহিছিলো । বহুবাৰ বিফলো হৈছো । এতিয়া সফলতা পাই মই যথেষ্ট আনন্দিত হৈছো । মোৰ প্ৰথম কৃতিত্ব মা-দেউতা । তেওঁলোকে চৰতে জীৱিকা নিৰ্বাহ কৰি অশেষ কষ্ট কৰি প্ৰকৃতিৰ সৈতে যুঁজি আমাক যে এইখিনি সুবিধা দিছে লিখা পঢ়া কৰাৰ কাৰণে...।"
