নেশ্যনেল ডেস্ক,২৫ এপ্ৰিল : উত্তৰ প্ৰদেশৰ ললিতপুৰত ভয়ংকৰ পথ দুৰ্ঘটনা । পুৱতি নিশা দুৰ্ঘটনাত পতিত হয় এখন বৰযাত্ৰীৰ বাহন । বিবাহ অনুষ্ঠানৰ পৰা উভতি গৈ থকাৰ সময়তে পুৱতি নিশা ৰাজঘাট-ললিতপুৰ পথত এই দুৰ্ঘটনাটো সংঘটিত হয় । নিয়ন্ত্ৰণহীন বাছখন ৰাস্তাৰ কাষতে বাগৰি পৰে । দুৰ্ঘটনাটোত ২৪ গৰাকী যাত্ৰী আহত হয় । তেওঁলোকৰ ৩ জনৰ অৱস্থা সংকটজনক বুলি জানিব পৰা গৈছে । তেওঁলোকক ঝান্সি চিকিৎসা মহাবিদ্যালয়লৈ প্ৰেৰণ কৰা হৈছে । আটাইকেইজন আহত মধ্য প্ৰদেশৰ বাসিন্দা ।
প্ৰশাসনৰ এগৰাকী বিষয়াৰ মতে কইনাৰ ফালৰ পৰা কিছু লোক মধ্য প্ৰদেশৰ অশোক নগৰ জিলাৰ মুংৱালী চহৰৰ পৰা বিবাহ অনুষ্ঠানৰ বাবে ব্যক্তিগত বাছখনেৰে ললিতপুৰলৈ গৈছিল । বিবাহৰ ৰীতি-নীতি বুধবাৰে অনুষ্ঠিত হৈছিল । তাৰ পিচত বৃহস্পতিবাৰে পুৱা প্ৰায় ৩ বজাত, ২৫ জনৰো অধিক লোক বাছখনেৰে অশোকনগৰলৈ উভতি গৈছিল ।
বাছখন ৰাজঘাট-ললিতপুৰ পথত অৱস্থিত মাদৱাৰী গাঁৱৰ সমীপত উপস্থিত হৈছিল । সেই সময়ছোৱাত হঠাতে নিয়ন্ত্ৰণহীনভাৱে বাছখনে ৰাস্তাৰ কালভাৰ্টত খুন্দা মাৰে । দুৰ্ঘটনাটোৰ পিচত ঘটনাস্থলীত হুলস্থূলীয়া পৰিৱেশৰ সৃষ্টি হয় । লগে লগে স্থানীয় লোকসকল ঘটনাস্থলীত উপস্থিত হয় । ঘটনা সন্দৰ্ভত খবৰ লাভ কৰাৰ পিচতে আৰক্ষীও সেই স্থানত উপস্থিত হয় ।
বাছখনত থকা প্ৰায় ২৪ গৰাকী লোক আহত হয় । আহতসকলক এম্বুলেন্সেৰে জিলা চিকিৎসালয়লৈ প্ৰেৰণ কৰা হয় । তেওঁলোকৰ ৩ গৰাকীক ঝান্সি চিকিৎসা মহাবিদ্যালয়লৈ প্ৰেৰণ কৰা হয় । ইতিমধ্যে আৰক্ষীয়ে এই দুৰ্ঘটনা সন্দৰ্ভত গোচৰ ৰুজু কৰিছে আৰু তদন্ত প্ৰক্ৰিয়া অব্যাহত আছে ।
লগতে পঢ়ক :ৰাজস্থানত দুৰ্ঘটনাগ্ৰস্ত চোৰাংচোৱা বিমান - Plane Crash In Jaisalmer
