Face book love: ఓ యువతి ప్రేమాయణం పోలీసులకు తలనొప్పిగా మారింది. ఎవరో ఏంటో తెలియకుండానే.. ఓ అబ్బాయితో ఫేస్బుక్ వేదికగా ప్రేమలో పడి... కనీసం ముఖాలు చూసుకోకుండానే ఏడాదిపాటు ఇద్దరూ ప్రేమించుకున్నారు. వీరి ప్రేమకు అమ్మాయి తల్లిదండ్రులు అంగీకరించకపోవడంతో.. యువకుడు ప్రేమకు ఫుల్ స్టాప్ పెడదామనుకున్నాడు. కానీ యువతి మాత్రం ప్రియుడి దగ్గరకు వెళ్లి పెళ్లి చేసుకోవాలని పట్టుబట్టింది. కుదరదని యువకుడు తెగేసి చెప్పడంతో...న్యాయం చేయాలంటూ అనంతపురం సఖి కేంద్రంలో తిష్ట వేసింది.
ప్రియుడితో వివాహం చేసే వరకు కదిలేదే లేదు..
గుంతకల్లుకు చెందిన విశ్రాంత రైల్వే ఉద్యోగి కుమార్తె.. ఒంగోలుకు చెందిన అబ్బాయి.. ఏడాది క్రితం ఫేస్బుక్ ద్వారా పరిచయమయ్యారు. స్నేహం కాస్తా ప్రేమగా మారి... ఏడడుగల బంధంతో ఒక్కటవ్వాలని నిర్ణయించుకున్నారు. యువతి తల్లిదండ్రులు పెళ్లికి ససేమిరా అన్నారు. యువకుడిని ఫోన్‌లో తిట్టి.. పోలీసులకు ఫిర్యాదు చేస్తామని హెచ్చరించారు. దీంతో అబ్బాయి యువతితో మాట్లాడటం మానేశాడు. ప్రియుడు విజయనగరంలోని ఇంజనీరింగ్ కళాశాలలో చదువుతున్నాడని తెలుసుకుని అక్కడికి వెళ్లి.. ఎందుకు ముఖం చాటేస్తున్నావని నిలదీసింది. పెళ్లికి పెద్దలు అంగీకారం లేనందున... కలవడం కుదరదని యువకుడు తెగేసి చెప్పేశాడు. దీంతో చేసేదేమీ లేక అనంతపురానికి తిరిగి వచ్చింది. న్యాయం చేయాలంటూ ఐసీడీఎస్ సఖి కేంద్రంలో తిష్టవేసింది. ఆశ్రయం కోరి వస్తే తనను మహిళా పోలీసులు చిత్రహింసలకు గురి చేస్తున్నారని యువతి ఆరోపించింది. ప్రియుడితో వివాహం చేసే వరకు కదిలేదేలే అంటోంది.