వాతావరణ మార్పుల నేపథ్యంలో(VICE PRESIDENT ON CLIMATE CHANGE) పర్యావరణాన్ని పరిరక్షించుకోవడం ప్రతి ఒక్కరి బాధ్యత అని ఉప రాష్ట్రపతి వెంకయ్య నాయుడు అన్నారు. భూతాపం కారణంగా సముద్రం తీర ప్రాంతాలు తీవ్ర ప్రతికూలతలకు లోనవుతున్నాయన్న ఆయన.. భవిష్యత్ తరాలకు అందమైన, సౌకర్యవంతమైన, ఆరోగ్యకరమైన భూమిని అందించేందుకు ప్రతి ఒక్కరూ చొరవ తీసుకోవాలని సూచించారు. విశాఖ పర్యటనలో ఉన్న బీచ్ రోడ్లోని యోగా విలేజ్లో ఉన్న అటవీ పరిశోధన, తీర ప్రాంత పర్యావరణ వ్యవస్థా కేంద్రాన్ని సందర్శించారు. ఇదే భవనంలో సముద్ర పర్యావరణ వ్యవస్థపై ఏర్పాటు చేసిన వైజ్ఞానిక ప్రదర్శనను ప్రారంభించారు. ఈ సందర్భంగా తన అభిప్రాయాలను పంచుకున్నారు. పర్యావరణానికి హాని చేయని విధంగా నడుచుకోవడం ప్రతి ఒక్కరి బాధ్యత అని గుర్తు చేశారు.
'వాతవరణ మార్పుల కారణంగా సముద్రమట్టాల పెరుగుదల'
విజ్ఞాన శాస్త్ర అంతిమ లక్ష్యం ప్రజల జీవితాలను మెరుగుపరచడమేనన్న ఉపరాష్ట్రపతి, సముద్ర వాతావరణంలో పాడవ్వని కలపతో తయారు చేసిన 100 పడవలను ఆంధ్రప్రదేశ్, తమిళనాడులోని మత్స్యకారులకు ఈ సంస్థ అందజేయడం పట్ల సంతోషం వ్యక్తం చేశారు. వాతావరణ మార్పుల కారణంగా సముద్ర మట్టాలు పెరుగుతున్నాయన్న ఆయన.. దీనివల్ల సముద్ర తీర ప్రాంతాల్లో భూభాగం తగ్గిపోవడం, భూమిలో లవణీయత పెరగడం లాంటివి చోటు చేసుకుంటున్నాయని తెలిపారు. ఈ పరిస్థితులు వ్యవసాయం మీద, నివాస సముదాయాల మీద తీవ్ర ప్రతికూల ప్రభావాన్ని చూపుతాయన్నారు. పర్యావరణ వ్యవస్థల మీద ఈ అసమతౌల్యతను తగ్గించేందుకు ప్రతి ఒక్కరూ కృషి చేయాలని పిలుపునిచ్చారు.