జగన్​ భూ దాహానికి ముసుగు ​చట్టం - ఆ లక్షల ఎకరాలు ఎవరి ఖాతాలోకి? - AP LAND TITLING ACT 2023

AP Land Titling Act : ఆంధ్రప్రదేశ్​ను అమ్మకానికి పెట్టారా? జగన్​ మళ్లీ అధికారంలోకి వస్తే మన భూములపై హక్కులు ఆవిరేనా? భూ యాజమాన్య హక్కుల చట్టం (Land Titling Act-2023) రాష్ట్ర ప్రజల పాలిట పెను శాపం కానున్నదా? అంటే అన్ని వర్గాల నుంచి అవుననే సమాధానమే వినిపిస్తోంది.

AP Land Titling Act : జగన్​ ప్రభుత్వం తీసుకువచ్చిన ల్యాండ్​ టైటిలింగ్ యాక్ట్​పై అన్ని వర్గాల ప్రజలు ఆందోళన వ్యక్తం చేస్తున్నారు. భూములపై యాజమాన్య హక్కులు కోల్పోయే ప్రమాదం ఉందంటూ వాపోతున్నారు. వ్యవసాయ భూములే గాకుండా మున్ముందు ఇళ్లు, ప్లాట్లు, ఖాళీ స్థలాల భద్రతపైనా బెంగపెట్టుకున్నారు.

"జగన్​ భూ దాహానికి ల్యాండ్​ టైటిలింగ్ చట్టం ఆయుధం కానున్నది. లక్షల కోట్ల బ్లాక్​ మనీ అంతా తిరిగి భూముల రూపంలోకి మళ్లించనున్నట్లు తెలుస్తోంది. రాష్ట్ర వ్యాప్తంగా ఉన్న ప్రభుత్వ, వక్ఫ్​, దేవాదాయ, వివాదాస్పద లక్షల ఎకరాలు అజ్ఞాత వ్యక్తుల ఖాతాల్లోకి మళ్లించే ప్రమాదం పొంచి ఉంది. గతంలో పరిశ్రమల పేరిట సేకరించిన భూములు, మున్ముందు పరిశ్రమల పేరిట చేపట్టే భూ సేకరణకు ఇప్పటికే రంగం సిద్ధం అవుతోంది. జగన్ ప్రభుత్వం తీసుకొచ్చిన ల్యాండ్​ టైట్లింగ్ చట్టం ఇందుకు అవకాశం కల్పిస్తోంది" అని న్యాయవాదులు ఆందోళన వ్యక్తం చేస్తున్నారు.

దేశంలో ఎక్కడా లేని చట్టం అది. కేంద్రమే తెచ్చిందని ఇక్కడి మంత్రులు చెప్తున్నా బీజేపీ అధికారంలో ఉన్న రాష్ట్రాల్లోనూ అది అమలులో లేదు. ఒక్క ఆంధ్రప్రదేశ్​లోనే అమలు చేయడానికి వైఎస్సార్సీపీ ప్రభుత్వం ఎందుకు తొందరపడ్డట్టు? ఎవరి ప్రయోజనాలు ఆశించి చట్టం ముసుగులో ముందుకొస్తున్నట్లు? అని ప్రశ్నిస్తే సామాన్యుడు, రైతులు సైతం తీవ్ర స్థాయిలో ఆగ్రహం వ్యక్తం చేస్తున్నారు.

"భూ వివాదాల పరిష్కారం పేరుతో చట్టాన్ని తీసుకొస్తున్నామని చెప్తున్నా ఈ చట్టం అనేక వివాదాలకు ఆజ్యం పోసే ప్రమాదం ఉంది. ఉపాధి కోసం ఊరు వదిలి వెళ్లిన వాళ్లు, విదేశాల్లో ఉంటున్న వారు భూములపై ఆశలు వదులుకోవాల్సిన పరిస్థితిని కొత్త చట్టం కల్పిస్తోంది. రాజకీయ ప్రతీకారేచ్ఛతో రగిలిపోతున్న వారికి సైతం ఈ చట్టం అస్త్రంలా ఉపయోగపడనుంది. భూమి మాది అని చెప్పుకోవడమే తప్ప.. రుజువు చేసుకునేందుకు ఎలాంటి మార్గం కనిపించదు. అధికార పార్టీ నేతల కనుసన్నల్లో జరిగే ఈ వ్యవహారం అంత తేలిక కాదు. చట్టంలో కీలక పాత్ర పోషించే టైటిల్​ రిజిస్ట్రేషన్ ఆఫీసర్​ (TRO) నియామకం మొత్తం రాజకీయంగా ముడిపడి ఉండడమే ఇందుకు కారణం" అని విపక్ష నేతలు పేర్కొంటున్నారు.

మన భూమి పక్కనే వైఎస్సార్సీపీ నేత భూమి కూడా ఉంటే గతంలో సరిహద్దు వివాదాలు కూడా ఉంటే ఇక ఆ భూమిని మర్చిపోవాల్సిందేనా? అనే సందేహం కూడా రైతులు వ్యక్తం చేస్తున్నారు. ల్యాండ్ టైట్లింగ్ యాక్ట్ నిబంధనల ప్రకారం ఎవరైనా వ్యక్తులు మన భూమిపై ఫిర్యాదు చేసినా, చివరికి ఎవరూ ఫిర్యాదు చేయకున్నా అధికార పార్టీ నియమించే ల్యాండ్​ టైట్లింగ్ అధికారి సుమోటోగా తీసుకుని మన భూమి రిజిస్ట్రేషన్​ నిలిపేసే ప్రమాదం లేకపోలేదు. భూమి నాదే అని నిరూపించుకునేందుకు అవసరమైన అని పత్రాలున్నా చివరికి దానిని సైతం పెండింగ్​లో పెట్టే వీలు టీఆర్​ఓకు కల్పిస్తోందీ చట్టం. చిన్న, సన్న కారు రైతులు ప్రత్యర్థులతో వేగలేక, హైకోర్టుకు వెళ్లే ఆర్థిక స్థోమత లేక చివరికి రాజీ పడాల్సిందే. ఇచ్చిందే బహుమానం అంటూ భూమి అప్పగించాల్సిందే అని ఆందోళనకు గురవుతున్నారు.