ਚੰਡੀਗੜ੍ਹ: ਲੱਕੜ ਨਾਲ ਵਾਰਦਾਤਾਂ ਨੂੰ ਅੰਜ਼ਾਮ ਦੇਣ ਵਾਲੇ ਸ਼ਾਤਿਰ ਅਪਰਾਧੀ ਹੁਣ ਬਚ ਨਹੀਂ ਸਕਣਗੇ। ਵਾਰਦਾਤ ਵਿੱਚ ਲੱਕੜ ਦੇ ਬਣੇ ਔਜ਼ਾਰ ਰਾਹੀਂ ਵੀ ਅਪਰਾਧੀ ਨੂੰ ਸਲਾਖਾਂ ਪਿੱਛੇ ਭੇਜਿਆ ਜਾ ਸਕੇਗਾ। ਇਸ ਤਕਨੀਕ ਦੀ ਖੋਜ ਪੰਜਾਬ ਯੂਨੀਵਰਸਿਟੀ ਦੇ ਫੋਰੈਂਸਿਕ ਵਿਭਾਗ ਦੇ ਪ੍ਰੋਫ਼ੈਸਰ ਡਾ. ਵਿਸ਼ਾਲ ਸ਼ਰਮਾ ਨੇ ਕੀਤੀ ਹੈ। ਦੇਸ਼-ਵਿਦੇਸ਼ ਵਿੱਚੋਂ ਵੱਖ-ਵੱਖ ਤਰ੍ਹਾਂ ਦੇ 32 ਦਰੱਖਤਾਂ ਦੀ ਲੱਕੜ ਉੱਪਰ ਕੀਤੀ ਖੋਜ ਦੀ ਕੁੱਲ ਔਸਤ 90ਫ਼ੀਸਦੀ ਰਹੀ। ਇਹ ਰਿਸਰਚ ਡਾ. ਵਿਸ਼ਾਲ ਨੇ ਆਪਣੇ ਵਿਦੇਸ਼ੀ ਦੋਸਤ ਨਾਲ ਮਿਲ ਕੇ ਕੀਤੀ ਹੈ।
...ਹੁਣ ਲੱਕੜ ਜ਼ਰੀਏ ਵੀ ਫੜ੍ਹੇ ਜਾਣਗੇ ਦੋਸ਼ੀ!
ਈਟੀਵੀ ਭਾਰਤ ਨਾਲ ਖਾਸ ਗੱਲਬਾਤ ਦੌਰਾਨ ਡਾ. ਵਿਸ਼ਾਲ ਸ਼ਰਮਾ ਨੇ ਦੱਸਿਆ ਕਿ ਇਹ ਲੱਕੜ ਜੰਗਲਾਤ ਵਿਭਾਗ ਵਿੱਚ ਹੁੰਦੀ ਤਸਕਰੀ ਦੀ ਖੇਪ ਨੂੰ ਵੀ ਸਕੈਨ ਕਰਕੇ ਦੋਸ਼ੀਆਂ ਨੂੰ ਫੜਨ ਵਿੱਚ ਮਦਦਗਾਰ ਸਾਬਤ ਹੋਵੇਗਾ, ਜਿਸ ਨਾਲ ਦੇਸ਼ ਦੇ ਜੰਗਲਾਂ ਵਿੱਚ ਹੁੰਦੀ ਦਰੱਖਤਾਂ ਦੀ ਕਟਾਈ ਅਤੇ ਤਸਕਰੀ ਨੂੰ ਠੱਲ ਪਾਈ ਜਾ ਸਕਦੀ ਹੈ ਕਿਉਂਕਿ ਇਸ ਖੋਜ ਰਾਹੀਂ ਪਤਾ ਲਗਾਇਆ ਜਾ ਸਕਦਾ ਕਿ ਦਰੱਖਤ ਦੀ ਕਟਾਈ ਜੰਗਲ ਦੇ ਕਿਸ ਹਿੱਸੇ ਵਿੱਚੋਂ ਹੋਈ ਹੈ।