ਗਾਜ਼ੀਆਬਾਦ ਦੇ ਪਾਸਪੋਰਟ ਅਫ਼ਸਰਾਂ ਸਮੇਤ ਪੰਜ ਲੋਕਾਂ ਖ਼ਿਲਾਫ਼ ਸੀਬੀਆਈ ਨੇ ਰਿਸ਼ਵਤ ਲੈਣ ਦਾ ਮਾਮਲਾ ਕੀਤਾ ਦਰਜ

Bribe To Make Passport Case: ਸੀਬੀਆਈ ਨੇ ਪਾਸਪੋਰਟ ਬਣਾਉਣ ਲਈ ਰਿਸ਼ਵਤ ਲੈਣ ਦਾ ਮਾਮਲਾ ਦਰਜ ਕੀਤਾ ਹੈ। ਜਾਂਚ ਏਜੰਸੀ ਨੇ ਗਾਜ਼ੀਆਬਾਦ ਖੇਤਰੀ ਪਾਸਪੋਰਟ ਦਫ਼ਤਰ ਦੇ ਕੁਝ ਅਧਿਕਾਰੀਆਂ ਅਤੇ ਇੱਕ ਬਾਹਰੀ ਵਿਅਕਤੀ ਨੂੰ ਮੁਲਜ਼ਮ ਵਜੋਂ ਨਾਮਜ਼ਦ ਕੀਤਾ ਹੈ। ਜਾਂਚ ਜਾਰੀ ਹੈ।

ਨਵੀਂ ਦਿੱਲੀ/ਗਾਜ਼ੀਆਬਾਦ: ਕੇਂਦਰੀ ਜਾਂਚ ਬਿਊਰੋ (ਸੀਬੀਆਈ) ਨੇ ਕਮਲਾ ਨਹਿਰੂ ਨਗਰ, ਗਾਜ਼ੀਆਬਾਦ ਵਿੱਚ ਖੇਤਰੀ ਪਾਸਪੋਰਟ ਦਫ਼ਤਰ (ਆਰਪੀਓ) ਵਿੱਚ ਪਾਸਪੋਰਟ ਸਹਾਇਕ, ਸੀਨੀਅਰ ਪਾਸਪੋਰਟ ਸਹਾਇਕ ਅਤੇ ਇੱਕ ਨਿੱਜੀ ਵਿਅਕਤੀ ਸਮੇਤ ਪੰਜ ਮੁਲਜ਼ਮਾਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ। ਮੁਲਜ਼ਮਾਂ ਉੱਤੇ ਆਰਪੀਓ ਗਾਜ਼ੀਆਬਾਦ ਵਿੱਚ ਲੰਬਿਤ ਬਿਨੈਕਾਰਾਂ ਦੇ ਪਾਸਪੋਰਟ ਕੇਸਾਂ ਨੂੰ ਸੁਲਝਾਉਣ ਦੇ ਬਦਲੇ ਵਿੱਚ ਨਾਜਾਇਜ਼ ਲਾਭ (ਰਿਸ਼ਵਤ) ਲੈਣ ਦਾ ਇਲਜ਼ਾਮ ਹੈ।

ਇਲਜ਼ਾਮ ਹੈ ਕਿ ਪ੍ਰਾਈਵੇਟ ਵਿਅਕਤੀ (ਮੁਲਜ਼ਮ) ਖੇਤਰੀ ਪਾਸਪੋਰਟ ਦਫਤਰ, ਗਾਜ਼ੀਆਬਾਦ ਵਿਖੇ ਬਕਾਇਆ ਪਾਸਪੋਰਟ ਬਿਨੈਕਾਰਾਂ ਦੀਆਂ ਪੁਲਿਸ ਵੈਰੀਫਿਕੇਸ਼ਨ ਰਿਪੋਰਟਾਂ ਪ੍ਰਾਪਤ ਕਰਨ, ਦਸਤਾਵੇਜ਼ਾਂ ਦੀ ਸਕੈਨਿੰਗ, ਪਾਸਪੋਰਟਾਂ ਦੀ ਛਪਾਈ, ਪਾਸਪੋਰਟ ਭੇਜਣ ਆਦਿ ਲਈ ਖੇਤਰੀ ਪਾਸਪੋਰਟ ਦਫਤਰ ਵਿਚ ਕੰਮ ਕਰਦੇ ਅਧਿਕਾਰੀਆਂ ਨਾਲ ਸੰਪਰਕ ਕਰਦਾ ਸੀ। ਬਦਲੇ ਵਿੱਚ ਉਨ੍ਹਾਂ ਨੇ ਕਥਿਤ ਤੌਰ 'ਤੇ ਵੱਖ-ਵੱਖ ਭੁਗਤਾਨ ਗੇਟਵੇਅ ਦੀ ਵਰਤੋਂ ਕਰਕੇ ਮੁਲਜ਼ਮ ਪਾਸਪੋਰਟ ਅਧਿਕਾਰੀਆਂ ਨੂੰ ਗੈਰ-ਕਾਨੂੰਨੀ ਰਕਮਾਂ ਅਦਾ ਕੀਤੀਆਂ।

ਕੀ ਹਨ ਇਲਜ਼ਾਮ : ਇਹ ਵੀ ਇਲਜ਼ਾਮ ਹੈ ਕਿ 14 ਜੂਨ 2022 ਤੋਂ 2 ਜੁਲਾਈ 2023 ਦੌਰਾਨ ਮੁਲਜ਼ਮ ਪ੍ਰਾਈਵੇਟ ਵਿਅਕਤੀ ਨੇ ਪਾਸਪੋਰਟ ਬਿਨੈਕਾਰਾਂ ਦੇ ਕੇਸਾਂ ਨੂੰ ਹੱਲ ਕਰਨ ਦੇ ਬਦਲੇ 1 ਲੱਖ 57 ਹਜ਼ਾਰ 600 ਰੁਪਏ ਦੀ ਰਿਸ਼ਵਤ ਦਾ ਨਾਜਾਇਜ਼ ਫਾਇਦਾ ਉਠਾਇਆ। ਇਸ ਤਰ੍ਹਾਂ ਪ੍ਰਾਪਤ ਹੋਈ ਕਥਿਤ ਰਕਮ ਯੂਪੀਆਈ ਰਾਹੀਂ ਵੱਖ-ਵੱਖ ਲੈਣ-ਦੇਣ ਰਾਹੀਂ ਮੁਲਜ਼ਮ ਪਾਸਪੋਰਟ ਅਫ਼ਸਰਾਂ, ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ, ਦੋਸਤਾਂ, ਜਾਣੇ-ਪਛਾਣੇ ਵਿਅਕਤੀਆਂ ਦੇ ਬੈਂਕ ਵਾਲੇਟ ਅਤੇ ਬੈਂਕ ਖਾਤਿਆਂ ਵਿੱਚ ਟਰਾਂਸਫਰ ਕੀਤੀ ਗਈ। ਮੇਰਠ, ਮੁਜ਼ੱਫਰਨਗਰ ਅਤੇ ਗਾਜ਼ੀਆਬਾਦ (ਯੂ.ਪੀ.) ਸਥਿਤ ਮੁਲਜ਼ਮਾਂ ਦੇ ਟਿਕਾਣਿਆਂ ਦੀ ਤਲਾਸ਼ੀ ਲਈ ਜਾ ਰਹੀ ਹੈ। ਫਿਲਹਾਲ ਜਾਂਚ ਚੱਲ ਰਹੀ ਹੈ।