କଟକ: ରାତି ପାହିଲେ ଆରମ୍ଭ ହେବ ଦୁର୍ଗାପୂଜା । ଏଥିପାଇଁ ପ୍ରସ୍ତୁତ ସହରର ସମସ୍ତ ପୂଜା ମଣ୍ଡପ । କଟକ ସହରରେ ୧୬୦ଟି ପୂଜା ମଣ୍ଡପରେ ପୂଜା କରାଯିବ। କେବଳ ୯ ଟି ପୂଜା ମଣ୍ଡପରେ ୪ ଫୁଟରୁ ଅଧିକ ଉଚ୍ଚତାର ମୂର୍ତ୍ତି ନିର୍ମାଣ କରାଯାଇଛି। ତେବେ ମୃଣ୍ମୟୀ ମୂର୍ତ୍ତି ପୂଜା ପାଇଁ ସମସ୍ତ ମଣ୍ଡପ ପ୍ରସ୍ତୁତ ରହିଥିବା ବେଳେ ପୋତାପୋଖରୀ ପୂଜା ମଣ୍ଡପରେ ଏଥର ଘଟ ଓ ଫଟୋପୂଜା କରିବାକୁ ନିଷ୍ପତ୍ତି ନେଇଛନ୍ତି। ତେବେ ସମସ୍ତ ମଣ୍ଡପରେ ବିନା ଭକ୍ତ ଓ ବିନା ସମାବେଶରେ ପୂଜା କରାଯିବ।
ଆସନ୍ତାକାଲି ଷଷ୍ଠୀ ପୂଜା। ବେଲବରଣୀ କରାଯାଇ ମଣ୍ଡପରେ ପୂଜାନୀତି ଆରମ୍ଭ ହେବ। ଏଥିପାଇଁ ପ୍ରସ୍ତୁତ ପୂଜା ମଣ୍ଡପ। ସହରରେ ଏଥର ପୂର୍ବଭଳି ଚାନ୍ଦିର ଝଲକ ରହି ନଥିବାବେଳେ ପ୍ରାୟ ୪ଟି ମଣ୍ଡପରେ ଚାନ୍ଦିମେଢ଼ କରାଯାଇଛି । ଫିରିଙ୍ଗି ବଜାର ପୂଜା ମଣ୍ଡପରେ ପୂର୍ବଭଳି ଚାନ୍ଦିର ମେଢ଼ କରାଯାଇଛି ।
ହାଇକୋର୍ଟଙ୍କ ନିର୍ଦ୍ଧେଶ ଅନୁଯାୟୀ, ଏଠାରେ ବଡ଼ ମୂର୍ତ୍ତି ମଧ୍ୟ କରାଯାଇଛି। ଚାନ୍ଦି ମେଢ଼ ସାଙ୍ଗଙ୍କୁ ମାଙ୍କ ମୁକୁଟ ଅଳଙ୍କାର ଆଦି ଚାନ୍ଦିରେ ସଜ୍ଜିତ କରାଯାଇଛି। ମଣ୍ଡପରେ ପ୍ରାୟ ଅଢେଇ କୁଇଣ୍ଟାଲ ଚାନ୍ଦି ବ୍ୟବହାର କରାଯାଇଥିବା ପୂଜା କମିଟି ସମ୍ପାଦକ କହିଛନ୍ତି । ଏହି ମଣ୍ଡପରେ ରୀତିନୀତି ଅନୁଯାୟୀ ପୂଜାର୍ଚ୍ଚନା କରାଯିବ। ମଣ୍ଡପ ଆଗରେ ପରଦା ଟାଣି କୋଭିଡ ନିୟମକୁ ମାନି ପୂଜା କରାଯିବ ବୋଲି ସମ୍ପାଦକ କହିଛନ୍ତି ।