'കൊടി സുനിയാണ് സൂപ്രണ്ട്, ജയിൽ സുഖവാസ കേന്ദ്രം' ; സര്‍ക്കാര്‍ ഒത്താശയെന്ന് കെ സുധാകരന്‍

കണ്ണൂർ : ടിപി വധക്കേസ് പ്രതി കൊടി സുനിയുടെ ജയിലിലെ ഫോൺവിളിയിൽ സംസ്ഥാന സർക്കാരിനെതിരെ രൂക്ഷ വിമർശനവുമായി കെ.പി.സി.സി പ്രസിഡന്‍റ് കെ.സുധാകരൻ. ഫോൺവിളി ഇന്നും ഇന്നലെയും തുടങ്ങിയതല്ലെന്നും എല്‍ഡിഎഫ് ഭരണത്തിന് കീഴിൽ കൊടി സുനിക്ക് ജയിൽ സുഖവാസ കേന്ദ്രമാണെന്നും കെ.സുധാകരൻ എംപി കണ്ണൂരിൽ മാധ്യമങ്ങളോട് പറഞ്ഞു.

താമസിക്കുന്ന ജയിലിലെ സൂപ്രണ്ട് കൊടി സുനിയാണ്. അന്ധനും ബധിരനുമായ കേരളത്തിലെ ഭരണാധികാരിയോട് പറഞ്ഞിട്ട് കാര്യമില്ല. സർക്കാരിന്‍റെ ഒത്താശയോടെയാണ് ഇത് നടക്കുന്നത്. മുഖ്യമന്ത്രി പിണറായി വിജയൻ ഇക്കാര്യത്തിൽ പ്രതികരിക്കണമെന്നും സുധാകരൻ പറഞ്ഞു.

ജയിലിൽ കയറിയ കാലം മുതൽ എല്ലാ സുഖ സൗകര്യവും അനുഭവിച്ചാണ് കൊടി സുനിയുടെ ജീവിതം. ഇക്കാര്യത്തിൽ ജനരോഷം ഉയരണമെന്നും കെ.പി.സി.സി പ്രസിഡന്‍റ് പറഞ്ഞു.