റായ്‌പൂർ: ന്യൂസിലന്‍ഡിനെതിരായ ഏകദിന പരമ്പരയിലെ രണ്ടാം മത്സരത്തിൽ അനായാസം ജയം സ്വന്തമാക്കി ടീം ഇന്ത്യ. റായ്‌പൂരിൽ നടന്ന മത്സരത്തിൽ എട്ട് വിക്കറ്റിന്‍റെ ജയം നേടിയതോടെ മൂന്ന് മത്സരങ്ങളടങ്ങിയ പരമ്പരയിൽ ആതിഥേയര്‍ 2-0 ന് മുന്നിലെത്തി. ആദ്യം ബാറ്റ് ചെയ്‌ത കിവീസിനെ ഇന്ത്യന്‍ ബോളര്‍മാര്‍ 34.3 ഓവറില്‍ 108 റണ്‍സില്‍ എറിഞ്ഞൊതുക്കിയപ്പോൾ മറുപടി ബാറ്റിങ്ങിൽ 20.1 ഓവറിൽ രണ്ട് വിക്കറ്റ് നഷ്‌ടത്തിൽ ജയം കണ്ടു. 51 റൺസെടുത്ത നായകൻ രോഹിത് ശർമ, 11 റൺസെടുത്ത വിരാട് കോലി എന്നിവരുടെ വിക്കറ്റുകളാണ് ഇന്ത്യക്ക് നഷ്‌ടമായത്. 40 റൺസുമായി ഓപ്പണർ ശുഭ്‌മാൻ ഗില്ലും എട്ട് റൺസുമായി ഇഷാൻ കിഷനും പുറത്താകാതെ നിന്നു.
നേരത്തെ ടോസ് നഷ്‌ടമായി ആദ്യം ബാറ്റ് ചെയ്‌ത കിവീസ് നിരയിൽ 36 റണ്‍സെടുത്ത ഗ്ലെൻ ഫിലിപ്സ് മാത്രമാണ് പൊരുതി നോക്കിയത്. ഫിലിപ്‌സിനെ കൂടാതെ കഴിഞ്ഞ മത്സരത്തിൽ സെഞ്ച്വറി നേടിയ ബ്രേസ്‌വെൽ, മിച്ചൽ സാന്‍റ്‌നർ എന്നിവർ മാത്രമാണ് രണ്ടക്കം കടന്നത്.
തുടക്കത്തിൽ തന്നെ പേസിനെ പിന്തുണച്ച പിച്ചിൽ ചെറിയ സ്‌കോർ പിന്തുടർന്ന രോഹിതും ഗില്ലും ക്ഷമയോടെയാണ് ബാറ്റുവീശിയത്. പതിയെ മത്സരത്തിൽ അനായാസം ബാറ്റുവീശിയ രോഹിത് ഗില്ലിനെ കാഴ്‌ചക്കാരനാക്കി സ്‌കോറിങ്ങിന് വേഗം കൂട്ടി. 47 പന്തിൽ ഏഴ് ഫോറും രണ്ട് സിക്‌സും സഹിതമാണ് രോഹിത് അർധസെഞ്ച്വറിയിലെത്തിയത്. ഫിഫ്‌റ്റി തികച്ചതിന് പിന്നാലെ ഹെൻറി ഷിപ്‌ലിക്ക് മുന്നിൽ രോഹിത് വീണു. പിന്നാലെയെത്തിയ കോലിക്ക് വീണ്ടും മിച്ചൽ സാന്‍റ്നർക്ക് മുന്നിൽ പിഴച്ചു. രണ്ട് ഫോറുകളാണ് താരത്തിന്‍റെ ഇന്നിങ്ങ്‌സിലുണ്ടായിരുന്നത്. പിന്നീട് ക്രീസിൽ ഒത്തുചേർന്ന ഗിൽ - ഇഷാൻ സഖ്യം കൂടുതൽ വിക്കറ്റ് നഷ്‌ടമില്ലാതെ ജയത്തിലെത്തിച്ചു.