ಹೈದರಾಬಾದ್: 'ಮಾಣಿಕ್ಯ' ಚಿತ್ರದಲ್ಲಿ ನಟ ಸುದೀಪ್ ಜೊತೆ ನಟಿಸಿದ್ದ ಬಹುಭಾಷಾ ನಟಿ ವರಲಕ್ಷ್ಮಿ ಶರತ್ಕುಮಾರ್ ಇತ್ತೀಚಿಗಷ್ಟೇ ತಮ್ಮ ಬಹು ಕಾಲದ ಗೆಳೆಯನೊಂದಿಗೆ ಉಂಗುರ ಬದಲಾಯಿಸಿಕೊಂಡಿದ್ದರು. ಮುಂಬೈ ಮೂಲದ ನಿಕೋಲಾಯ್ ಸಚ್ದೇವ್ ಅವರ ಜೊತೆಗೆ ಕುಟುಂಬದ ಆಪ್ತರ ಸಮ್ಮುಖದಲ್ಲಿ ನಡೆದ ಅವರ ನಿಶ್ಚಿತಾರ್ಥ ಇದೀಗ ಚರ್ಚೆಗೆ ಕಾರಣವಾಗಿದೆ. ಕಾರಣ ನಿಕೋಲಾಯ್ ಅವರ ಲುಕ್ ಮತ್ತು ಅವರ ಹಿಂದಿನ ಮದುವೆ.
ದಕ್ಷಿಣ ಭಾರತದಲ್ಲಿ ತಮ್ಮ ರಗಡ್ ನಟನೆಯಿಂದ ಸದ್ದು ಮಾಡಿರುವ ನಟಿ ವರಲಕ್ಷ್ಮಿ, ಇದೀಗ ಅಷ್ಟೇ ಖಡಕ್ ಆಗಿ ತಮ್ಮ ಬಗ್ಗೆ ಟ್ರೋಲ್ ಮಾಡಿದವರಿಗೆ ಉತ್ತರಿಸಿದ್ದಾರೆ. 'ನನ್ನ ತಂದೆ ಕೂಡ ಎರಡು ಬಾರಿ ಮದುವೆಯಾಗಿದ್ದರು. ಇದರಲ್ಲಿ ತಪ್ಪೇನಿದೆ. ಅವರು ಖಷಿಯಾಗಿದ್ದಾರೆ. ನನ್ನ ಹಾಗೂ ನಿಕ್ ಸಂಬಂಧ ಬಗ್ಗೆ ಕೂಡ ಹಲವು ಮಂದಿ ಮಾತನಾಡುವುದನ್ನು ಕೇಳಿದೆ. ಅವರು ನೋಡುಗರಿಗೆ ಅಂದವಾಗಿ ಕಾಣದೆ ಹೋಗಬಹುದು. ಆದರೆ, ನನ್ನ ಕಣ್ಣಿಗೆ ಹ್ಯಾಂಡ್ಸಮ್ ಆಗಿ ಕಾಣುತ್ತಾರೆ. ನಮ್ಮ ಸಂಬಂಧದ ಬಗ್ಗೆ ನಕಾರಾತ್ಮಕ ಟೀಕೆಗಳ ಬಗ್ಗೆ ನಾನು ತಲೆಕೆಡಿಸಿಕೊಳ್ಳುವುದಿಲ್ಲ. ಯಾರದೋ ಟೀಕೆಗೆ ನಾನು ಏಕೆ ಉತ್ತರಿಸಬೇಕು. ಈ ರೀತಿ ನಕಾರಾತ್ಮಕ ಟೀಕೆಗೆ ಮುಂಚಿನಿಂದಲೂ ನಾನು ಉತ್ತರಿಸುವ ಅಭ್ಯಾಸ ಇಲ್ಲ' ಎಂದು ಸುದ್ದಿ ಮಾಧ್ಯಮಕ್ಕೆ ತಿಳಿಸಿದ್ದಾರೆ.