ಲೆಜೆಂಡರಿ ಆ್ಯಕ್ಟರ್ ಶಾರುಖ್ ಖಾನ್ ಅವರಿಗೆ '2023' ಬಹಳ ವಿಶೇಷವಾದದ್ದು. ನಾಲ್ಕು ವರ್ಷಗಳ ಬ್ರೇಕ್ ಬಳಿಕ ಮೂರು ಸಿನಿಮಾಗಳೊಂದಿಗೆ ಬಂದ ನಟ ಭರ್ಜರಿ ಯಶಸ್ಸು ಕಂಡಿದ್ದಾರೆ. 2023ರಲ್ಲಿ ತೆರೆಕಂಡ ಪಠಾಣ್, ಜವಾನ್ ಮತ್ತು ಡಂಕಿ ಸಿನಿಮಾಗಳು ಪ್ರೇಕ್ಷಕರನ್ನು ರಂಜಿಸುವಲ್ಲಿ ಯಶಸ್ವಿಯಾಗಿವೆ. ಎಸ್ಆರ್ಕೆ ಪುನರಾಗಮನವು ಭಾರತ ಮತ್ತು ಸಾಗರೋತ್ತರ ಪ್ರದೇಶಗಳ ಅಭಿಮಾನಿಗಳಿಂದ ಅತ್ಯುತ್ತಮ ಸಕಾತ್ಮಕ ಪ್ರತಿಕ್ರಿಯೆ ಸ್ವೀಕರಿಸಿದೆ.
2023ರ ಕೊನೆಗೆ ತೆರೆಗಪ್ಪಳಿಸಿದ 'ಡಂಕಿ' ಸಿನಿಮಾದ ಸಂಭ್ರಮಾಚರಣೆ ಮುಂಬೈನಲ್ಲಿ ನಡೆದಿದೆ. ಫ್ಯಾನ್ಸ್ ಗ್ರೀಟ್ ಆ್ಯಂಡ್ ಮೀಟ್ ಈವೆಂಟ್ನಲ್ಲಿ ಮಾತನಾಡಿದ ಶಾರುಖ್ ಖಾನ್, ತಮ್ಮ ಪುನರಾಗಮನದ ಪ್ರಯಾಣದ ಮೇಲೆ ಬೆಳಕು ಚೆಲ್ಲಿದರು. ಪಠಾಣ್‌ನೊಂದಿಗೆ 2023 ಪ್ರಾರಂಭವಾಯಿತು. ನಂತರ ಬಂದ ಜವಾನ್ ಕೂಡ ಬ್ಲಾಕ್ಬಸ್ಟರ್ ಹಿಟ್ ಆಗಿ ಸಾವಿರ ಕೋಟಿ ರೂ.ನ ಕ್ಲಬ್ ಸೇರಿತು. ಡಂಕಿ ಸಹ ಯಶಸ್ಸು ಕಂಡಿದೆ. 33 ವರ್ಷಗಳನ್ನು ಸಿನಿಮಾಗೆ ಮೀಸಲಿಟ್ಟಿದ್ದ ಕಲಾವಿದನಿಗೆ ಲಾಂಗ್ ಬ್ರೇಕ್ (4 ವರ್ಷ) ತೆಗೆದುಕೊಳ್ಳುವ ನಿರ್ಧಾರ ಒಂದು ವಿನೂತನ ಅನುಭವ ಎಂಬುದನ್ನು ಎಸ್ಆರ್ಕೆ ಈವೆಂಟ್ನಲ್ಲಿ ಒಪ್ಪಿಕೊಂಡರು.
ಪ್ರೇಕ್ಷಕರಿಗೆ ಕೃತಜ್ಞತೆ ಸಲ್ಲಿಸಿದ ಶಾರುಖ್ ಖಾನ್, ಪಠಾಣ್, ಜವಾನ್ ಮತ್ತು ಡಂಕಿಗಾಗಿ ತಾವು ಸ್ವೀಕರಿಸಿದ ಅಪಾರ ಪ್ರೀತಿ ಬಗ್ಗೆ ಈವೆಂಟ್ನಲ್ಲಿ ಮಾತನಾಡಿದರು. ತಮ್ಮ ಸಿನಿಮಾ ಪ್ರಯಾಣವನ್ನು ರೂಪಿಸುವಲ್ಲಿ ಅಭಿಮಾನಿಗಳ ಅಚಲ ಬೆಂಬಲದ ಪ್ರಾಮುಖ್ಯತೆಯನ್ನು ಒತ್ತಿಹೇಳುತ್ತಾ, ಹೆಚ್ಚು ಕಾಲ ಸಿನಿಮಾಗಳಿಂದ ದೂರವಿರಬಾರದು ಎಂಬ ಅಭಿಮಾನಿಗಳ ಮನವಿಯನ್ನೂ ಕೂಡ ನಟ ಸ್ವೀಕರಿಸಿದ್ದಾರೆ.