ಶಿವಮೊಗ್ಗ: ಯುವಕನೊಬ್ಬ ಇಂದು ಮುಂಜಾನೆ ಮೃತ ಪಟ್ಟಿದ್ದು, ಮಣಿಪಾಲ್ ವೈದ್ಯರ ನಿರ್ಲಕ್ಷ್ಯದಿಂದಲೇ ಮೃತಪಟ್ಟಿದ್ದಾನೆ ಎಂದು ಪೋಷಕರು ಆರೋಪ ಮಾಡಿದ್ದಾರೆ.
ಶಿವಮೊಗ್ಗ ವಿದ್ಯಾನಗರ ನಿವಾಸಿ, ಅಜಯ್ ಸಿಂಗ್(23) ಮೃತ ಯುವಕ. ಅಜಯ್ ಸಿಂಗ್ಗೆ ಕಳೆದ ಎರಡು ದಿನದ ಹಿಂದಷ್ಟೆ ಮಣಿಪಾಲ್ ವೈದ್ಯ ಡಾ. ಕಿರಣ್ ಆಚಾರ್ಯ ಎಂಬುವವರು ಬಲ ತೋಳಿಗೆ ಆಪರೇಷನ್ ಮಾಡಿದ್ದರು. ಆಪರೇಷನ್ ನಡೆಸಿದ ನಂತರ ಅಲ್ಲಿನ ವೈದ್ಯರು ಅಜಯ್ ಸಿಂಗ್ರನ್ನು ಡಿಸ್ಚಾರ್ಜ್ ಮಾಡಿಸಿ ಕಳುಹಿಸಿ ಕೊಟ್ಟಿದ್ದರು. ಮಣಿಪಾಲದಿಂದ ಬಂದ ನಂತರ ಅಜಯ್ ಸಿಂಗ್, ಮನೆಯಲ್ಲಿ ಎರಡು ಬಾರಿ ವಾಂತಿ ಮಾಡಿ ಕೊಂಡಿದ್ದಾರೆ.
ಆ ವೇಳೆ ಡಾ.ಕಿರಣ್ ಆಚಾರ್ಯರವರಿಗೆ ಫೋನ್ ಮಾಡಿ ಹೇಳಿದಾಗ, ಅವರು ವಾಟ್ಸ್ಆ್ಯಪ್ನಲ್ಲಿ ಮಾತ್ರೆಯ ಹೆಸರನ್ನು ಕಳುಹಿಸಿ, ಆ ಮಾತ್ರೆ ಕುಡಿಸಿ ಸರಿಯಾಗುತ್ತದೆ ಎಂದು ಹೇಳಿದ್ದಾರೆ.
ಡಾ. ಕಿರಣ್ ಆಚಾರ್ಯ ಹೇಳಿದಂತೆ ಮಾತ್ರ ಸೇವಿಸಿ ಮಲಗಿದ್ದ ಅಜಯ್ ಸಿಂಗ್ಗೆ ಇಂದು ಬೆಳಗಿನ ಜಾವ ತೀವ್ರ ಉಸಿರಾಟದ ಸಮಸ್ಯೆ ಎದುರಾಗಿದೆ. ತಕ್ಷಣ ಶಿವಮೊಗ್ಗದ ಸಂಜೀವಿನಿ ಆಸ್ಪತ್ರೆಗೆ ಕರೆತಂದು ತೋರಿಸಿದಾಗ, ಅಲ್ಲಿನ ವೈದ್ಯರು ಅಜಯ್ ಸಿಂಗ್ ಸಾವನ್ನಪ್ಪಿದ್ದಾನೆ ಎಂದು ಹೇಳಿದ್ದಾರೆ. ಇದಾದ ನಂತರ ಸಿಂಗ್ ಸಂಬಂಧಿಕರು ತಕ್ಷಣ ಮೆಗ್ಗಾನ್ ಆಸ್ಪತ್ರೆಗೆ ಕರೆ ತಂದಿದ್ದಾರೆ. ಅಲ್ಲೂ ಕೂಡ ಸಿಂಗ್ ಸಾವನ್ನಪ್ಪಿದ್ದಾನೆ ಎಂದು ಹೇಳಿದ್ದಾರೆ.
ವೈದ್ಯರ ನಿರ್ಲಕ್ಷ್ಯದಿಂದ ಸಾವು ಸಂಭವಿಸಿದೆ ಎಂದು ಅಜಯ್ ಸಿಂಗ್ ಪೋಷಕರು, ಸಂಬಂಧಿಕರು ಹಾಗೂ ಸ್ನೇಹಿತರು ಆರೋಪಿಸಿದ್ದಾರೆ. ಘಟನೆ ಕುರಿತು ಶಿವಮೊಗ್ಗದ ಕೋಟೆ ಪೊಲೀಸ್ ಠಾಣೆಗೆ ದೂರು ನೀಡಲಾಗಿದೆ.