ಮೈಸೂರು:ಟಿಪ್ಪು ಸುಲ್ತಾನ್ನನ್ನು ಹೊಡೆದು ಹಾಕಿದಂತೆ, ಇವರನ್ನೂ ಹೊಡೆದು ಹಾಕಿ ಎಂದು ಮಂಡ್ಯ ಜಿಲ್ಲೆಯ ಜನತೆಯನ್ನು ಸಿದ್ದರಾಮಯ್ಯ ವಿರುದ್ಧ ಎತ್ತಿಕಟ್ಟುವ ಹೇಳಿಕೆ ನೀಡಿದ್ದ ಸಚಿವ ಡಾ. ಸಿ.ಎನ್. ಅಶ್ವತ್ಥ ನಾರಾಯಣ್ ವಿರುದ್ಧ ಮೈಸೂರಿನಲ್ಲಿ ಸ್ವಾಭಿಮಾನಿ ಹೋರಾಟ ಸಮಿತಿ ವತಿಯಿಂದ ಬೃಹತ್ ಪ್ರತಿಭಟನೆ ನಡೆಸಲಾಯಿತು. ನಗರದ ಕೋಟೆ ಆಂಜನೇಯಸ್ವಾಮಿ ದೇವಸ್ಥಾನ ಮುಂಭಾಗ ಜಮಾಯಿಸಿದ ಪ್ರತಿಭಟನಾಕಾರರು, ನನ್ನನ್ನೂ ಹತ್ಯೆ ಮಾಡಿ ಎಂಬ ಫಲಕಗಳನ್ನು ಹಿಡಿದು, ಅಲ್ಲಿಂದ ಬೃಹತ್ ಪ್ರತಿಭಟನೆ ಮೆರವಣಿಗೆ ಮೂಲಕ ಜಿಲ್ಲಾಧಿಕಾರಿ ಕಚೇರಿ ತಲುಪಿ, ಸಚಿವ ಡಾ.ಸಿ.ಎನ್. ಅಶ್ವತ್ಥನಾರಾಯಣ್ ಹಾಗೂ ರಾಜ್ಯ ಸರ್ಕಾರದ ವಿರುದ್ಧ ಘೋಷಣೆ ಕೂಗಿದರು.
ಜಿಲ್ಲಾಧಿಕಾರಿ ಕಚೇರಿ ಬಳಿ ಏರ್ಪಡಿಸಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದ ಹಿರಿಯ ರಂಗಕರ್ಮಿ ಬಿ. ಬಸವಲಿಂಗಯ್ಯ ಅವರು, ಸರ್ವಜನಾಂಗದ ಶಾಂತಿಯ ತೋಟದಲ್ಲಿ ವಿಕೃತ ಕೋತಿಗಳು ನುಗ್ಗಿವೆ. ಹೆಂಡ ಹಾಗೂ ಮಾಂಸ ತಿಂದು ಮಾತನಾಡುತ್ತಿವೆ, ಏನೆಲ್ಲ ಅವರು ಮಾಡುವುದಿಲ್ಲವೋ ಅದನ್ನು ಬೇರೆಯವರಿಗೆ ಹೇಳುತ್ತಾರೆ ಎಂದು ಹರಿಹಾಯ್ದರು.
ಭಾರತ ಚರಿತ್ರೆಯನ್ನು ಬದಲಾವಣೆ ಮಾಡುವ ಸಾಧ್ಯತೆ ಇದೆ:ರಾಜ್ಯದ 7 ಕೋಟೆ ಜನರೆಲ್ಲಾ ನನ್ನನ್ನು ಕೊಲ್ಲಿ ಎಂದು ಹೇಳಿದರೆ ಇವರು ಏನೂ ಮಾಡಕ್ಕೆ ಆಗಲ್ಲ. ಅಲ್ಲದೇ, ಯಾವ ನಾಯಕನನ್ನು ಹತ್ತಿಕ್ಕಲು ಆಗುವುದಿಲ್ಲ, ಗಾಂಧಿ ಹಿಂದೆ ಹೇಗೆ ಜನ ಹೊರಟರೋ, ಅದೇ ರೀತಿಯಲ್ಲಿ ಈ ಹೋರಾಟ ನಾಂದಿಯಾಗಬೇಕು. ಕರ್ನಾಟಕದ ಮುಂದಿನ ಚುನಾವಣೆ ಭಾರತ ಚರಿತ್ರೆಯನ್ನು ಬದಲಾವಣೆ ಮಾಡುವ ಸಾಧ್ಯತೆ ಇದೆ. ಪಾದಕ್ಕೆ ನಮಸ್ಕಾರ ಮಾಡುವ ನೆಪದಲ್ಲಿ ಗಾಂಧೀಜಿ ಅವರನ್ನು ಕೊಲ್ಲಲಾಯಿತು. ಅಂತರ್ಜಾತಿ ವಿವಾಹ ಮಾಡಿದರು ಎಂಬ ಕಾರಣಕ್ಕೆ ಬಸವಣ್ಣನವರು ಪುರೋಹಿತ ಶಾಹಿಗಳಿಂದ ಕೊಲ್ಲಲ್ಪಟ್ಟರು. ವಿರೋಧ ಪಕ್ಷಗಳನ್ನು ನಿರ್ಮೂಲನೆ ಮಾಡುವುದಾಗಿ ಹೀಗೆ ಮಾತಾಡುತ್ತಾರೆ. ಇದು ದ್ವೇಷದ ಭಾಷೆಯಾಗಿದೆ ಎಂದು ವಾಗ್ದಾಳಿ ನಡೆಸಿದರು.