ಹಾವೇರಿ:ಜಿಲ್ಲೆಯಲ್ಲಿರುವ ಏಕೈಕ ಸಕ್ಕರೆ ಕಾರ್ಖಾನೆಯು ಸಂಗೂರು ಗ್ರಾಮದ ಬಳಿ ಆರಂಭಗೊಂಡು ಸುಮಾರು 4 ದಶಕಗಳು ಗತಿಸಿವೆ. ಆರಂಭದಲ್ಲಿ ಕಬ್ಬು ಬೆಳೆಗಾರರಿಗೆ ಲಾಭ ತರುತ್ತಿದ್ದ ಕಾರ್ಖಾನೆ ನಂತರ ನಷ್ಟದ ಹಾದಿ ಹಿಡಿಯಿತು. ಅಲ್ಲದೇ ಕಾರ್ಖಾನೆಗೆ ಕಬ್ಬು ಸಾಗಿಸುವುದು, ಅದಕ್ಕೊಂದು ದರ ನಿಗದಿ ಮಾಡುವುದರಲ್ಲೇ ಕಾಲ ಕಳೆದು ವರ್ಷಗಳುರುಳಿದರೂ ಕಬ್ಬಿನ ಬಾಕಿ ಹಣ ಸಿಗದೆ ರೈತರು ಕಂಗಾಲಾಗಿದ್ದರು.
ಈ ಎಲ್ಲಾ ವಿಚಾರಗಳಿಂದ ನೊಂದ ಕಬ್ಬು ಬೆಳೆಗಾರರು ತಾವೇ ಸ್ವಂತ ಆಲೆಮನೆ ಆರಂಭಿಸಿದರು. ಸಕ್ಕರೆ ಕಾರ್ಖಾನೆಗೆ ಸೆಡ್ಡು ಹೊಡೆದು ಪ್ರಾರಂಭಿಸಿದ ಆಲೆಮನೆ ಕಬ್ಬು ಬೆಳೆಗಾರರಿಗೆ ಲಾಭ ತಂದು ಕೊಟ್ಟಿದೆ. ಪರಿಣಾಮವಾಗಿ ಹಾನಗಲ್ ತಾಲೂಕಿನಲ್ಲೇ 25 ಕ್ಕೂ ಅಧಿಕ ಆಲೆಮನೆಗಳಿವೆ.
ಬೆಲ್ಲ ತಯಾರಿಸುವ ವಿಧಾನ: ರೈತರು ಜಮೀನಿನಿಂದ ತಂದ ಕಬ್ಬಿನಿಂದ ಹಾಲು ತೆಗೆಯಲಾಗುತ್ತದೆ. ನಂತರ ಕೊಪ್ಪರಿಗೆಯಲ್ಲಿ ಬಿಸಿ ಮಾಡಿ ಅದರಲ್ಲಿನ ತ್ಯಾಜ್ಯವನ್ನು ತೆಗೆಯಲಾಗುತ್ತದೆ. ಅಲ್ಲಿ ಮತ್ತಷ್ಟು ಶಾಖದಲ್ಲಿ ಕುದಿಯುವ ಕಬ್ಬಿನ ಹಾಲನ್ನು ತೆಗೆದು ಮೂರನೆಯ ಕೊಪ್ಪರಗಿ ಹಾಕಿ, ಬೆಲ್ಲದ ಹದ ಬರುವವರಿಗೆ ಕಬ್ಬಿನ ಹಾಲನ್ನು ಕಾಯಿಸಲಾಗುತ್ತದೆ. ಬಳಿಕ ಮೂರನೆಯ ಕೊಪ್ಪರಗಿಯಿಂದ ಬೆಲ್ಲದ ಪಾಕವನ್ನು ಕಲ್ಲಿನ ಚೌಕಟ್ಟಿನಲ್ಲಿ ಹಾಸಿ, 15 ನಿಮಿಷ ಹಾಗೆಯೇ ಬಿಟ್ಟರೆ ಬೆಲ್ಲ ರೆಡಿ. ಈ ರೀತಿ ತಯಾರಿಸಿದ ಬೆಲ್ಲವನ್ನು ಬಕೆಟ್ನಲ್ಲಿ ಕಟ್ಟಿಗೆ ಚೌಕಗಳಲ್ಲಿ ಹಾಕುತ್ತಾರೆ.