ಕರಗಿದ ಚಿನ್ನದಾಸೆ, ಕಂಚಿಗಾಗಿ ಹೋರಾಟ: ಶೂಟೌಟ್​ ವಿವಾದದಲ್ಲಿ ಸೋತ ಮಹಿಳಾ ಹಾಕಿ ತಂಡ

ಬರ್ಮಿಂಗ್​ಹ್ಯಾಮ್​(ಯುಕೆ):ಕಾಮನ್​ವೆಲ್ತ್​ ಗೇಮ್ಸ್​ನಲ್ಲಿ ಮಹಿಳಾ ಹಾಕಿ ತಂಡ ನಿರಾಸೆ ಅನುಭವಿಸಿತು. ಸೆಮಿಫೈನಲ್‌ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ ವಿವಾದಾತ್ಮಕ ಶೂಟೌಟ್‌ನಲ್ಲಿ 0-3 ಅಂತರದಿಂದ ಸೋಲು ಕಂಡಿತು. 1-1 ರಲ್ಲಿ ಸಮಬಲ ಕಂಡಿದ್ದ ಪಂದ್ಯ ಫಲಿತಾಂಶಕ್ಕಾಗಿ ನಡೆದ ಶೂಟೌಟ್​ನಲ್ಲಿ ಭಾರತ ವನಿತೆಯರು ಗೋಲು ಗಳಿಸುವಲ್ಲಿ ಯಶಸ್ವಿಯಾಗಲಿಲ್ಲ. ಫೈನಲ್​ ತಲುಪುವ ಮೂಲಕ ಚಿನ್ನ, ಬೆಳ್ಳಿ ಸಾಧನೆ ಮಾಡುವ ಗುರಿಯಲ್ಲಿದ್ದ ತಂಡ ಇದಿಗ ಕಂಚಿಗಾಗಿ ನ್ಯೂಜಿಲ್ಯಾಂಡ್​​ ವಿರುದ್ಧ ಆ.7 ರಂದು ಹೋರಾಡಲಿದೆ.

ಭಾರತದ ವನಿತೆಯರು ಎಸಗಿದ ಸಣ್ಣಪುಟ್ಟ ತಪ್ಪುಗಳನ್ನು ಮತ್ತು ಕೆಟ್ಟ ಪಾಸ್‌ಗಳನ್ನು ಆಸ್ಟ್ರೇಲಿಯಾ ಉಪಯೋಗಿಸಿಕೊಂಡಿತು. ಪಂದ್ಯದ 8ನೇ ನಿಮಿಷದಲ್ಲಿ ಭಾರತಕ್ಕೆ ಪೆನಾಲ್ಟಿ ಕಾರ್ನರ್ ಸಿಕ್ಕಿತು. ಗುರ್ಜಿತ್ ಕೌರ್ ಅದನ್ನು ಗೋಲಾಗಿ ಪರಿವರ್ತಿಸುವಲ್ಲಿ ವಿಫಲವಾದರು.

ಬಳಿಕ 10ನೇ ನಿಮಿಷದಲ್ಲಿ ಆಸ್ಟ್ರೇಲಿಯಾದ ರೆಬೆಕಾ ಗ್ರೀನರ್ ಸವಿತಾ ಪೂನಿಯಾರ ತಡೆಗೋಡೆಯನ್ನು ಭೇದಿಸಿ ಗೋಲು ಗಳಿಸಿದರು. ಆಸ್ಟ್ರೇಲಿಯಾದ ಮುನ್ನಡೆ ಭಾರತವನ್ನು ಒತ್ತಡಕ್ಕೆ ದೂಡಿತು. ಮರು ನಿಮಿಷದಲ್ಲೇ ಮತ್ತೊಂದು ಗೋಲು ಗಳಿಸಲು ಮುಂದಾದ ಆಸ್ಟ್ರೇಲಿಯಾಗೆ ಸವಿತಾ ತಡೆಯೊಡ್ಡಿದರು.

ಪಂದ್ಯದ ಎರಡನೇ ಅವಧಿಯ ಮುಕ್ತಾಯಕ್ಕೆ 4 ನಿಮಿಷದ ವೇಳೆ ಭಾರತದ ಸುಶೀಲಾ ಚಾನು ಅವರ ಪಾಸ್ ಅನ್ನು ಕಟಾರಿಯಾ ಗೋಲು ಪೆಟ್ಟಿಗೆ ಸೇರಿಸಿ ಪಂದ್ಯ 1-1 ರಲ್ಲಿ ಸಮಬಲಗೊಳ್ಳುವಂತೆ ಮಾಡಿದರು.

ಶೂಟೌಟ್ ವಿವಾದ:ಪೆನಾಲ್ಟಿ ಶೂಟೌಟ್​ನಲ್ಲಿ ವಿವಾದ ಉಂಟಾಯಿತು. ಆಸ್ಟ್ರೇಲಿಯಾದ ಆಂಬ್ರೋಸಿಯಾ ಮಲೋನ್ ಮೊದಲ ಪೆನಾಲ್ಟಿ ಅವಕಾಶ ಪಡೆದು ಚೆಂಡನ್ನು ಗೋಲಿನೆಡೆಗೆ ದೂಡಿದಾಗ ಅದನ್ನು ಗೋಲ್​ಕೀಪರ್​ ಸವಿತಾ ಯಶಸ್ವಿಯಾಗಿ ತಡೆದರು. ಆದರೆ, ಟೈಮರ್​ ಆರಂಭವಾಗದ ಕಾರಣ ಮತ್ತೊಂದು ಅವಕಾಶ ನೀಡಲಾಯಿತು. ಈ ವೇಳೆ, ಮಲೋನ್ ಅದನ್ನು ಗೋಲಾಗಿ ಪರಿವರ್ತಿಸಿದರು. ಇದು ವಿವಾದಕ್ಕೆ ಕಾರಣವಾಯಿತು.

ಓದಿ:Commonwealth Games Women's Cricket : ಇಂದು ಎರಡು ಸೆಮಿಫೈನಲ್​ ಪಂದ್ಯಗಳು.. ಆಂಗ್ಲರ ವಿರುದ್ಧ ಕಾದಾಟ ನಡೆಸಲಿರುವ ಭಾರತ!