ಅಹಮದಾಬಾದ್ (ಗುಜರಾತ್):ಕ್ರೀಡೆ ಎಲ್ಲರನ್ನೂ ಒಗ್ಗೂಡಿಸುತ್ತದೆ ಎಂಬುದು ಸತ್ಯ. ಇದು ಐಪಿಎಲ್ನಲ್ಲಿ ಸಾಬೀತಾಯಿತು. ಚೆನ್ನೈ ತಂಡದ ನಾಯಕ ಎಂ.ಎಸ್. ಧೋನಿ ಮತ್ತು ಆಲ್ರೌಂಡರ್ ರವೀಂದ್ರ ಜಡೇಜಾ ಮಧ್ಯೆ ಅಸಮಾಧಾನ ಹೊಗೆಯಾಡುತ್ತಿದೆ ಎಂದು ಐಪಿಎಲ್ ಫೈನಲ್ಗೂ ಮುಂದಷ್ಟೇ ದೊಡ್ಡ ಸುದ್ದಿಯಾಗಿತ್ತು. ಆದರೆ, ಅದ್ಭುತ ಗೆಲುವು ಇಬ್ಬರು ದಿಗ್ಗಜರನ್ನು ಒಂದಾಗಿಸಿದೆ. ಚೆನ್ನೈ ಗೆದ್ದಾಗ ಸ್ವತಃ ಧೋನಿಯೇ ಮೈದಾನದಲ್ಲಿ ಜಡೇಜಾರನ್ನು ಎತ್ತಿಕೊಂಡು ಸಂಭ್ರಮಿಸಿದರು. 'ಪ್ರಶಸ್ತಿಯನ್ನು ಧೋನಿಗೆ ಅರ್ಪಿಸುವುದಾಗಿ' ಜಡೇಜಾ ಹೇಳಿದರು.
ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಸೋಮವಾರ ರಾತ್ರಿ ನಡೆದ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2023 ರ ಫೈನಲ್ ಪಂದ್ಯದಲ್ಲಿ ಗುಜರಾತ್ ಟೈಟಾನ್ಸ್ ವಿರುದ್ಧ ಚೆನ್ನೈ ಸೂಪರ್ ಕಿಂಗ್ಸ್ ತಂಡ 5 ವಿಕೆಟ್‌ಗಳ ರೋಚಕ ಗೆಲುವು ಸಾಧಿಸಿತು. ಇದಕ್ಕೆ ಮುಖ್ಯ ಕಾರಣ ಆಲ್ರೌಂಡರ್ ರವೀಂದ್ರ ಜಡೇಜಾ. ಕೊನೆಯ 2 ಎಸೆತಗಳಲ್ಲಿ 1 ಸಿಕ್ಸರ್, ಬೌಂಡರಿಗಳಿಂದ 10 ರನ್ ಬಾರಿಸಿ ಜಯ ತಂದಿತ್ತರು. ಸೋಲಿನ ಸುಳಿಯಲ್ಲಿದ್ದ ತಂಡವನ್ನು ಜಡ್ಡು ಜಾದೂ ಮಾಡಿದಂತೆ ಗೆಲ್ಲಿಸಿಕೊಟ್ಟರು.
ರವೀಂದ್ರ ಜಡೇಜಾ ಮತ್ತು ಮಹೇಂದ್ರ ಸಿಂಗ್ ಧೋನಿ ಮಧ್ಯೆ ಕಳೆದ ಸೀಸನ್ನಿಂದಲೂ ಅಷ್ಟಕ್ಕಷ್ಟೇ ಎಂಬಂತಿತ್ತು. ಕಳೆದ ಬಾರಿ ಚೆನ್ನೈಗೆ ಜಡೇಜಾರನ್ನು ನಾಯಕರನ್ನಾಗಿ ಮಾಡಲಾಗಿತ್ತು. ಆದರೆ, ತಂಡ ಹೀನಾಯ ಪ್ರದರ್ಶನ ನೀಡಿದ್ದರಿಂದ ಜಡೇಜಾ ನಾಯಕತ್ವದ ಮೇಲೆ ದಂಡಿ ಟೀಕೆಗಳು ಬಂದವು. ಇದರಿಂದ ಬೇಸತ್ತ ಜಡ್ಡು ನಾಯಕತ್ವ ತೊರೆದು, ಕೊನೆಯ ಪಂದ್ಯಗಳಿಂದ ಹೊರನಡೆದಿದ್ದರು. ಇದಾದ ಬಳಿಕ ಧೋನಿ ಜತೆಗಿನ ಸಂಬಂಧ ಹಳಸಿದೆ ಎಂದೇ ವಿಶ್ಲೇಷಿಸಲಾಗಿತ್ತು.