ದಕ್ಷಿಣ ಆಫ್ರಿಕಾ ವಿರುದ್ಧ ಭಾರತ ಸರಣಿ ಗೆಲ್ಲುವಲ್ಲಿ ವಿರಾಟ್​ ಪ್ರಮುಖ ಪಾತ್ರ ವಹಿಸಲಿದ್ದಾರೆ: ಜಾಕ್ ಕಾಲಿಸ್

Jacques Kallis talk about Virat Kohli: ದಕ್ಷಿಣ ಆಫ್ರಿಕಾದ ವಿರುದ್ಧದ ಟೆಸ್ಟ್​ ಸರಣಿಯಲ್ಲಿ ವಿರಾಟ್​ ಕೊಹ್ಲಿ ಪ್ರಮುಖ ಪಾತ್ರ ವಹಿಸಲಿದ್ದಾರೆ ಎಂದು ಜಾಕ್ ಕಾಲಿಸ್ ಹೇಳಿದ್ದಾರೆ.

ಜೋಹಾನ್ಸ್‌ಬರ್ಗ್ (ದಕ್ಷಿಣ ಆಫ್ರಿಕಾ): ಏಕದಿನ ವಿಶ್ವಕಪ್​ನಲ್ಲಿ ಟಾಸ್​ ಸ್ಕೋರ್​ ಮಾಡಿದ ವಿರಾಟ್​ ಕೊಹ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್​ ಸರಣಿಯಲ್ಲಿ ಪ್ರಮುಖ ಪಾತ್ರವನ್ನು ನಿರ್ವಹಿಸಲಿದ್ದಾರೆ ಎಂದು ಹರಿಣಗಳ ಪಡೆಯ ಮಾಜಿ ಆಟಗಾರ ಜಾಕ್ ಕಾಲಿಸ್ ಅಭಿಪ್ರಾಯಪಟ್ಟಿದ್ದಾರೆ.

ಭಾರತ ತಂಡ ಮೂರು ಮಾದರಿಯ ಕ್ರಿಕೆಟ್​ ಸರಣಿಯನ್ನು ಆಡಲು ದಕ್ಷಿಣ ಆಫ್ರಿಕಾ ಪ್ರವಾಸವನ್ನು ಕೈಗೊಂಡಿದೆ. ಇದರಲ್ಲಿ ಟೀಮ್​ ಇಂಡಿಯಾ ಮೂರು ಟಿ20, ಮೂರು ಏಕದಿನ ಮತ್ತು 2 ಟೆಸ್ಟ್​ ಪಂದ್ಯವನ್ನು ಆಡಲಿದೆ. ಭಾನುವಾರ ಮೊದಲ ಟಿ20 ಪಂದ್ಯ ಮಳೆಯಿಂದ ರದ್ದಾಗಿದ್ದು, ಎರಡನೇ ಪಂದ್ಯ ಡಿ.12ರಂದು ನಡೆಯಲಿದೆ. ಏಕದಿನ ಪಂದ್ಯಗಳ ನಂತರ ಟೆಸ್ಟ್​ ನಡೆಯಲಿದ್ದು, ಮೊದಲ ಪಂದ್ಯ ಡಿ. 26 ರಿಂದ 30 ವರೆಗೆ ಮತ್ತು ಎರಡನೇ ಪಂದ್ಯ 2024ರ ಜನವರಿ 3 ರಿಂದ 7 ವರೆಗೆ ನಡೆಯಲಿದೆ.

2023-2025ರ ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​ನ ಆವೃತ್ತಿಯ ಎರಡನೇ ಸರಣಿ ಇದಾಗಿದೆ. ಜುಲೈನಲ್ಲಿ ಭಾರತ ವೆಸ್ಟ್​​ ಇಂಡೀಸ್​ ಸರಣಿಯನ್ನು ಆಡಿತ್ತು, ಅಲ್ಲಿ ನಡೆದ ಎರಡು ಪಂದ್ಯದಲ್ಲಿ ಒಂದು ಗೆಲುವು ಮತ್ತು ಡ್ರಾದಿಂದ ಸರಣಿ ಭಾರತದ ವಶವಾಗಿತ್ತು. ಆ ಸರಣಿಯಲ್ಲಿ ವಿರಾಟ್​ ಉತ್ತಮ ಬ್ಯಾಟಿಂಗ್​ ಪ್ರದರ್ಶನ ನೀಡಿದ್ದರು. ಅಲ್ಲದೇ ಇತ್ತೀಚೆಗೆ ಮುಕ್ತಾಯಗೊಂಡ ಏಕದಿನ ವಿಶ್ವಕಪ್​ನಲ್ಲೂ ಭರ್ಜರಿ ಫಾರ್ಮ್​ ಪ್ರದರ್ಶಿಸಿದ್ದಾರೆ. ಅನುಭವಿ ಬ್ಯಾಟರ್​ ವಿರಾಟ್​ ಹರಣಿಗಳ ನಾಡಿನಲ್ಲಿ ಅದೇ ಲಯವನ್ನು ಮುಂದುವರೆಸಿದಲ್ಲಿ ಭಾರತದ ಗೆಲುವು ಖಚಿತ ಎಂದು ಜಾಕ್ ಕಾಲಿಸ್ ಹೇಳಿದ್ದಾರೆ.

ವಿರಾಟ್​ ಆಡಿದರೆ ಭಾರತಕ್ಕೆ ಗೆಲುವು:ಸ್ಟಾರ್​ ಸ್ಪೋರ್ಟ್​ನಲ್ಲಿ ಮಾತನಾಡಿರುವ ಅವರು,"ವಿರಾಟ್​ ದಕ್ಷಿಣ ಆಫ್ರಿಕಾದಲ್ಲಿ ದೊಡ್ಡ ಸರಣಿ ಆಡುತ್ತಾರೆ ಎಂದು ನನಗೆ ಖಾತ್ರಿಯಿದೆ. ಕೊಹ್ಲಿ ಉತ್ತಮ ಫಾರ್ಮ್‌ನಲ್ಲಿದ್ದಾರೆ. ಭಾರತಕ್ಕೆ ಸಹಾಯ ಮಾಡುವಲ್ಲಿ ಅವರು ಪ್ರಮುಖ ಪಾತ್ರ ವಹಿಸುತ್ತಾರೆ ಎಂದು ನಾನು ಭಾವಿಸುತ್ತೇನೆ. ಭಾರತ ಇಲ್ಲಿ ಸರಣಿ ಗೆಲ್ಲಬೇಕಾದರೆ, ವಿರಾಟ್​ ಉತ್ತಮ ಪ್ರದರ್ಶನ ನೀಡಲೇಬೇಕು. ವಿರಾಟ್​ ಯಾವುದೇ ದೇಶದ ವಿರುದ್ಧ, ಯಾವುದೇ ನೆಲದಲ್ಲಿ ಎದುರಾಳಿ ತಂಡಕ್ಕೆ ಬಲಿಷ್ಟ ಪೈಪೋಟಿ ನೀಡುತ್ತಾರೆ. ಇಲ್ಲಿನ ಮೈದಾನಗಳ ಅರಿವೂ ಅವರಿಗಿದೆ, ಇಲ್ಲಿ ಯಶಸ್ಸನ್ನು ಕಂಡಿದ್ದಾರೆ" ಎಂದಿದ್ದಾರೆ.

ವಿರಾಟ್ ದಕ್ಷಿಣ ಆಫ್ರಿಕಾದ ವಿರುದ್ಧ ರೆಡ್​ ಬಾಲ್​ ಕ್ರಿಕೆಟ್​ನಲ್ಲಿ ಉತ್ತಮ ಅಂಕಿ - ಅಂಶವನ್ನು ಹೊಂದಿದ್ದಾರೆ. 35 ವರ್ಷ ವಯಸ್ಸಿನ ವಿರಾಟ್​ ಟೆಸ್ಟ್​ನಲ್ಲಿ ಗಳಿಸಿದ 29 ಟೆಸ್ಟ್ ಶತಕಗಳ ಪೈಕಿ ಎರಡು ಹರಿಣಗಳ ವಿರುದ್ಧವೇ ದಾಖಲಾಗಿದೆ. ಅದೂ ದಕ್ಷಿಣ ಆಫ್ರಿಕಾ ನೆಲದಲ್ಲೇ ಅವರ ಶತಕ ದಾಖಲಾಗಿದೆ. ಹರಿಣಗಳ ಪಡೆಯ ವಿರುದ್ಧ ವಿರಾಟ್​ 50ಕ್ಕೂ ಹೆಚ್ಚಿನ ಸರಾಸರಿಯಲ್ಲಿ ಬ್ಯಾಟಿಂಗ್​ ಮಾಡಿದ್ದಾರೆ. ಒಟ್ಟಾರೆ ದಕ್ಷಿಣ ಆಫ್ರಿಕಾದಲ್ಲಿ 7 ಟೆಸ್ಟ್​ ಪಂದ್ಯಗಳನ್ನು ಆಡಿರುವ ಕಿಂಗ್​ ಕೊಹ್ಲಿ ಎರಡು ಶತಕ, 5 ಅರ್ಧಶತಕಗಳಿಂದ 719 ರನ್​ ಕಲೆಹಾಕಿದ್ದಾರೆ.

ವಿರಾಟ್​ ಸ್ಫೂರ್ತಿಯ ಸೆಲೆ:"ವಿರಾಟ್​ ಕೊಹ್ಲಿ ಅವರ ಆಟ ಯುವ ಆಟಗಾರರಿಗೆ ಮಾತ್ರ ಅಲ್ಲದೇ ಅನುಭವಿ ಆಟಗಾರನಿಗೂ ವಿಷೇಶ ಜ್ಞಾನ ನೀಡುತ್ತದೆ. ಆಟದ ಪರಿಸ್ಥಿತಿಗೆ ಹೊಂದಿಕೊಂಡು ಬ್ಯಾಟಿಂಗ್​ ಮಾಡುವ ಅವರ ಸಾಮರ್ಥ್ಯ ಮತ್ತು ತಂಡವನ್ನು ನಿಭಾಯಿಸುವ ರೀತಿ ಎಲ್ಲರಿಗೂ ಕಲಿಕೆ ಆಗಲಿದೆ. ಯುವ ಆಟಗಾರರಿಗೆ ಅವರೊಂದು ಸ್ಫೂರ್ತಿ" ಎನ್ನುತ್ತಾರೆ ಕಾಲಿಸ್. ವಿರಾಟ್​ ಕೊಹ್ಲಿ ಯುವಕನಾಗಿದ್ದಾಗ ಆರ್​ಸಿಬಿಯಲ್ಲಿ ಕಾಲಿಸ್​ ಜೊತೆಗೆ ಮೈದಾನವನ್ನು ಹಂಚಿಕೊಂಡಿದ್ದರು. ಹೀಗಾಗಿ ಜಾಕ್​ ವಿರಾಟ್​ ಅವರನ್ನು ಹತ್ತಿರದಿಂದ ಬಲ್ಲರು.

ಕಳೆದ ಬಾರಿ ಭಾರತವು ದಕ್ಷಿಣ ಆಫ್ರಿಕಾಕ್ಕೆ ಪ್ರಯಾಣಿಸಿದಾಗ 2-1 ಸರಣಿ ಸೋಲಿಗೆ ಶರಣಾಗಿತ್ತು. ಹೀಗಾಗಿ ಕಾಲಿಸ್ ದಕ್ಷಿಣ ಆಫ್ರಿಕಾದಲ್ಲಿ ಭಾರತ ಕಠಿಣ ಸವಾಲನ್ನು ಎದುರಿಸಲಿದೆ ಎಂದಿದ್ದಾರೆ. "ಇದು ಉತ್ತಮ ಭಾರತೀಯ ತಂಡ ಆದರೆ ದಕ್ಷಿಣ ಆಫ್ರಿಕಾವನ್ನು ತವರು ನೆಲದಲ್ಲಿ ಸೋಲಿಸುವುದು ಕಠಿಣವಾಗಿದೆ. ಸೆಂಚುರಿಯನ್ ದಕ್ಷಿಣ ಆಫ್ರಿಕಾಕ್ಕೆ ಮತ್ತು ನ್ಯೂಜಿಲ್ಯಾಂಡ್ಸ್ ಭಾರತಕ್ಕೆ ಹೊಂದಿಕೆ ಆಗುವಂತಿದೆ. ಇದು ಉತ್ತಮ ಸರಣಿ ಆಗಲಿದೆ, ನಿಕಟ ಹೋರಾಟವನ್ನು ನೋಡಬಹುದು" ಎಂದು ಹೇಳಿದರು.

ಇದನ್ನೂ ಓದಿ:ಬಿಸಿಸಿಐ ಎಷ್ಟು ಶ್ರೀಮಂತ ಕ್ರಿಕೆಟ್​ ಸಂಸ್ಥೆ ಎಂಬುದು ಗೊತ್ತಾ?: ಇದನ್ನು ಮೀರಿಸಲು ಸಾಧ್ಯವೇ ಇಲ್ಲ..!