ಬಾಲಿವುಡ್ ನಟ ಆದಿತ್ಯ ರಾಯ್ ಕಪೂರ್ ಅವರು ಸದ್ಯ ತಮ್ಮ ವೆಬ್ ಸೀರಿಸ್ 'ದಿ ನೈಟ್ ಮ್ಯಾನೇಜರ್‌' ಯಶಸ್ಸಿನಲೆಯಲ್ಲಿ ತೇಲುತ್ತಿದ್ದಾರೆ. ಅಲ್ಲದೇ ನಟಿ ಅನನ್ಯಾ ಪಾಂಡೆ ಜೊತೆ ಡೇಟಿಂಗ್ ವಿಚಾರವಾಗಿಯೂ ಸದ್ದು ಮಾಡುತ್ತಿದ್ದಾರೆ. ಇತ್ತೀಚೆಗೆ ಪೋರ್ಚುಗಲ್‌ನಿಂದ ಹಿಂತಿರುಗಿರುವ ನಟ, ನಟನೆ ಮಾತ್ರವಲ್ಲದೇ ಡೇಟಿಂಗ್ ವಿಚಾವಾಗಿಯೂ ಸುದ್ದಿಯಲ್ಲಿದ್ದು ಈ ಬಗ್ಗೆ ಮಾತನಾಡಿದ್ದಾರೆ. ಕಳೆದ ತಿಂಗಳು ಯೂರೋಪ್‌ನಿಂದ ರೂಮರ್ಸ್ ಲವ್ ಬರ್ಡ್ಸ್ ಫೋಟೋಗಳು ಹೊರ ಬಂದವು. ಇದೀಗ ಅನನ್ಯಾ ಪಾಂಡೆ ಜೊತೆಗಿನ ವೈರಲ್ ಫೋಟೋಗಳ ಬಗ್ಗೆ ಆದಿತ್ಯ ರಾಯ್ ಕಪೂರ್ ಮಾತನಾಡಿದ್ದಾರೆ.
ಇತ್ತೀಚಿನ ಸಂದರ್ಶನವೊಂದರಲ್ಲಿ, ಆದಿತ್ಯ ರಾಯ್ ಕಪೂರ್ ಅವರ ಪೋರ್ಚುಗಲ್ ಪ್ರವಾಸದ ಬಗ್ಗೆ ಕೇಳಲಾಯಿತು. ಅದಕ್ಕೆ ಪ್ರತಿಕ್ರಿಯಿಸಿದ ನಟ, ವಿಶ್ರಾಂತಿ ಪಡೆಯಲು ವಿರಾಮದ ಅಗತ್ಯವಿದೆ ಎಂದು ತಿಳಿಸಿದರು. ಆದರೆ ಮುಂಬೈ ಮಳೆಯನ್ನು ಮಿಸ್ ಮಾಡಿಕೊಂಡಿರುವುದಾಗಿಯೂ ತಿಳಿಸಿದರು.
"ನನಗೆ ಬಿಡುವು ಬೇಕಿತ್ತು. ನಾನು ಮುಂಬೈ ಮಳೆಯನ್ನು ಇಷ್ಟಪಡುತ್ತೇನೆ. ಪೋರ್ಚುಗಲ್ ಪ್ರವಾಸ ವೇಳೆ ಮಾನ್ಸೂನ್ ಅನ್ನು ಮಿಸ್ ಮಾಡಿಕೊಂಡಿದ್ದೆ. ಆದ್ರೆ ನಾನು ಹಿಂತಿರುಗಿದ ಕ್ಷಣದಿಂದ, ಸುಮಾರು ಒಂದು ವಾರದಿಂದ ಎಡೆಬಿಡದೆ ಮಳೆ ಸುರಿಯುತ್ತಿದೆ" ಎಂದು ನಟ ಆದಿತ್ಯ ರಾಯ್ ಕಪೂರ್ ತಿಳಿಸಿದರು.
ನಟಿ ಅನನ್ಯಾ ಪಾಂಡೆ ಜೊತೆಗಿನ ಕೆಲ ಫೋಟೋಗಳು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿರುವ ಬಗ್ಗೆ ನೆನಪಿಸಿದಾಗ, "ನಾನು ಸಾಮಾಜಿಕ ಮಾಧ್ಯಮದಲ್ಲಿ ಹೆಚ್ಚು ಸಕ್ರಿಯವಾಗಿಲ್ಲದಿರುವುದು ಒಂದೊಳ್ಳೆ ವಿಚಾರ. ಆದರೆ, ಈ ವೈರಲ್ ಫೋಟೋ ವಿಚಾರ ನನ್ನ ಗಮನಕ್ಕೆ ಬಂದಿದೆ" ಎಂದಷ್ಟೇ ಉತ್ತರಿಸಿದರು.