ಶಭಾಷ್​ ಮಿಥು ಟ್ರೈಲರ್​ ಬಿಡುಗಡೆ: ತಾಪ್ಸಿ ಪನ್ನು ಹೇಳಿದ್ದು ಹೀಗೆ!

ಭಾರತ ಮಹಿಳಾ ಕ್ರಿಕೆಟ್ ತಂಡದ ಮಾಜಿ ನಾಯಕಿ 'ಮಿಥಾಲಿ ರಾಜ್' ಅವರ ಜೀವನಾಧಾರಿತ 'ಶಭಾಷ್ ಮಿಥು' ಚಿತ್ರದ ಟ್ರೈಲರ್ ಬಿಡುಗಡೆಯಾಗಿದೆ. ಜುಲೈ 15 ರಂದು ಥಿಯೇಟರ್‌ಗಳಲ್ಲಿ ಬಿಡುಗಡೆಯಾಗಲಿರುವ ಈ ಚಿತ್ರವು ಬಾಲ್ಯದಿಂದಲೂ ಪುರುಷ ಪ್ರಧಾನ ಕ್ರೀಡೆಯಲ್ಲಿ ತನ್ನ ಸ್ಥಾನವನ್ನು ಗಳಿಸಿದ ಕ್ರಿಕೆಟರ್ ಆಗುವವರೆಗೆ ಮಿಥಾಲಿ ರಾಜ್ ಅವರ ಹೋರಾಟವನ್ನು ಗುರುತಿಸುತ್ತದೆ.

ಕ್ರಿಕೆಟ್​ ಆಟಗಾರ್ತಿ ಮಿಥಾಲಿ ರಾಜ್ ಅವರ ಜೀವನಾಧಾರಿತ 'ಶಭಾಷ್ ಮಿಥು' ಚಿತ್ರದ ಟ್ರೈಲರ್ ಬಿಡುಗಡೆಯಾಗಿದ್ದು, ಸಖತ್​ ಆಗಿ ಮೂಡಿ ಬಂದಿದೆ. ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಮಿಥಾಲಿ ರಾಜ್ 23 ವರ್ಷಗಳ ವೃತ್ತಿಜೀವನವನ್ನು ಹೊಂದಿದ್ದಾರೆ. ಅವರು ಏಕದಿನದಲ್ಲಿ 10,000 ಕ್ಕೂ ಹೆಚ್ಚು ರನ್ ಗಳಿಸಿದ್ದು, ಅನೇಕ ದಾಖಲೆಗಳನ್ನು ಮುರಿದಿದ್ದಾರೆ. ಪುರುಷ ಪ್ರಾಬಲ್ಯದ ಕ್ರೀಡೆಯಾದ ಕ್ರಿಕೆಟ್‌ನಲ್ಲಿ ವೃತ್ತಿಜೀವನ ರೂಪಿಸಲು ತಾಪ್ಸಿ ಪನ್ನು ಅಲಿಯಾಸ್​ ಮಿಥು ತನ್ನ ಪೋಷಕರಿಂದ ಆಯ್ಕೆಗಾರರವರೆಗೆ ಹೇಗೆ ಹೋರಾಡಬೇಕು ಎಂಬುದನ್ನು ಟ್ರೇಲರ್​ನಲ್ಲಿ ತೋರಿಸಲಾಗಿದೆ.

ಚಿತ್ರದ ಟ್ರೇಲರ್ ಅನ್ನು ಹಂಚಿಕೊಂಡ ತಾಪ್ಸಿ ಪನ್ನು, 'ಈಗಾಗಲೇ ನಿಮಗೆ ಹೆಸರು ತಿಳಿದಿದೆ. ಮಿಥಾಲಿಯವರನ್ನು ಲೆಜೆಂಡ್​ ಆಗಿ ಮಾಡಿರುವ ಅವರ ಹಿಂದಿನ ಕಥೆಯನ್ನು ನೋಡಲು ನೀವು ಸಿದ್ಧರಾಗಿ. ‘ಜಂಟಲ್‌ಮ್ಯಾನ್ಸ್ ಗೇಮ್’ನಿಂದ ಪ್ರಭಾವಿತವಾಗುವ ಮಹಿಳೆಯ ಕಥೆಯನ್ನು ನಿಮ್ಮ ಮುಂದೆ ತರಲು ಮುಂದಾಗಿದ್ದೇವೆ. ಶಭಾಷ್ ಮಿಥು ಜುಲೈ 15 ಎಂದು ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.

ಓದಿ:ಮಿಥಾಲಿಯಾಗಿ ತೆರೆಗೆ ಅಪ್ಪಳಿಸಲಿದ್ದಾರೆ ತಾಪ್ಸಿ; 'ಶಹಬ್ಬಾಸ್​ ಮಿಥು' ಟ್ರೈಲರ್​ ಬಿಡುಗಡೆ

‘ಶಭಾಶ್ ಮಿಥು’ ಜೀವನಚರಿತ್ರೆಯ ಕ್ರೀಡಾ ನಾಟಕ ಚಲನಚಿತ್ರವಾಗಿದ್ದು, ಶ್ರೀಜಿತ್ ಮುಖರ್ಜಿ ನಿರ್ದೇಶಿಸಿದ್ದಾರೆ. ಈ ಚಿತ್ರವನ್ನು ವಯಾಕಾಮ್ 18 ಸ್ಟುಡಿಯೋಸ್ ನಿರ್ಮಿಸಿದೆ. ಈ ಚಿತ್ರವು ಭಾರತ ಮಹಿಳಾ ರಾಷ್ಟ್ರೀಯ ಕ್ರಿಕೆಟ್ ತಂಡದ ಮಾಜಿ ನಾಯಕಿ ಮಿಥಾಲಿ ರಾಜ್ ಅವರ ಜೀವನವನ್ನು ಆಧರಿಸಿದೆ. ಇದರಲ್ಲಿ ತಾಪ್ಸಿ ಪನ್ನು ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಚಲನಚಿತ್ರ ನಿರ್ಮಾಪಕ ಶ್ರೀಜಿತ್ ಮುಖರ್ಜಿ ನಿರ್ದೇಶಿಸಿದ ಮತ್ತು ಪ್ರಿಯಾ ಅವೆನ್ ಬರೆದಿರುವ ಈ ಚಲನಚಿತ್ರವು ಮಿಥಾಲಿ ರಾಜ್ ಅವರ ಜೀವನದ ಏಳು -ಬೀಳುಗಳು, ವೈಫಲ್ಯಗಳು ಮತ್ತು ಉತ್ಸಾಹದ ಕ್ಷಣಗಳನ್ನು ಒಳಗೊಂಡಿದೆ.