ಬೆಂಗಳೂರು: ಪ್ರಸಕ್ತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಕಂಪನಿಯು 2 ಕೋಟಿ ರೂಪಾಯಿ ನಿವ್ವಳ ಲಾಭ ಗಳಿಸಿದ್ದು, 2,416 ಕೋಟಿ ರೂಪಾಯಿ ಆದಾಯ ಬಂದಿದೆ ಎಂದು Zomato ಹೇಳಿಕೊಂಡಿದೆ. ಆದಾಯವು ಹಿಂದಿನ ವರ್ಷಕ್ಕಿಂತ ಶೇಕಡಾ 70.9 ರಷ್ಟು ಹೆಚ್ಚಾಗಿದೆ. ಹಣದುಬ್ಬರ ಕಡಿಮೆಯಾಗಿದ್ದರಿಂದ ಮತ್ತು ಕಂಪನಿಯ ಲಾಯಲ್ಟಿ ಪ್ರೋಗ್ರಾಮ್ಗಳ ಕಾರಣದಿಂದ ಆದಾಯ ಹೆಚ್ಚಾಗಿದೆ ಎಂದು ಕಂಪನಿ ತಿಳಿಸಿದೆ.
ಕಳೆದ ವರ್ಷದ ಇದೇ ತ್ರೈಮಾಸಿಕದಲ್ಲಿ ಜೊಮಾಟೊ 186 ಕೋಟಿ ರೂಪಾಯಿ ನಿವ್ವಳ ನಷ್ಟವನ್ನು ದಾಖಲಿಸಿತ್ತು ಮತ್ತು ಅದರ ಆದಾಯ 1,414 ಕೋಟಿ ರೂಪಾಯಿಗಳಷ್ಟಿತ್ತು. ಸದ್ಯದ ಪರಿಸ್ಥಿತಿಗಳಲ್ಲಿ ಸ್ಟಾರ್ಟಪ್ ಫಂಡಿಂಗ್ ತೀರಾ ಕಡಿಮೆಯಾಗಿದ್ದು, ಇಂಥ ಸಮಯದಲ್ಲಿ ಕಂಪನಿ ಲಾಭ ಗಳಿಸಿದ್ದು ಆಶಾದಾಯಕ ಬೆಳವಣಿಗೆಯಾಗಿದೆ.
ಹಣಕಾಸು ವರ್ಷ 2024 ರಲ್ಲಿ ತ್ರೈಮಾಸಿಕ ನಿವ್ವಳ ಲಾಭ ಗಳಿಸುವ ಬಗ್ಗೆ ಜೊಮ್ಯಾಟೊ ಆಶಾವಾದಿಯಾಗಿದೆ. ಕಂಪನಿಯು ತನ್ನ ಗೆಲುವಿನ ಸರಣಿಯನ್ನು ಮುಂದುವರಿಸಲು ಆಶಿಸುತ್ತಿದೆ. "...ನಮ್ಮ ವ್ಯವಹಾರವು ಮುಂದೆ ಲಾಭದಾಯಕವಾಗಿ ಮುಂದುವರಿಯಲಿದೆ ಎಂದು ನಾವು ನಿರೀಕ್ಷಿಸುತ್ತೇವೆ. ನಾವು ಕನಿಷ್ಠ ಮುಂದಿನ ಒಂದೆರಡು ವರ್ಷಗಳವರೆಗೆ ವರ್ಷದಿಂದ ವರ್ಷಕ್ಕೆ ಶೇಕಡಾ 40 ರಷ್ಟು ಬೆಳವಣಿಗೆಯನ್ನು ದಾಖಲಿಸಲಿದ್ದೇವೆ (ಹೊಂದಾಣಿಕೆಯ ಆದಾಯ)" ಎಂದು ಜೊಮ್ಯಾಟೊ ಸಿಎಫ್ಓ ಅಕ್ಷಾಂತ್ ಗೋಯಲ್ ತಿಳಿಸಿದ್ದಾರೆ.
ಆಗಸ್ಟ್ 3 ರಂದು ಬಿಎಸ್ಇ ಸೆನ್ಸೆಕ್ಸ್ನಲ್ಲಿ ಜೊಮ್ಯಾಟೊ ಶೇರು ರೂ 86.45 ಮಟ್ಟದಲ್ಲಿ ಕೊನೆಗೊಂಡಿದೆ. ಇದು ಹಿಂದಿನ ಮುಕ್ತಾಯಕ್ಕಿಂತ 1.83 ಶೇಕಡಾ ಹೆಚ್ಚಾಗಿದೆ.
ಜೊಮ್ಯಾಟೊ ಇದು ಹತ್ತಿರದ ರೆಸ್ಟೋರೆಂಟ್‌ಗಳು ಮತ್ತು ಹೊಟೇಲ್ಗಳನ್ನು ಹುಡುಕುವ ಅಥವಾ ಆನ್‌ಲೈನ್‌ನಲ್ಲಿ ಆಹಾರವನ್ನು ಆರ್ಡರ್ ಮಾಡುವ ಆ್ಯಪ್ ಆಗಿದೆ. ಜೊಮ್ಯಾಟೊ ಅತ್ಯಂತ ಜನಪ್ರಿಯ ಆನ್‌ಲೈನ್ ಆಹಾರ ವಿತರಣಾ ವ್ಯವಸ್ಥೆಗಳಲ್ಲಿ ಒಂದಾಗಿದೆ, ಸುಮಾರು 22 ದೇಶಗಳಲ್ಲಿ ಬಳಕೆದಾರರನ್ನು ಹೊಂದಿದೆ. ಮತ್ತೊಂದೆಡೆ, ರೆಸ್ಟೋರೆಂಟ್ ಮಾಲೀಕರು ಜೊಮ್ಯಾಟೊ ಅಪ್ಲಿಕೇಶನ್‌ನೊಂದಿಗೆ ನೋಂದಾಯಿಸಿಕೊಳ್ಳುವ ಮೂಲಕ ತಮ್ಮ ಇಂಟರ್ನೆಟ್ನಲ್ಲಿ ತಮ್ಮ ಉಪಸ್ಥಿತಿಯನ್ನು ಹೆಚ್ಚಿಸಬಹುದು.
2008 ರಿಂದ ಈಚೆಗೆ ಜೊಮ್ಯಾಟೊ ಅತ್ಯಂತ ವೇಗವಾಗಿ ಬೆಳೆದಿದೆ ಮತ್ತು ಭಾರತದ ಅತ್ಯಂತ ಯಶಸ್ವಿ ಸ್ಟಾರ್ಟ್‌ಅಪ್‌ಗಳಲ್ಲಿ ಒಂದಾಗಿದೆ. ಹಿಂದಿನ ಗ್ರಾಹಕರ ರೇಟಿಂಗ್‌ಗಳು ಮತ್ತು ಪ್ರತಿಕ್ರಿಯೆಯನ್ನು ಆಧರಿಸಿ ಬಳಕೆದಾರರು ತಮ್ಮ ಆದ್ಯತೆಯ ರೆಸ್ಟೋರೆಂಟ್‌ಗೆ ಫುಡ್ ಆರ್ಡರ್ ಮಾಡಬಹುದು. ಇದು ಬಳಕೆದಾರರಿಗೆ ತುಂಬಾ ಸುಲಭವಾಗಿ ಫುಡ್ ಆರ್ಡರ್ ಮಾಡಲು ಸಹಾಯ ಮಾಡುತ್ತದೆ ಮತ್ತು ವ್ಯಾಪಾರಗಳ ಮಾಲೀಕರಿಗೆ ತಮ್ಮ ಸ್ಥಳೀಯ ಆಹಾರ ವ್ಯಾಪಾರವನ್ನು ಹೊಸ ಎತ್ತರಕ್ಕೆ ಕೊಂಡೊಯ್ಯಲು ಸಹಾಯ ಮಾಡುತ್ತದೆ.
ಜೊಮ್ಯಾಟೊ ಅಪ್ಲಿಕೇಶನ್ ಅನ್ನು ಡೌನ್‌ಲೋಡ್ ಮಾಡಿದ ನಂತರ, ಬಳಕೆದಾರರು ತ್ವರಿತವಾಗಿ ಮತ್ತು ಸುಲಭವಾಗಿ ಲಾಗ್ ಇನ್ ಮಾಡಬಹುದು. ಲಾಗಿನ್‌ಗಾಗಿ ಇಮೇಲ್ ವಿಳಾಸದಂತಹ ಮಾಹಿತಿಯನ್ನು ಹಸ್ತಚಾಲಿತವಾಗಿ ನಮೂದಿಸಬಹುದು ಅಥವಾ ಸೋಶಿಯಲ್ ಲಾಗಿನ್ ಅನ್ನು ಸಹ ಬಳಸಬಹುದು. ಲಾಗ್ ಇನ್ ಮಾಡಿದ ನಂತರ, ಬಳಕೆದಾರರು ಡ್ಯಾಶ್‌ಬೋರ್ಡ್ಗೆ ಹೋಗಿ ಸೇವೆಗಳನ್ನು ಬಳಸಬಹುದು.
ಇದನ್ನೂ ಓದಿ :Kundali GPT: ಇದು ಜಾತಕ ನೋಡಿ ಭವಿಷ್ಯ ಹೇಳುವ ಎಐ ಚಾಟ್ಬಾಟ್; ಬಳಸುವುದು ಹೇಗೆ?
