ನವದೆಹಲಿ: ಭಾರತದ ಸ್ವದೇಶಿ ನಿರ್ಮಿತ ಕಾರ್ವೆಟ್ ಖುಕ್ರಿ ಕ್ಲಾಸ್ ಕ್ಷಿಪಣಿ ವಾಹಕ ನೌಕೆ ಖಂಜಾರ್ ಜುಲೈ 29 ರಿಂದ 31ವರೆಗೆ ಟ್ರಿಂಕೋಮಲಿ ಬಂದರಿಗೆ ಭೇಟಿ ನೀಡಲಿದೆ ಎಂದು ಕೊಲಂಬೊದಲ್ಲಿರುವ ಭಾರತೀಯ ಹೈಕಮಿಷನ್ ಶನಿವಾರ ತಿಳಿಸಿದೆ. ಈ ಪ್ರದೇಶದಲ್ಲಿ ಕಡಲ ಭದ್ರತೆಯ ಸವಾಲುಗಳನ್ನು ಸಮರ್ಥವಾಗಿ ಎದುರಿಸಲು ಮತ್ತು ಶ್ರೀಲಂಕಾ ನೌಕಾಪಡೆಯ ಸಾಮರ್ಥ್ಯವನ್ನು ಹೆಚ್ಚಿಸಲು ಭಾರತ ಮತ್ತು ಶ್ರೀಲಂಕಾ ನಡುವಿನ ಸಹಕಾರದ ದೃಷ್ಟಿಯಿಂದ ಕಾರ್ವೆಟ್ ಖುಕ್ರಿ ಕ್ಲಾಸ್ ಕ್ಷಿಪಣಿ ವಾಹಕ ನೌಕೆ ಖಂಜಾರ್ ಭೇಟಿಯು ಮಹತ್ವದ್ದಾಗಿದೆ.
ಇದೇ ವೇಳೆ ಭಾರತೀಯ ನೌಕಾಪಡೆಯ ಕಮಾಂಡಿಂಗ್ ಆಫೀಸರ್, ಕಮಾಂಡರ್ ಎನ್ವಿಎಸ್ ಫಣಿ ಕುಮಾರ್ ಅವರು ಈಸ್ಟರ್ನ್ ನೇವಲ್ ಕಮಾಂಡರ್ರನ್ನು ಭೇಟಿ ಮಾಡಲಿದ್ದಾರೆ. ಇದಲ್ಲದೇ, ವಿಬಿಎಸ್ಎಸ್, ಗನ್ನರಿ ಮತ್ತು ಕ್ಷಿಪಣಿ ಕಾರ್ಯಾಚರಣೆಗಳ ಕುರಿತು ವಿವಿಧ ವೃತ್ತಿಪರರೊಂದಿಗೆ ಸಂವಾದಗಳನ್ನು ನಡೆಸಲಾಗುತ್ತಿದೆ. ಇದಕ್ಕೆ ಮಿಲಿಟರಿ ಮತ್ತು ಸರ್ಕಾರದ ಹಿರಿಯ ಅಧಿಕಾರಿಗಳಿಗೆ ಆಹ್ವಾನವನ್ನು ನೀಡಲಾಗಿದೆ. ನಂತರ, ಜುಲೈ 31 ರಂದು ಟ್ರಿಂಕೋಮಲಿಯಲ್ಲಿ ಶ್ರೀಲಂಕಾ ನೌಕಾಪಡೆಯ ಹಡಗಿನೊಂದಿಗೆ ಸಾಗರ ಸಹಭಾಗಿತ್ವದ ಜಂಟಿ ಸಮರಭ್ಯಾಸವನ್ನು ಸಹ ಯೋಜಿಸಲಾಗಿದೆ.
ಜನರ ನಡುವಿನ ಸಂಪರ್ಕವನ್ನು ಮತ್ತಷ್ಟು ಹೆಚ್ಚಿಸಲು ಮತ್ತು ಭಾರತೀಯ ನೌಕಾಪಡೆಯ ಸಾಮರ್ಥ್ಯಗಳ ಬಗ್ಗೆ ಜನರಿಗೆ ಪರಿಚಯಿಸಲು, ಶಾಲಾ ಮಕ್ಕಳು ಖಂಜಾರ್ ನೌಕೆ ವೀಕ್ಷಣೆಗೆ ಅವಕಾಶ ಮಾಡಿಕೊಡಲಾಗಿದೆ. ಇದಲ್ಲದೇ, ಸಾರ್ವಜನಿಕರಿಗೆ ಜುಲೈ 30 ರಂದು ಟ್ರಿಂಕೋಮಲಿ ಬಂದರಿನಲ್ಲಿ ನೌಕೆ ವೀಕ್ಷಣೆಗೆ ಅವಕಾಶ ಮಾಡಿಕೊಡಲಾಗಿದೆ. ಈ ನೌಕೆಯಲ್ಲಿ ಯೋಗ ಸೆಷನ್, ಬೀಚ್ ಕ್ಲೀನಿಂಗ್ ಮತ್ತು ವಿಶೇಷ ತರಗತಿಗಳನ್ನು ಸಹ ನಡೆಸಲಾಗುತ್ತದೆ.