अंकिता भंडारी कु शव बरामद: अंकिता भंडारी हत्या मामला मा पुलिस का हाथ बड़ी कामयाबी लगी. पुलिस ने चीला शक्ति नहर बटी अंकिता कु शव बरामद करी. ज्या का बाद शव थै पोस्टमार्टमै एम्स ऋषिकेश भेजे गी. पोस्टमॉर्टम मा अंकिता का शरीर पर कई जख्मूं का निशान मिलिन. ये दौरान एम्स ऋषिकेश का भैर लोखूं की भीड़ जुटी रै.
पुलकित आर्यै फैक्ट्री मा आग: अंकिता भंडारी हत्या (ankita bhandari murder) मामला मा लोखूं कु आक्रोश कम नी होंणू च. लोग बीजेपी नेता का नौना पुलकित आर्य का खिलाफ विरोध प्रदर्शन कन्ना छन. आज ग्रामीणूं न पुलकित आर्य (Bjp leader son uttarakhand resort case) फैक्ट्री मा आग लगै. (Angry villagers set fire factory). दगड़ा मा ही वनंत्रा रिजॉर्ट मा भी तोड़फोड़ करी. लोखूं न आरोप्यूं थै कड़ी से कड़ी सजा देणौ मांग करी.
अंकिता भंडारी हत्या मामला मा BJP न करी कार्रवाई:अंकिता भंडारी हत्याकांड मा मुख्यमंत्री पुष्कर सिंह धामी न बड़ू एक्शन लिनी. ये मामला मा मुख्य आरोपी पुलकित आर्य का बड़ा भै अंकित आर्य थै पिछड़ा वर्ग आयोग का उपाध्यक्ष पद से हटये गी. दगड़ा मा ही बीजेपी न पुलकित आर्य का पिता विनोद आर्य और भाई अंकित आर्य थै पार्टी बटी भी निकालेली.
हिमाचल चुनाव मा प्रचार करला उत्तराखंड का नेता: हिमाचल विधानसभा चुनाव मा उत्तराखंड भाजपा का नेता चुनाव प्रचार करला. ये मैना का आखिर मा 49 नेता हिमाचल जाला. उत्तराखंड का यू वरिष्ठ और अनुभवी नेता हिमाचल मा चुनाव प्रबंधनै कमान संभालला. केंद्रीय नेतृत्व न हिमाचल प्रदेशै 19 विधानसभा सीटूं पर उत्तराखंड का नेताऊं थै जिम्मेदारी दिनी.
शंकराचार्य पर छिड़ी रार:शारदा पीठ और ज्योतिष पीठ का शंकराचार्य स्वामी स्वरूपानंद सरस्वती का ब्रह्मलीन होंणा बाद नया उत्तराधिकारी की घोषणा ह्वे गी, लेकिन ई घोषणा कु अखाड़ा परिषद का अध्यक्ष महंत रविंद्र पुरी न विरोध करी. ऊंन बोली शंकराचार्य की घोषणा थै लेकी जल्दबाजी किलै करै गी, बिना कै अखाड़ै सहमति का या घोषणा करे गी, ऊंन शंकराचार्य अविमुक्तेश्वरानंद सरस्वती थै शंकराचार्य मणन से इनकार करी..
देहरादून मा आयोजित होली मैराथन: सरदार वल्लभ भाई पटेलै जंयती पर उत्तराखंड पुलिस रन फॉर यूनिटी कु आयोजन करली. यां का तहत देहरादून मा मैराथन कु आयोजन किये जालू. ई मैराथन मा 21 किलोमीटर और 10 किलोमीटरै दौड़ करये जाली. यां मा विजेता प्रतिभागियूं थै ₹10 लाख रुप्या की राशि दिये जाली. 30 अक्टूबरौ उत्तराखंड पुलिस देहरादून मैराथन कु चौथूं संस्करण आयोजित करली.
चारधाम यात्रा मा बढणी यात्र्यूं की संख्या:चारधाम यात्रा मा एक बार फिर से तीर्थयात्रियूं की संख्या बढ़ण लग गी. हालांकि मौसम खराब होंण का कारण यात्रियूं थै परेशानी भी होंणी च. यां का बाद भी बदरीनाथ, केदारनाथ, गंगोत्री व यमुनोत्री धाम मा यात्र्यूं की संख्या दिनों-दिन बढणी च. अक्टूबर मैना मा दीपावली तक हेली सेवा की बुकिंग भी फुल ह्वे गीन.
उत्तराखंड मा कोरोना का मामला:उत्तराखंड मां धीरे-धीरे कोरोना का मामलौ मा कमी औंणी च. सरकार और स्वास्थ्य विभाग यां कु थै लेकी लगातार प्रयास कन्ना छन. आज प्रदेश मा कोरोना का 33 नया मामला समणि ऐनी, ज्या का बाद प्रदेश मा कोरोना संक्रमितू की संख्या 104,055 ह्वे गी, जबकि यां से मन्न वालौ की संख्या 332 च.
