Vaccination Update: 3 દિવસ વેક્સિન પ્રક્રિયા રહી બંધ, 2,200 સેન્ટરો પર વેક્સિનેશન ફરી શરૂ થાય તેવી શક્યતા

રાજ્યભરમાં ત્રણ દિવસ વેક્સિનની પ્રક્રિયા બંધ રહી છે, ત્યારે 10 જૂલાઈથી વેક્સિનેશન શરૂ થાય તે પ્રકારની શક્યતા રહેલી છે. આગામી કોર કમિટીની બેઠકમાં આ અંગે નિર્ણય લેવાશે. હેલ્થ વિભાગ તરફથી મળતા ડેટાને જોતા જિલ્લાઓ કરતાં કોર્પોરેશન વિસ્તારમાં વેક્સિનના ડોઝ વધુ અપાયા છે. હજુ પણ રાજ્ય સરકારના ટાર્ગેટ પ્રમાણે 2 કરોડથી વધુ લોકોનું વેક્સિનેશન બાકી છે.

• 9 જૂલાઈએ જ સરકારને મળ્યો નવો જથ્થો
• જિલ્લાઓ કરતા કોર્પોરેશન વિસ્તારમાં વેક્સિનના ડોઝ વધુ અપાયા
• હાલ 2,100થી 2,200 સેન્ટરો પરથી જ અપાશે વેક્સિન

ગાંધીનગર: મમતા ડેની કામગીરીને ધ્યાનમાં રાખી તારીખ 7 જુલાઇથી ગુજરાતભરમાં વેક્સિનેશન કામગીરી બંધ કરવામાં આવી હતી. જે બાદ શુક્રવાર સુધી આ પ્રક્રિયા બંધ જ રહી છે. જોકે સૂત્રોના જણાવ્યા અનુસાર, સરકાર પાસે 9 જૂલાઈએ વેક્સિનનો નવો જથ્થો આવ્યો હોવાથી વેક્સિનની પ્રક્રિયા 10 જૂલાઈથી શરૂ થાય તે પ્રકારની શક્યતાઓ રહેલી છે. જો કે, વેક્સિનનો જથ્થો જરૂરિયાત પ્રમાણમાં ઉપલબ્ધ ન હોવાથી 2,100થી 2,200 વેક્સિન સેન્ટરો બંધ છે. આ પહેલા વધારીને 5,000 વેક્સિનેશન સેન્ટર શરૂ કરવાની વાત હતી, પરંતુ અત્યારે વેક્સિનનો જથ્થો પૂરતો ન હોવાથી વધુ સેન્ટરો હાલ પૂરતા વધારવામાં નહીં આવે.

આ પણ વાંચો: રાજ્યમાં ત્રણ દિવસથી વેક્સિનેશન બંધ, વેપારીઓને રસી મુકાવામાં હાલાકી

ગુજરાત સરકાર પાસે આત્યાર સુધી અઢી લાખથી વધુ વેક્સિનનો જથ્થો

ગુજરાત સરકાર પાસે વેક્સિનેશન પ્રક્રિયા ત્રણ દિવસ બંધ રહે એ પહેલા અઢી લાખ જેટલો જથ્થો હતો. પરંતુ મમતા દિવસને ધ્યાનમાં રાખી વેક્સિનેશન પ્રક્રિયા બંધ રહી હતી. જે બાદ અન્ય બે દિવસ પણ આ કામગીરી બંધ રહી છે. 9મી જૂલાઈએ જ નવો જથ્થો રાજ્ય સરકારને મળ્યો હોવાનું પણ સૂત્રો દ્વારા જાણવા મળ્યું હતું. જો કે આ પહેલા 2.5 લાખથી વધુ વેક્સિનનો જથ્થો હોવાનું પણ જાણવા મળ્યું છે. જો કે, કોર કમિટીની બેઠકમાં જ આ અંગે નિર્ણય લેવાશે કે, 10 જૂલાઈથી વેક્સિનેશન પ્રક્રિયા શરૂ કરવી કે નહીં. જો કે, ગુજરાત સરકાર પણ વેક્સિનનો જથ્થો પુરતા પ્રમાણમાં એકત્રિત કરી રહી છે. જેથી 9 જૂલાઈએ વેક્સિન મળી હોવાથી રાજ્યના 33 જિલ્લાઓ તેમજ કોર્પોરેશન વિસ્તારમાં વેક્સિનેશન પ્રક્રિયા વેગવંતી બને તેવી શક્યતા છે.

8 મહાનગરપાલિકાઓ અને જિલ્લામાં અત્યાર સુધી કેટલુ વેક્સિનેશન?

મહાનગરપાલિકા	જિલ્લા	કોર્પોરેશન
અમદાવાદ	7,40,078	31,13,692
વડોદરા	7,23,307	12,96,146
સુરત	6,23,114	22,70,688
રાજકોટ	6,76,735	9,39,937
જૂનાગઢ	4,68,944	17,2,076
ગાંધીનગર	5,13,034	3,11,988
જામનગર	4,0,2,808	3,48,510
ભાવનગર	5,72,010	3,48,180

ગુજરાત સરકારનો 4 કરોડ 90 લાખ લોકોને વેક્સિન આપવાનો ટાર્ગેટ

ગુજરાત સરકારનો 18 વર્ષથી વધુ વયના લોકોને વેક્સિન આપવાનો ટાર્ગેટ 18થી વધુ વયના 4 કરોડ 90 લાખ લોકોને છે. ત્યારે અત્યાર સુધી 2,73,31,752 લોકોને વેક્સિનનો પહેલો અને બીજો ડોઝ આપવામાં આવ્યો છે. તેમાં પણ હેલ્થ વર્કર્સને 6,22,279 લોકોને પ્રથમ ડોઝ અપાયો છે. જ્યારે બીજો ડોઝ 4,74,120 લોકોને આપવામાં આવ્યો છે. ફ્રન્ટલાઈન વોરિયર્સને અત્યાર સુધી 13,42,166 લોકોને પ્રથમ ડોઝ અપાયો, જ્યારે 8,10,862 વેક્સિનનો બીજો ડોઝ આપવામાં આવ્યો. 45 વર્ષથી વધુ વયના 1,11,02,068 લોકોને વેક્સિનનો પ્રથમ ડોઝ અપાયો, જ્યારે બીજો ડોઝ માત્ર 46,24,625 લોકોને આપવામાં આવ્યો છે. 18 વર્ષથી લઈને 44 વર્ષ સુધીની વયના 81,14,677 લોકોને વેક્સિનનો પ્રથમ ડોઝ આપવામાં આવ્યું છે, જ્યારે બીજો ડોઝ માત્ર 2,40,955 લોકોને જ અપાયો છે.

આ પણ વાંચો: ગુજરાતમાં આજે અને આવતીકાલે વેક્સિનેશન (Corona vaccination) રહેશે બંધ

રાજ્યભરમાં વેક્સિન પહોંચાડવા માટે ડ્રાઇવરો 15 કલાક સુધી સતત ચલાવે છે વાહનો

વેક્સિન બાય રોડ અને પ્લેનથી રાજ્યોમાં સપ્લાય કરવામાં આવે છે. તેમાં પણ રાજ્યના નક્કી કરાયેલા છ સબસ્ટેશનનો જેમાં અમદાવાદ, રાજકોટ, ભાવનગર વડોદરા વગેરેનો સમાવેશ થાય છે. જેઓ એરપોર્ટ પર વેક્સિન મળતા જ નક્કી કરાયેલા જુદા જુદા રૂટ પર પહોંચે છે. વેક્સિન પહોંચાડવા માટે ડ્રાઇવરો 15થી વધુ કલાક સુધી સતત વાહનો ચલાવે છે અને જુદા જુદા જિલ્લાઓ તાલુકા અને શહેરોમાં પહોંચાડે છે.