যোৰহাট, ২০ মে': এগৰাকী প্ৰচাৰ বিমুখ কাৰুশিল্পী ৷ এইগৰাকী কাৰুশিল্পীৰ হাতৰ পৰশত প্ৰাণ পাই উঠে কাঠৰ টুকুৰা ৷ কাঠৰ টুকুৰাবোৰ কাটি তেওঁ বহু বছৰ ধৰি নিৰৱছিন্নভাৱে খোদিত কৰি গৈছে চৰাই চিৰিকটি, জীৱ-জন্তু ৷ গুৰুজনাৰ সৃষ্টিৰাজিক নৱপ্ৰজন্মৰ মাজত জীৱন্ত ৰূপত দাঙি ধৰিবলৈ সক্ষম হৈছে এইগৰাকী কাৰুশিল্পীয়ে । বিগত ২০ বছৰেই এই শিল্পৰ সৈতে ওতঃপ্ৰোতভাৱে জড়িত হৈ থকা কাৰুশিল্পীগৰাকী হৈছে যোৰহাটৰ মনেশ্বৰ বৰা ।
শদিয়াৰ পৰা ধুবুৰীলৈকৈ পৰিচিতি এইগৰাকী কাৰুশিল্পীৰ পৰশত প্ৰাণ পাই উঠিছে গুৰুজনাৰ সৃষ্টিৰাজি । যোৰহাটৰ নগৰৰ নাতিদূৰৈৰ এলেংমৰাত কাৰুশিল্পীগৰাকীৰ ঘৰ । অসমৰ শদিয়াৰ পৰা ধুবুৰীলৈ কোনো এখন গাঁৱত যদি গুৰুজনাৰ সৃষ্টিৰাজিৰ নামঘৰৰ উপৰি গোঁসাই ঘৰ আৰু মন্দিৰ আদি প্ৰতিষ্ঠা কৰিবলগীয়া হয় তেন্তে প্ৰয়োজন হয় এইগৰাকী বিশেষ ব্যক্তিৰ । কিয়নো নামঘৰৰ বাবে প্ৰয়োজন সিংহাসন, পদ্মাসন, গৰুড়াসনকে ধৰি সকলোবোৰ অতি নিখুঁতভাৱে সাজি উলিয়াব পাৰে তেওঁ ।
এই প্ৰসংগত কাৰুশিল্পী মনেশ্বৰ বৰাই কয়," পূৰ্বতে পিতৃয়ে কৰা এই কাম বিগত বিশ বছৰৰ পৰা কৰি আহিছো ।" পূৰ্বতে তেওঁৰ এয়া আছিল নিচা । কিন্তু বৰ্তমান মনেশ্বৰ বৰাই এয়া পেছালৈ পৰিৱৰ্তন কৰিছে । উল্লেখ্য যে কাৰুশিল্পী গৰাকীয়ে এই কামৰ বাবে জীৱনত কৰি গৈছে বহু ত্যাগ । এইসমূহ ধৰ্মীয় সামগ্রী নিৰ্মাণৰ সময়ত তেওঁ থাকে অনাহাৰে । অৰ্থাৎ অতি ভক্তিভাৱেৰে নিৰৱিচ্ছিন্নভাৱে নিৰ্মাণ কৰি গৈছে এই সামগ্রীসমূহ ।
মানসিক সন্তুষ্টিৰ বাবেই ৰাইজৰ সেৱাত ব্ৰতী শিল্পীগৰাকীয়ে বিশ বছৰৰ পূৰ্বেই ত্যাগ কৰিছে আমিষ আহাৰ । কৰ্ম ,ধৰ্ম, বিশ্বাস একেলগে লৈ মনেশ্বৰ বৰাই কেৱল মনোনিবেশ কৰিছে সৃষ্টিশীল কৰ্মত । মনেশ্বৰ বৰাৰ এই কামে নৱ প্ৰজন্ম বাবে প্ৰেৰণা আৰু আশা প্ৰতীক হিচাপে জিলিকি থাকিব ।
