ନୂଆଦିଲ୍ଲୀ: ଭାରତୀୟ ନୌସେନାରୁ ହଟିବ ବ୍ରିଟିଶ ଅମଳର ସାମ୍ରାଜ୍ୟବାଦ ପ୍ରଥା ଓ ପରମ୍ପରାର ଝଲକ । ଏଣିକି ନୈସେନା ଅଧିକାରୀ ଓ ଯବାନମାନେ ଅବସର ସମୟରେ ସର୍ଭିସ ଡ୍ରେସକୋଡ ଛଡା ଅନପୌଚାରିକ ତଥା ଭାରତୀୟ ପାରମ୍ପରିକ ପୋଷାକ କୁର୍ତ୍ତା-ପାଇଜାମା ପରିଧାନ କରିପାରିବେ । ଏନେଇ ସରକାରୀ ଅନୁମତି ମିଳିଛି । ଏହି ନିୟମ ଅନୁସାରେ, ନାଭାଲ ଏକାଡେମୀ ଓ ପ୍ରଶିକ୍ଷଣ ସଂସ୍ଥାନରେ ଅବସର ସମୟରେ ନୌସେନାଧିକାରୀ, ସେଲର ଓ ଯବାନମାନେ କୁର୍ତ୍ତା-ପାଇଜାମା ଓ ସ୍ଲିଭଲେସ ଜ୍ୟାକେଟ ପରିଧାନ କରିପାରିବେ । କ୍ୟାମ୍ପସରେ କୌଣସି ପ୍ରକାରର ଅନୌପଚାରିକ କାର୍ଯ୍ୟକ୍ରମ, ସଭା-ସମିତି ଓ ରେସ୍ତୋରାଁରେ ପରି ଅବସର ସମୟରେ ଏହାକୁ ପରିଧାନ କରାଯାଇପାରିବ ।
ପୁରୁଷ ମହିଳା ଅଧିକାରୀଙ୍କ ପାଇଁ ସମାନ ଡ୍ରେସକୋଡ:-
ନୂଆ କରି ସ୍ଥିର କରାଯାଇଥିବା ଡ୍ରେସକୋଡରେ ସମସ୍ତ ପୁରୁଷ ଅଧିକାରୀମାନେ ଆକାଶୀ ରଙ୍ଗର କୁର୍ତ୍ତା ପରିଧାନ କରିବେ । ଏହାର ଲମ୍ବ ଆଣ୍ଠୁ ପର୍ଯ୍ୟନ୍ତ ରହିବ । ସେହିପରି ପରିଧାନରେ ସହଜତାକୁ ଧ୍ୟାନରେ ରଖି ପାଇଜାମା ମଧ୍ୟ ଇଲାଷ୍ଟିକ ସହ ରହିବ । କୁର୍ତ୍ତା ଉପରେ ଏକ ସ୍ଲିଭଲେସ (ହାତ ନଥିବା ବା ଅଧା) ଜ୍ୟାକେଟ ମଧ୍ୟ ପରିଧାନ କରିପାରିବେ । ସେହିପରି ମହିଳା ନୌସେନା ଅଧିକାରୀମାନେ ଆକାଶୀ ରଙ୍ଗର ଚୁଡିଦାର ଓ କୁର୍ତ୍ତା ପରିଧାନ କରିବେ । ସେମାନେ ମଧ୍ୟ ପୁରୁଷ ଅଧିକାରୀଙ୍କ ପରି ସ୍ଲିଭଲେସ ଜ୍ୟାକେଟ ପରିଧାନ କରିପାରିବେ । ଏହା ସହ ପାଦରେ କାଜୁଆଲ ଜୋତା କିମ୍ବା ସ୍ୟାଣ୍ଡେଲ ମଧ୍ୟ ପିନ୍ଧି ପାରିବେ ନୌଅଧିକାରୀ ।
ତେବେ ଏଠାରେ ଉଲ୍ଲେଖଯୋଗ୍ୟ ଯେ, ଦେଶ ସ୍ବାଧୀନତା ପୂର୍ବରୁ ବ୍ରିଟିଶ ଶାସନ କାଳରେ ପ୍ରତିଷ୍ଠା ହୋଇଥିବା ନୈସେନାର ବିଭିନ୍ନ କାର୍ଯ୍ୟଶୈଳୀରେ ବ୍ରିଟିଶ ପରମ୍ପରାର ସ୍ପଷ୍ଟ ଝଲକ ଦେଖିବାକୁ ମିଳେ । ନିକଟରେ ଏଥିରେ ଅନେକାଂଶରେ ସଂଶୋଧନ ମଧ୍ୟ କରାଯାଇଛି । କିଛି ମାସ ପୂର୍ବରୁ ନୌସେନାର ‘ଲୋଗୋ’ ମଧ୍ୟ ପରିବର୍ତ୍ତନ କରାଯାଇଥିଲା । ଏବେ ଅନ୍ୟାନ୍ୟ କ୍ଷେତ୍ରରେ ମଧ୍ୟ ସାମ୍ରାଜ୍ୟବାଦର ଝଲକକୁ ବାଦ ଦେଇ ସ୍ବଦେଶୀ ଓ ଭାରତୀୟ ପରମ୍ପରାକୁ ସାମିଲ କରାଯିବା ପାଇଁ ଏକାଧିକ ସଂସ୍କାରମୂଳକ ପଦକ୍ଷେପ ଗ୍ରହଣ କରାଯାଇଛି । ସେହିକ୍ରମରେ ଏବେ ନାଭାଲ ଏକାଡେମୀରେ ଭାରତୀୟ ପାରମ୍ପରିକ ପୋଷାକରେ ନୌଯୋଦ୍ଧାମାନେ ନଜର ଆସିବାକୁ ଯାଉଛନ୍ତି । ଏହା ସ୍ବଦେଶୀ ପରମ୍ପରା ଓ ଆତ୍ମନିର୍ଭରତାକୁ ବୃଦ୍ଧି କରିବ । ସଶସ୍ତ୍ର ବଳରେ ଏହି ସ୍ବଦେଶୀ ବିଚାରକୁ ସ୍ବାଗତ ମଧ୍ୟ କରାଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
