ಬೀಜಿಂಗ್: ಚೀನಾದ ಚಾಂಗ್'ಇ-6 ಬಾಹ್ಯಾಕಾಶ ನೌಕೆಯು ಚಂದ್ರನತ್ತ ಶುಕ್ರವಾರ ಯಶಸ್ವಿಯಾಗಿ ಉಡಾವಣೆಯಾಗಿದೆ. ಚಂದ್ರನ ದೂರದ ಭಾಗದ ಮೇಲಿಳಿಯಲಿರುವ ಇದು ಚಂದ್ರನ ಮೇಲ್ಮೈಯಿಂದ ಕಲ್ಲು, ಮಣ್ಣಿನ ಮಾದರಿಗಳನ್ನು ಸಂಗ್ರಹಿಸಿ ಭೂಮಿಗೆ ತರಲಿದೆ. ದಕ್ಷಿಣ ದ್ವೀಪ ಪ್ರಾಂತ್ಯದ ಹೈನಾನ್ ಕರಾವಳಿಯ ವೆನ್ ಚಾಂಗ್ ಬಾಹ್ಯಾಕಾಶ ಉಡಾವಣಾ ಸ್ಥಳದಿಂದ ಚಾಂಗ್'ಇ -6 ಬಾಹ್ಯಾಕಾಶ ನೌಕೆಯನ್ನು ಹೊತ್ತ ಲಾಂಗ್ ಮಾರ್ಚ್ -5 ರಾಕೆಟ್ ಶುಕ್ರವಾರ ಮಧ್ಯಾಹ್ನ ಉಡಾವಣೆಯಾಗಿದೆ ಎಂದು ಕ್ಸಿನ್ಹುವಾ ಸುದ್ದಿ ಸಂಸ್ಥೆ ವರದಿ ಮಾಡಿದೆ.
ಇದು ಚಂದ್ರನ ದೂರದ ಭಾಗಕ್ಕೆ ಚೀನಾದ ಚಾಂಗ್'ಇ -4 2019 ರಲ್ಲಿ ಮೊದಲ ಬಾರಿಗೆ ಭೇಟಿ ನೀಡಿತ್ತು. ಆದರೆ ಈಗ ಚಾಂಗ್'ಇ-6 ಬಾಹ್ಯಾಕಾಶ ನೌಕೆಯು ಇದೇ ಮೊದಲ ಬಾರಿಗೆ ಚಂದ್ರನ ದೂರದ ಪ್ರದೇಶದ ಮೇಲಿನಿಂದ ಧೂಳಿನ ಮಾದರಿಗಳನ್ನು ಸಂಗ್ರಹಿಸಲಿದೆ. ಚಂದ್ರನ ಮೇಲ್ಮೈಯಿಂದ 2 ಕೆಜಿ ಮಾದರಿಗಳನ್ನು ಸಂಗ್ರಹಿಸಿ ಭೂಮಿಗೆ ತರುವ ಗುರಿಯನ್ನು ನೌಕೆ ಹೊಂದಿದೆ. 2020 ರಲ್ಲಿ ಚಾಂಗ್'ಇ -5 ಸುಮಾರು ನಾಲ್ಕು ಪೌಂಡ್ ರೆಗೊಲಿತ್ ಅನ್ನು ಮರಳಿ ತಂದಿತ್ತು. ಆದರೆ ಅದು ಚಂದ್ರನ ಹತ್ತಿರದ ಭಾಗದಿಂದ ತಂದ ಮಾದರಿಯಾಗಿತ್ತು. ಯುಎಸ್ ಮತ್ತು ಮಾಜಿ ಸೋವಿಯತ್ ಒಕ್ಕೂಟ ಕೂಡ ಚಂದ್ರನ ಮೇಲಿಂದ ಮಾದರಿಗಳನ್ನು ಯಶಸ್ವಿಯಾಗಿ ಸಂಗ್ರಹಿಸಿ ಭೂಮಿಗೆ ಮರಳಿ ತಂದಿವೆ.
ಚಾಂಗ್'ಇ -6 ಬಾಹ್ಯಾಕಾಶ ನೌಕೆಯು ಆರ್ಬಿಟರ್, ಲ್ಯಾಂಡರ್, ಅಸೆಂಡರ್ ಮತ್ತು ರಿಟರ್ನರ್ ಗಳನ್ನು ಒಳಗೊಂಡಿದೆ. ಅಂತರರಾಷ್ಟ್ರೀಯ ಸಹಕಾರದ ಮೂಲಕ ಅಭಿವೃದ್ಧಿಪಡಿಸಿದ ನಾಲ್ಕು ಪೇಲೋಡ್ಗಳನ್ನು ಸಹ ಈ ನೌಕೆ ಹೊತ್ತೊಯ್ದಿದೆ. ಫ್ರಾನ್ಸ್, ಇಟಲಿ ಮತ್ತು ಯುರೋಪಿಯನ್ ಸ್ಪೇಸ್ ಏಜೆನ್ಸಿಯ ವೈಜ್ಞಾನಿಕ ಉಪಕರಣಗಳು ಚಾಂಗ್'ಇ -6 ಲ್ಯಾಂಡರ್ನಲ್ಲಿದ್ದರೆ, ಪಾಕಿಸ್ತಾನದ ಸಣ್ಣ ಉಪಗ್ರಹವೊಂದು ಆರ್ಬಿಟರ್ನಲ್ಲಿದೆ.
ಚೀನಾ ನ್ಯಾಷನಲ್ ಸ್ಪೇಸ್ ಅಡ್ಮಿನಿಸ್ಟ್ರೇಷನ್ (ಸಿಎನ್ಎಸ್ಎ) ಪ್ರಕಾರ, ಚಾಂಗ್'ಇ -6 ಚಂದ್ರ ಶೋಧಕವು ಚಂದ್ರನ ದೂರದ ಬದಿಯಲ್ಲಿರುವ ದಕ್ಷಿಣ ಧ್ರುವ-ಐಟ್ಕೆನ್ ಜಲಾನಯನ ಪ್ರದೇಶದಲ್ಲಿರುವ ಅಪೊಲೊ ಬೇಸಿನ್ ಎಂದು ಕರೆಯಲ್ಪಡುವ ಸ್ಫೋಟದಿಂದ ಉಂಟಾದ ಕುಳಿಯಿಂದ ಮಾದರಿಗಳನ್ನು ಸಂಗ್ರಹಿಸಲಿದೆ.
ನೌಕೆಯು ಚಂದ್ರನ ಮೇಲ್ಮೈಯನ್ನು ತಲುಪಲು ಒಂದು ತಿಂಗಳು ಬೇಕಾಗಲಿದೆ. ಅಲ್ಲಿಗೆ ತಲುಪಿದ ನಂತರ ನೌಕೆ ಸಾಫ್ಟ್ ಲ್ಯಾಂಡಿಂಗ್ ಮಾಡಲಿದೆ. ಲ್ಯಾಂಡಿಂಗ್ ಆದ 48 ಗಂಟೆಗಳ ಒಳಗೆ, ಚಂದ್ರನ ಮೇಲ್ಮೈಯಿಂದ ಬಂಡೆಗಳು ಮತ್ತು ಮಣ್ಣನ್ನು ಹೊರತೆಗೆಯಲು ರೊಬೊಟಿಕ್ ಹ್ಯಾಂಡ್ ಅನ್ನು ಹೊರಗೆ ಚಾಚಲಾಗುತ್ತದೆ. ಆದರೆ ನೆಲಕ್ಕೆ ಬೋರ್ ಮಾಡಲು ಡ್ರಿಲ್ ಅನ್ನು ಬಳಸಲಾಗುತ್ತದೆ.
ವೈಜ್ಞಾನಿಕ ಪತ್ತೆ ಕಾರ್ಯವನ್ನು ಕೂಡ ಇದೇ ಸಮಯದಲ್ಲಿ ಮಾಡಲಾಗುವುದು. ಹೀಗೆ ಸಂಗ್ರಹಿಸಿದ ಮಾದರಿಗಳನ್ನು ಕಂಟೇನರ್ನಲ್ಲಿ ಸೀಲ್ ಮಾಡಿದ ನಂತರ, ಅಸೆಂಡರ್ ಚಂದ್ರನಿಂದ ಹೊರಟು ಚಂದ್ರನ ಕಕ್ಷೆಯಲ್ಲಿರುವ ಆರ್ಬಿಟರ್ನೊಂದಿಗೆ ಬಂಧಿಸಲ್ಪಡುತ್ತದೆ. ನಂತರ ರಿಟರ್ನರ್ ಮಾದರಿಗಳನ್ನು ಭೂಮಿಗೆ ತರಲಿದೆ. ಉತ್ತರ ಚೀನಾದ ಇನ್ನರ್ ಮಂಗೋಲಿಯಾ ಸ್ವಾಯತ್ತ ಪ್ರದೇಶದ ಸಿಜಿವಾಂಗ್ ಬ್ಯಾನರ್ ಪ್ರದೇಶದಲ್ಲಿ ರಿಟರ್ನರ್ ಇಳಿಯಲಿದೆ. ಇಡೀ ಕಾರ್ಯಾಚರಣೆಯು ಸುಮಾರು 53 ದಿನಗಳ ಕಾಲ ನಡೆಯುವ ನಿರೀಕ್ಷೆಯಿದೆ ಎಂದು ಸಿಎನ್ಎಸ್ಎ ತಿಳಿಸಿದೆ.
ಇದನ್ನೂ ಓದಿ: ಚಂದ್ರನ ಮೇಲೆ ಅಗೆದು ನೋಡಬಹುದಾದಷ್ಟು ಆಳದಲ್ಲಿ ಮತ್ತಷ್ಟು ಮಂಜುಗಡ್ಡೆ ನಿಕ್ಷೇಪ: ಇಸ್ರೋ ಸಂಶೋಧನೆ - ICE ON MOON
