حیدرآباد: طلبہ میں لیڈرشپ کی صلاحیتوں کے فروغ دینے کے لیے قائم کردہ باوقار ورلڈٹین پارلیمنٹ کے دوسرے سال بھی ایم ایس کے طلبہ کو نمائندگی کا اعزاز حاصل ہوا ہے۔ اس ادارے میں نمائندگی کرنے کے لیے منتخب ایم ایس کریٹیو اسکول کی چھ طلبہ کو ایم ایس ایجوکیشن اکیڈمی کے سینیئر ڈائریکٹر ڈاکٹر محمد معظم حسین نے ایم ایس کے کارپوریٹ آفس میں تہنیت پیش کی۔ ڈاکٹر محمد معظم حسین نے بتایا کہ ورلڈٹین پارلیمنٹ میں ایم ایس کریٹیو اسکول کے چھ طلبہ حمد عبدالمقیت، عفیفہ مہک، فقیہ تسنیم، یاسمین شیخ، نور بانو، دانیہ ناظرین کو سخت مقابلے کے بعد منتخب ہونے کا اعزاز حاصل ہوا ہے۔ اس مقابلے میں ایم ایس کے 130 طلبہ نے حصہ لیا تھا۔ جن میں سے 30 کو بطور انفلوئنسرس منتخب کیا گیا ہے جب کہ چھ طلبہ نے قطعی کامیابی حاصل کی اور اس سال کے لیے بطور رکن ٹین پارلیمنٹ منتخب ہوئے۔

معظم حسین نے کہا کہ منتخب 100 نوعمر ایم پیز کو ان کے خیالات پر کام کرنے کے لیے تربیت، رہنمائی اور فنڈز فراہم کیے جاتے ہیں۔ ہر ماہ وہ عالمی سطح پر مقبول ورلڈ لیڈرس، کارپوریشنوں، حکومتوں کے نمائندوں اور اہم لوگوں سے تبادلۂ خیال کرتے ہیں۔ اس موقع پر ایم ایس ایجوکیشن اکیڈیمی کے اکاڈمک ڈائریکٹر ڈاکٹر سید حمید نے منتخب طلبہ کو مبارکباد دیتے ہوئے کہا کہ اس سال بھی ورلڈ ٹین پارلیمنٹ کے 100 اراکین (ایم پی) کے لیے پوری دنیا سے ہزاروں کی تعداد میں طلبہ نے آن لائن مقابلے میں شرکت کی تھی۔ اس مقابلے کے فائنل مرحلے میں کامیابی حاصل کرنے والے طلبہ میں ایم ایس کریٹیو اسکول کے 6 طلبہ شامل ہیں۔

انہوں نے کہا کہ گزشتہ سال بھی ایم ایس کے چار طالبات نے یہ اعزاز حاصل کیا تھا۔ مسلسل دو سال سے اس مقابلے میں ایم ایس کے طلبہ کی کامیابی قابل ستائش ہے۔ ورلڈ ٹین پارلیمنٹ کے لیے منتخب طلبہ کو عالمی طور پر شہرت یافتہ ماہرین و نامور قانون ساز شخصیات کے ساتھ آن لائن ورکشاپس میں شرکت و تبادلۂ خیال کرنے کا موقع فراہم کیا جائے گا جس میں ہندوستان، برطانیہ اور دوسرے ممالک کے ممبران پارلیمنٹ شامل ہوتے ہیں۔

گزشتہ سال جن ماہرین نے طلبہ سے تبادلۂ خیال کیا تھا ان میں ہندوستان کے ایم پی ششی تھرور بھی شامل تھے۔ سیکنڈ ورلڈ ٹین پارلیمنٹ کے لیے منتخب ایم ایس 6 طلبہ نے اس اعزاز کے حاصل ہونے پر مسرت کا اظہار کرتے ہوئے اس عزم کا اظہار کیا کہ وہ اس موقع سے فائدہ اٹھاتے ہوئے اس کے ذریعہ سیکھنے وتربیت سازی کے تمام مواقع سے استفادہ کریں گے اور اپنے تئیں کوشش کے ذریعہ ہمارے سماج وملک اور دنیا کو بہتر بنانے کی سمت کام کریں گے۔