حیدرآباد: بی جے پی کے قومی صدر جے پی نڈا نے اعلان کیا ہے کہ تلنگانہ کے انتخابات بی جے پی اور خاندانی جماعتوں کے درمیان ہیں۔ انہوں نے تلنگانہ کے نارائن پیٹ میں جلسہ سے خطاب کرتے ہوئے دعوی کیا کہ بی جے پی تلنگانہ میں خاندانی حکمرانی کو چیلنج کررہی ہے۔ انہوں نے الزام لگایا کہ ترقی کے لئے وزیراعظم مودی کی جانب سے منطوری فنڈس کا غلط استعمال کیا گیا۔ وزیراعلی چندر شیکھر راو کا خاندان فنڈس کو عوام تک پہنچنے کو یقینی نہیں بنارہا ہے۔

انہوں نے کہا کہ چندر شیکھر راو زیر قیادت بی آر ایس حکومت ڈیزل اور پٹرول پر ویاٹ میں کمی کرتے ہوئے عوام کو فائدہ پہنچانا نہیں چاہتی۔ اس کے ذریعہ ریاست میں سب سے زیادہ افراط زر ہوگئی ہے۔ انہوں نے ریاست کی حکمراں جماعت بی آر ایس کو ”بھرشٹاچار سمیتی“ قرار دیتے ہوئے دعوی کیا کہ کالیشورم پراجکٹ چندر شیکھر راو کے لئے اے ٹی ایم بن گیا ہے۔ انہوں نے بی جے پی کے برسراقتدار آنے پر چندر شیکھر راو کی مبینہ رشوت خوری کی تحقیقات کروانے کا وعدہ کیا اور خاطیوں کو جیل بھیجنے پر بھی زور دیا۔

مزید پڑھیں: کانگریس کو جڑ سے اکھاڑ پھینکنے کی ضرورت، نڈا

انہوں نے دلت بندھو اسکیم میں 30 فیصد کمیشن حاصل کرنے کا بی آر ایس کے ارکان اسمبلی پر الزام لگاتے ہوئے 30نومبر کو 30 فیصد کمیشن والی حکومت کے خاتمہ اور بی جے پی حکومت کے قیام پر زور دیا۔ انہوں نے غریبوں کے لئے ڈبل بیڈروم مکانات فراہم کرنے میں ناکامی پر بی آر ایس حکومت پر تنقید کرتے ہوئے دعوی کیا کہ پی ایم آواس یوجنا کے فنڈس استفادہ کنندگان تک نہیں پہنچ پارہے ہیں۔ انہوں نے کہا کہ علیحدہ ریاست کے ثمرات عوام تک نہیں پہنچ رہے ہیں۔ یہ انتخابات تلنگانہ کے مستقبل کو ظاہر کریں گے۔

یو این آئی