قومی دارلحکومت دہلی میں سابق رکن پارلیمنٹ نے الیاس اعظمی آل انڈیا مسلم او بی سی آرگنائزیشن کے مرکزی دفتر کا دورہ کیا۔ اس موقع پر انہوں نے آل انڈیا مسلم او بی سی آرگنائزیشن کے قومی صدر شبیر احمد انصاری سے او بی سی کے مسائل و ان کے حل پر طویل گفتگو کی۔ ملاقات کے دوران دونوں رہنما اس بات پر متفق ہوئے کہ اگر موجودہ حکومت مسلم اقلیت اور خصوص پسماندہ مسلم لئے کچھ کرنے کے لیے سنجیدہ ہے تو سب سے پہلے رنگناتھ مشرا کمیشن کی سفارشات کو نافذ کریں۔

اس موقع پر آل انڈیا مسلم او بی سی آرگنائزیشن کے قومی صدر شبیر احمد انصاری نے کہا کہ سچر کمیٹی، رنگناتھ مشرا کمیشن اور محمودالرحمن کمیٹی کے ذریعے مسلمانوں کو معاشی پسماندگی کی بنیاد پر ریزرویشن دینے کی سفارشات کو نافذ کرانے کے لیے مسلم ادارے ،تنظیمیں اور سیاست میں سرگرم ساتھی وزیر اعظم سے اب ایک واحد مطالبہ کریں کہ وزیر آعظم رنگ ناتھ مشرا کمیشن کی سفارشات نافذ کریں۔

ان کا کہنا تھا کہ دنیا کے ہر کونے سے وزیر اعظم اس بات کی یقین دہانی بار بار کراتے رہتے ہیں کہ وہ’’سب کا ساتھ سب کا وکاس ‘‘کے نظریہ کے تحت کام کر رہے ہیں اور سب کا وکاس بھی چاہتے ہیں۔اب تو پسماندہ مسلمانوں کو سماجی اعتبار سے اوپر اٹھانے کی بھی بات ہو رہی ہے۔ بی جے پی کی آل انڈیا میٹنگ میں وزیر اعظم نے بطور خاص مسلمانوں پر کسی بھی طرح کے ریمارکس نہ کرنے کی ممبران کو تلقین کی ہے۔ اس سے ثابت ہے کہ پسماندہ مسلمانوں کے لیے مودی حکومت نرم گوشہ رکھتے ہیں۔ اب ضرورت اس بات کی ہے کہ مسلم تنظیمیں سیاسی افراد اور پسماندہ برادریوں کے لیڈران وزیر اعظم تک یہ بات پہنچائیں کہ وہ رنگ ناتھ مشرا کمیشن کی سفارشات کو نافذ کریں۔

مزید پڑھیں:مرکزی حکومت 'سب کا ساتھ، سب کا وکاس' کو عملی جامہ پہنائے: عبدالسبحان