وزیراعظم نریندرمودی نے امریکی نائب صدر، آسٹریلیا اور جاپان کے وزیراعظم سے ملاقات کو معنی خیز قرار دیا ہے۔ آسٹریلیا کے وزیراعظم اسکاٹ موریسن کے ساتھ ملاقات کو اہم قرار بتاتے ہوئے مودی نے ٹویٹ کیا کہ ’’میرے اچھے دوست، وزیراعظم اسکاٹ موریسن کے ساتھ بات چیت کرنا ہمیشہ فائدہ مند رہا ہے، ہم نے تجارت، توانائی اور دیگر شعبوں میں تعاون کو مضبوط بنانے پر تبادلہ خیال کیا ‘‘۔
وہیں، جاپان کو بھارت کے سب سے اہم شراکت داروں میں سے ایک قرار دیتے ہوئے مودی نے کہا کہ دونوں ممالک کے درمیان شراکت داری بڑھانے والے مختلف موضوعات پر جاپانی وزیراعظم یوشی ہیڈے سوگا کے ساتھ بہترین بات چیت ہوئی۔ انہوں نے کہا کہ بھارت اور جاپان کی مضبوط دوستی پورے خطے کے لیے اچھی ہے۔
مودی نے امریکی نائب صدر کملا ہیرس سے ملاقات پر خوشی کا اظہار کرتے ہوئے کہا کہ ان کی مہارت نے پوری دنیا کو تحریک دی ہے ۔ انہوں نے کہا ’’ ہم نے کئی موضوعات پر بات کی، جو مشترکہ اقدار اور ثقافتی روابط پر مبنی بھارت امریکہ دوستی کو مزید مضبوط کرے گی ‘‘۔
قابل ذکر ہے کہ وزیراعظم نریندر مودی تین روزہ امریکہ کے دورہ پر ہیں۔ ان کے ساتھ وفد میں قومی سلامتی کے مشیر اجیت ڈووال ، سکریٹری خارجہ ہرش وردھن شرنگلا اور دیگر اعلیٰ سینئر حکام وفد بھی امریکہ گئے ہیں۔ وزیر خارجہ ایس جے شنکر پہلے ہی امریکہ میں ہیں۔
واضح رہے کہ جمعہ یعنی آج کواڈ کا پہلا اجلاس واشنگٹن ڈی سی میں ہونے جا رہا ہے۔ کواڈ اتحاد میں امریکہ، آسٹریلیا، انڈیا اور جاپان شامل ہیں۔ کواڈ کا اجلاس ایک ایسے وقت میں ہو رہا ہے کہ جب رواں ہفتے کے اوائل میں ایک نئے بین الاقوامی سکیورٹی معاہدے نے تنازع کھڑا کر دیا ہے۔ متنازع آکس معاہدے میں امریکہ، برطانیہ اور آسٹریلیا شامل ہیں۔
