کاسرگوڈ : کیرالہ کے کاسرگوڈ ضلع میں ایک مسلم جوڑا اپنی تین بیٹیوں کی معاشی حفاظت کو یقینی بنانے کے لیے اسپیشل میرج ایکٹ کے تحت دوبارہ شادی کرنے جا رہا ہے۔ وکیل اور اداکار سی شکور اپنی بیوی شینا سے دوبارہ شادی کرنے کے لیے تیار ہیں۔ مغربی ممالک اور کچھ ہندو ذاتوں میں اکثر جوڑے اپنی منتوں کی تجدید کرتے ہیں یا شادی کے کئی سال بعد اپنے شریک حیات سے دوبارہ شادی کر لیتے ہیں لیکن یہ جوڑا کچھ شرائط کی وجہ سے اپنی شادی کو دوبارہ رجسٹر کرنے جارہا ہے اور یہ مسلم وراثت کے قوانین کی شرائط میں سے ایک ہے جس میں کہا گیا ہے کہ بیٹیوں کو ان کے باپ کی جائیداد کا صرف دو تہائی حصہ ملے گا اور باقی حصہ مرد وارث کی عدم موجودگی میں اس کے بھائیوں کے پاس جائے گا۔
سی شکور اور شینا کی شادی کو اب 29 سال ہوچکے ہیں۔ اسپیشل میرج ایکٹ کے تحت اپنی شادی کو دوبارہ رجسٹر کرکے وہ مسلم وراثت ایکٹ کی شرائط سے آزاد ہونا چاہتا ہے۔ ایک فیس بک پوسٹ میں شکور نے کہا کہ اس کے پاس ماضی میں قریب الموت کے دو تجربات تھے جنہوں نے اسے یہ سوچنے پر مجبور کیا کہ وہ اپنی بیٹیوں کے لیے کیا چھوڑ کر جا رہے ہیں اور کیا وہ اس کی تمام بچت اور املاک کا وارث بن سکیں گی۔ ان کی تشویش یہ تھی کہ 1937 کے مسلم پرسنل لا (شریعت) ایپلی کیشن ایکٹ اور عدالتوں کے موقف کے مطابق باپ کی جائیداد کا صرف دو تہائی حصہ بیٹیوں کو جاتا ہے اور اگر کوئی وارث لڑکا نہ ہونے کی صورت میں باقی جائیداد بات کے بھائیوں کو مل جائے گی۔ انہوں نے کہا کہ شریعت کے تحت وہ اپنی وصیت نہیں کر سکتے۔ انہوں نے اپنی پوسٹ میں کہا کہ ان کی بیٹیوں کو صرف لڑکیاں ہونے کی وجہ سے امتیازی سلوک کا سامنا کرنا پڑے گا۔
مزید پڑھیں:۔ مسجد کے صحن میں ہندو جوڑے کی شادی
شکور کے مطابق اس سے نکلنے کا واحد راستہ اسپیشل میرج ایکٹ کے تحت اپنی شادی کو دوبارہ رجسٹر کروانا ہے۔ انہیں امید ہے کہ ان کا فیصلہ مسلم خاندانوں میں بیٹیوں کے خلاف صنفی امتیاز کو ختم کرنے کا راستہ دکھائے گا۔ اس سے لڑکیوں کی خود اعتمادی کو بڑھانے میں مدد ملے گی۔ انہوں نے اپنی پوسٹ میں کہا کہ اللہ ہماری بیٹیوں کے اعتماد اور عزت میں اضافہ کرے۔ انہوں نے اپنی فیس بک پوسٹ میں لکھا کہ اللہ اور ہمارے آئین کے سامنے سب برابر ہیں۔ انہوں نے اپنی پوسٹ میں مزید کہا کہ ان کی دوبارہ شادی کا فیصلہ کسی اور یا موجودہ شرعی قانون کی خلاف ورزی کے مقصد سے نہیں لیا گیا ہے۔ انہوں نے کہا کہ ہم صرف اس امکان کی تلاش میں ہیں کہ اسپیشل میرج ایکٹ کے ذریعے شادی کرنے والوں پر مسلم پرسنل لا کا کوئی اثر نہیں پڑے گا۔ شینا اور میں اپنے بچوں کے لیے دوبارہ شادی کر رہے ہیں۔
ایک ٹی وی چینل سے گفتگو کرتے ہوئے انہوں نے کہا کہ ہم صرف اپنی بیٹیوں کا مستقبل محفوظ بنانا چاہتے ہیں۔ ان کی اہلیہ نے چینل کو ان مشکلات کے بارے میں بھی بتایا جس سے ان کا خاندان گزر رہا تھا۔ ایسے کئی مسلم خاندانوں کو اس کا سامنا کرنا پڑتا ہے، جن کی صرف بیٹیاں ہیں۔ کالج میں پڑھاتے ہوئے یا کسی بھی عوامی فورم میں تقریر کرتے ہوئے بہت سے والدین میرے پاس آتے ہیں اور پوچھتے ہیں کہ کیا یہ 'میراثی مسئلہ' درست ہے؟ شینا نے کہا کہ ہم یہ بات برسوں سے سن رہے ہیں۔ انہوں نے کہا کہ ہم جو کر سکتے ہیں وہ کریں۔ شکور کی فیس بک پوسٹ کے مطابق سی شکور اور شینا کی شادی 6 اکتوبر 1994 کو ہوئی تھی۔ 8 مارچ کو جوڑے کاسرگوڈ ضلع کے ہوسادرگ تعلقہ کنہ گڑھ میں سب رجسٹرار کے دفتر میں اپنی بیٹیوں کی موجودگی میں دوبارہ شادی کریں گے۔
