کولگام: حفاظتی اہلکاروں نے جنوبی کشمیر کے کولگام ضلع میں کالعدم جیش محمد (JeM) سے وابستہ عسکریت پسندوں کے چھ معاونین کو گرفتار کرکے ان کے قبضہ سے اسلحہ اور گولہ بارود برآمد کیا ہے۔ ابتدائی معلومات کے مطابق حفاظتی اہلکاروں کو ضلع کولگام کے میرہامہ اور دمحال ہانجی پورہ علاقوں میں تخریبی اور ملک دشمن سرگرمیوں کو انجام دئے جانے کے حوالہ سے ایک مخصوص اطلاع موصول ہوئی۔ اطلاع موصول ہونے کے فوراً بعد جموں و کشمیر پولیس اور فوج کی 9راشٹریہ رائفلز (9RR) نے کارروائی انجام دیتے ہوئے چھ افراد کو حراست میں لے لیا۔
حفاظتی اہلکاروں نے بتایا کہ حراست میں لیے گئے ایک ملزم کی نشاندہی پر بھاری مقدار میں اسلحہ اور گولہ بارود بھی برآمد ہوا ہے۔ برآمد کیے گئے اسلحہ میں ایک پستول، ایک پستول میگزین، پستول راؤنڈ 18 نمبر، ایک دستی بم، UBGL شیل 04 نمبر، اے کے 47 کے 30 راؤنڈز، M4 راؤنڈز 446 راؤنڈز، آٹھ M4 میگزین، ایک عدد اے کے 47 میگزین، ایک Insas میگزین، دو مارٹر شیل، ایک وائرلیس سیٹ اور چار واکی ٹاکی سمیت مجرمانہ مواد بھی شامل ہے۔
سیکورٹی اہلکاروں نے بتایا کہ ابتدائی تفتیش کے دوران یہ بات سامنے آئی ہے کہ گرفتار کیے گئے افراد ممنوعہ دہشت گرد تنظیم جیش محمد کے ساتھ وابستہ تھے اور مختلف سوشل میڈیا پلیٹ فارمز کے ذریعے دہشت گرد ہینڈلرز کے رابطے میں تھے۔ گرفتار ملزمان گرینیڈ حملے، بے گناہ شہریوں کو ڈرانے کے علاوہ پی آر آئی ممبران اور اقلیتی فرقوں سے وابستہ افراد پر فائرنگ اور حملوں کے ذریعے ضلع کولگام میں پر امن ماحول کو خراب کرنے کے درپے تھے۔
مزید پڑھیں: Militant Associates Arrested کپواڑہ میں عسکریت پسندوں کے پانچ معاون اسلحہ و گولہ بارود کے ساتھ گرفتار، پولیس
اس ضمن میں ایک ایف آئی آر نمبر 01/2023 قانون کی متعلقہ دفعات کے تحت پولیس اسٹیشن دمحال ہانجی پورہ، کولگام پورہ درج کی گئی۔
