گاندربل: سری نگر لیہہ شاہراہ پر سفر کرنے والے مسافروں کے لیےدو لین والا اسٹیل آرچ ٹرس پل بنایا گیا۔ضلع گاندربل کے وائل علاقے میں اپنی نوعیت کا یہ پہلا پل ہے۔ اس پل کا لیفٹیننٹ گورنر منوج سنہا نےافتتاح کیا اور عوام کیلئے کھول دیا۔ اس موقع پر چیف سکریٹری ڈاکٹر ارون کمار مہتا، ڈی ڈی سی چیئرپرسن گاندربل نزہت اشفاق، پرنسپل سکریٹری آر اینڈ بی شیلندر کمار کے علاوہ سول اور پولیس انتظامیہ کے اعلیٰ افسران موجود تھے۔
حکام نے بتایا کہ دو لین پل کو 23.79 روپے کی لاگت سے تیار کیا گیا۔ یہ پل ایک آرچ قسم کا سٹیل پل ہے، جس کا فاؤنڈیشن 110 میٹر اور چوڑائی 10.50 میٹر ہے جبکہ اپروچ سڑکوں کی لمبائی 330 میٹر ہے۔ گاندربل کے لوگوں کے لیے یہ پل نہایت ہی اہمیت کا حامل ہے،کیونکہ پرانے پل سے گاڑیوں کو ایک ایک کرکے گزرنا پڑتا تھا، جس کی وجہ سے ہمیشہ ٹریفک جام رہتا تھا اور لوگوں کو مشکلات پیش آتی تھی۔ یہ پل کشمیر اور لداخ کو جوڑنے میں اہم کردار ادا کرتا ہے، اس کے علاوہ سیاح سونمرگ جانے کیلئے اور سالانہ امرناتھ یاترا کے لیے اسی راستے کا استعمال کرتے ہیں۔
واضح رہے اس جگہ یعنی نالہ سندھ پر جو پرانا پل تھا۔ وہ سال 1992 میں سیلاب کی زد میں آنے سے بہہ گیا تھا اور اس جگہ پر بیکن کے عملے نے عارضی طور پر یکطرفہ لوہے کا پل بنایا تھا۔جس کی وجہ سے کنگن تحصیل کے لوگ سال 1992 سے مسلسل مشکلات کا سامنا کرنے پر مجبور ہو رہے تھے۔
