سب کے لیے گھر کا تصور، غریب خاندان پردھان منتری آواس یوجنا اسکیم سے محروم؟

جنوبی ضلع اننت ناگ کے حلقہ انتخاب بجبہاڑہ میں قائم بیورہ علاقے میں خط افلاس سے نیچے زندگی بسر کرنے والے سینکڑوں کنبے آج بھی پردھان منتری آواس یوجنا اسکیم سے محروم ہیں۔ اس اسکیم کے تحت خط افلاس سے نیچے زندگی گزر بسر کرنے والے افراد کو مکان بنانے کے لیے مالی مدد دی جاتی ہے۔ تاہم بیورہ میں سینکڑوں کنبے آج بھی اس اسکیم سے بالکل ہی محروم ہیں۔ علاقے کے لوگ دور جدید میں بھی قسم پرسی کی زندگی گزار رہے ہیں اور اُن مفلوک الحال کنبوں تک کسی بھی قسم کی سہولیات آج بھی میسر نہیں۔ لوگوں کا ماننا ہے کہ پردھان منتری آواس یوجنا کے تحت مستحق افراد کی کفالت کرنے میں محکمہ دیہی و ترقی غفلت شعاری برت رہے ہیں۔

مقامی لوگوں نے شکایت کی ہے کہ سنہ 2017 میں انہوں نے محکمہ دیہی ترقی کو اس بارے میں آگاہ کیا، جبکہ انہیں مالی معاونت فراہم کرنے کے حوالے سے متعلقہ محکمہ کی جانب سے بلند بانگ دعوے تو کیے گئے لیکن وہ تمام دعوے سراب ہی ثابت ہوئے۔

ای ٹی وی بھارت کے نمائندہ سے بات کرتے ہوئے لوگوں نے اپنے داد فریاد بیان کرتے ہوئے کہا کہ علاقہ کافی پسماندہ ہے، جبکہ یہاں کی بیشتر آبادی خط افلاس سے نیچے زندگی گزار رہی ہے۔ انہیں آج تک مذکورہ اسکیم سے محروم رکھا گیا ہے۔ انہوں نے کہاکہ علاقہ میں 40 فیصد لوگ مفلوک الحال کمبوں سے تعلق رکھتے ہیں۔ انہوں نے کہاکہ متعلقہ محکمہ کے جانب سے آج تک کئی بار سروے بھی عمل میں لایا گیا ہے، تاہم سروے کرنے کے باوجود بھی انہیں آج تک کوئی بھی امداد فراہم نہیں کی گئی۔

ای ٹی وی بھارت کے نمائندہ نے فون پر جب یہ معاملہ محکمہ دیہی و ترقی کے بلاک ڈولپمنٹ آفیسر بلال احمد کی نوٹس میں لایا تو انہوں نے کہا کہ جنہیں ابھی تک اس اسکیم سے فائدہ نہیں ملا ہے، انکی ویرفیکیشن 31 اکتوبر تک مکمل کی جائے گی، اور فنڈس واگزار ہوتے ہی ان کی ہر ممکن مدد کی جائے گی، انہوں نے نمائدہ کو یقین دِلایا ہے کہ مرکز کی جانب سے جتنی بھی اسکیمیں ایسے مفلوک الحال لوگوں کےلئے مختص کی گئی ہیں ان سب اسکیموں کا فائدہ مذکورہ علاقہ میں رہایش پزیر لوگوں کو پہنچایا جائے گا۔