اتراکھنڈ: الموڑہ میں مسافروں سے بھری بس کھائی میں گر گئی، سات مسافر ہلاک

الموڑہ/رام نگر: اتراکھنڈ کے الموڑہ ضلع کے سلٹ بھیکیاسین علاقے میں منگل کی صبح ایک المناک سڑک حادثہ پیش آیا۔ بھیکیاسین ونائک روڈ پر دوارہٹ سے رام نگر جانے والی ایک مسافر بس بے قابو ہو کر گہری کھائی میں گر گئی۔

معلومات کے مطابق حادثے میں سات مسافروں کے ہلاک ہونے کی اطلاع ہے جب کہ متعدد افراد کے شدید زخمی ہونے کا خدشہ ہے۔ واقعہ کی اطلاع ملتے ہی پولیس، انتظامیہ، ایس ڈی آر ایف اور ڈیزاسٹر مینجمنٹ ٹیمیں جائے وقوعہ پر پہنچ گئیں۔ دشوار گزار پہاڑی علاقے کی وجہ سے ریسکیو اور ریلیف آپریشن میں مشکلات کا سامنا ہے۔

بس نمبر UK 07 PA 4025 حادثہ کا شکار ہوئی ہے جس کا تعلق رام نگر کے کماون موٹر اونرز یونین (KMOU) لمیٹڈ سے ہے۔ بس پیر کو صبح 11 بجے رام نگر سے دوارہت نوبارہ کے لیے روانہ ہوئی تھی۔ منگل کی صبح، بس صبح 6:30 بجے دوارہت نوبارہ سے رام نگر کے لیے روانہ ہوئی۔ تاہم ڈیڑھ گھنٹے بعد صبح آتھ بجے کے قریب سیلپانی بند کے قریب بس حادثے کا شکار ہو گئی۔ ڈرائیور اور کنڈکٹر کو حادثے میں کوئی نقصان نہیں پہنچا۔

الموڑہ ضلع انتظامیہ سے موصولہ اطلاع کے مطابق مرنے والوں میں چار مرد اور تین خواتین شامل ہیں۔ تقریباً 12 افراد کے زخمی ہونے کی اطلاع ہے۔ بس میں کل 19 مسافر سوار تھے جن میں سے کئی کی حالت تشویشناک ہے۔

وزیراعلیٰ دھامی نے حادثے پر افسوس کا اظہار کیا ہے۔ ایکس (سابقہ ٹویٹر) پر ایک پوسٹ میں انھوں نے لکھا، "انتہائی افسوسناک خبر موصول ہوئی ہے کہ الموڑہ میں بھیکیاسین-ونائک موٹر روڈ پر بھیکیاسین سے رام نگر جانے والی بس حادثہ کا شکار ہوئی ہے، جس کے نتیجے میں جانی نقصان ہوا ہے۔ ضلع انتظامیہ فوری طور پر زخمی مسافروں کو قریبی اسپتالوں میں منتقل کر رہی ہے۔ شدید زخمیوں کو علاج معالجے کے لیے بڑے سینٹرز میں منتقل کیا جا رہا ہے۔ میں مقامی انتظامی حکام کے ساتھ مسلسل رابطے میں ہوں، میں تمام زخمیوں کی جلد صحت یابی کے لیے دعا گو ہوں۔"

پی ایم مودی نے دکھ کا اظہار کیا:

وزیر اعظم نریندر مودی نے بس حادثے میں جانوں کے ضیاع پر دکھ کا اظہار کیا اور زخمیوں کی جلد صحت یابی کے لیے دعا کی۔

پی ایم مودی نے کہا، "اتراکھنڈ کے الموڑہ ضلع میں ایک بس حادثے کی وجہ سے جانوں کا ضیاع انتہائی افسوسناک ہے۔ جن لوگوں نے اپنے پیاروں کو کھو دیا ہے ان کے تئیں تعزیت۔ زخمیوں کی جلد از جلد صحت یابی ہو۔"

سلٹ تحصیل علاقے میں 14 ماہ میں دوسرا حادثہ: الموڑہ ضلع کے سلٹ علاقے میں 14 ماہ کے اندر یہ دوسرا بس حادثہ ہے۔ 4 نومبر 2024 کو سلٹ تحصیل کے مارچولا میں کپی گاؤں کے قریب ایک بس حادثہ پیش آیا تھا۔ اس خوفناک بس حادثے میں چھتیس افراد ہلاک ہوگئے تھے۔ حادثے میں ملوث بس گڑھوال موٹر اونرز یونین لمیٹڈ کی تھی۔ حادثے کے وقت بس میں 50 مسافر سوار تھے۔

یہ بھی پڑھیں:

• رامپور میں بھوسے سے بھرا ٹرک بولیرو پر الٹ گیا، ڈرائیورموقع پر ہلاک، دل دہلا دینے والا ویڈیو آیا سامنے