چنار پریمیئر لیگ 2026 بارہمولہ میں ناک آؤٹ مرحلے میں داخل

بارہمولہ: (کوثر عرفات) تاریخی چنار پریمیئر لیگ (سی پی ایل) 2026ء اتوار کے روز جنرل بپن راوت اسٹیڈیم، بارہمولہ میں ایک شاندار تقریب کے ساتھ اپنے سنسنی خیز ناک آؤٹ مرحلے میں داخل ہو گئی۔ اس افتتاحی تقریب میں اسکولی طلباء اور کھیل سے محبت کرنے والوں سمیت تقریباً 6,000 شائقین کا ایک بڑا اجتماع دیکھا گیا۔

چیف سکریٹری جموں و کشمیر اتل ڈلو نے بطور مہمانِ خصوصی تقریب کی صدارت کی، جبکہ کمشنر سیکریٹری یوتھ سروسز اینڈ اسپورٹس ڈیپارٹمنٹ ڈاکٹر شاہد اقبال چوہدری نے مہمانِ ذی وقار کے طور پر شرکت کی۔ تقریب کا آغاز حب الوطنی کے گیتوں اور قومی ترانے سے ہوا، جس کے بعد مقامی اسکولی بچوں کے بینڈز نے شاندار ثقافتی پروگرام پیش کر کے تقریب کو چار چاند لگا دیے۔

ٹورنامنٹ کے اس فیصلہ کن مرحلے کا پہلا ناک آؤٹ میچ شیری بلاسٹرز اور ڈاؤن ٹاؤن بیجبہاڑہ کی ٹیموں کے درمیان کھیلا گیا۔ سی پی ایل 2026ء کھیلوں کے ایک بڑے پلیٹ فارم کے طور پر ابھرا ہے، جس نے جموں، کشمیر اور لداخ کے نوجوان کھلاڑیوں کو ایک جگہ اکٹھا کر کے انہیں اپنی صلاحیتوں کے جوہر دکھانے کا بہترین موقع فراہم کیا ہے۔

واضح رہے کہ اس ٹورنامنٹ کے لیگ مرحلے کے دوران عوامی دلچسپی عروج پر رہی، جس میں 1.6 ملین (16 لاکھ) ناظرین نے میچ دیکھے۔ ٹورنامنٹ میں کل 130 ٹیموں نے رجسٹریشن کے لیے درخواست دی تھی، جن میں سے 79 ٹیموں کے تقریباً 1,600 کھلاڑیوں کو منتخب کیا گیا۔ ان ٹیموں کو 26 پولز میں تقسیم کر کے 8 مختلف مقامات پر 81 میچ کھلائے گئے، جن میں سے بہترین کارکردگی کا مظاہرہ کرتے ہوئے 32 ٹیموں نے ناک آؤٹ مرحلے کے لیے کوالیفائی کیا ہے۔

بارہمولہ کرکٹ فورم (بی سی ایف) کے اشتراک سے بھارتی فوج کے زیرِ اہتمام منعقد ہونے والی چنار پریمیئر لیگ (سی پی ایل) محض ایک کرکٹ ٹورنامنٹ نہیں، بلکہ نوجوانوں کی تعمیری مصروفیت، عوامی شمولیت اور سماجی ہم آہنگی کو فروغ دینے کا ایک منفرد ذریعہ ہے۔ اس اہم اقدام کا مقصد ایک ایسا متحرک پلیٹ فارم مہیا کرنا ہے جہاں نوجوان کھیل کے ذریعے اپنی صلاحیتوں کا اظہار کر سکیں اور ایک بااختیار معاشرے کی تعمیر میں اپنا مثبت کردار ادا کریں۔

چنار پریمیئر لیگ 2026 بارہمولہ میں ناک آؤٹ مرحلے میں داخل (ETV Bharat)

مزید پڑھیں: کشمیر کے بڑے کرکٹ ٹورنامنٹ سی پی ایل ٹرافی کی نقاب کشائی کی تقریب

اس باوقار تقریب میں جی او سی ڈیگر ڈویژن میجر جنرل منوج جوشی، ڈپٹی کمشنر بارہمولہ ڈاکٹر ایس ایف حامد، کمانڈر 79 ماؤنٹین بریگیڈ بریگیڈیئر ایم بی سنگھ، سینئر سپرنٹنڈنٹ آف پولیس (ایس ایس پی) بارہمولہ گوریندر پال سنگھ اور کمانڈنگ آفیسر 46 راشٹریہ رائفلز سمیت سول انتظامیہ، پولیس اور فوج کے اعلیٰ حکام نے شرکت کی۔ ان کے علاوہ محکمہ یوتھ سروسز اینڈ اسپورٹس کے افسران، نامور کھیل شخصیات، زبردست تعداد میں طلباء اور مقامی لوگ بھی اس موقع پر موجود تھے۔ ناک آؤٹ مرحلے کا یہ شاندار آغاز سی پی ایل 2026ء کے لیے ایک اور اہم سنگ میل ثابت ہوا، جو وادی میں کرکٹ کے بڑھتے ہوئے جنون اور معاشرے کو جوڑنے میں کھیل کی طاقت کا منہ بولتا ثبوت ہے۔

اس موقع پر موجود سابق بھارتی کرکٹر پرویز رسول نے میڈیا سے بات کرتے ہوئے کہا کہ بارہمولہ میں کرکٹ کا معیار دن بہ دن بلند ہو رہا ہے اور یہاں کے نوجوان مسلسل اپنا لوہا منوا رہے ہیں۔ انہوں نے مقامی کرکٹر عاقب نبی کی مثال دیتے ہوئے کہا کہ انہوں نے قومی سطح پر بہترین کارکردگی کا مظاہرہ کر کے جموں و کشمیر کا نام روشن کیا ہے۔

پرویز رسول نے مزید کہا کہ اب کشمیر میں کرکٹ کا بنیادی ڈھانچہ بھی کافی بہتر ہو رہا ہے اور یہاں ٹیلنٹ یا بہتر کوچنگ کی اب کوئی کمی نہیں ہے۔ انہوں نے نوجوانوں کو کھیل کود کی بہترین سرگرمیوں میں شمولیت کے مواقع فراہم کرنے پر سول انتظامیہ، حکومت اور فوج کا شکریہ ادا کیا۔

یہ بھی پڑھیں:

ٹیسٹ میچ میں گیند کے کر دیے گئے دو ٹکڑے، وجہ جان کر آپ ہو جائیں گے حیران

بھارت ایشین اسکیٹنگ ٹرافی کے تمغوں کی تعداد میں سرفہرست، دوسرے دن متعدد تمغے جیتے، چین اور تھائی لینڈ کو دی شکست