امریکہ میں بھارتی طالب علم ساکیت سری نواسیا کی لاش برآمد، چھ روز سے تھا لاپتہ

نئی دہلی: امریکہ کے کیلیفورنیا میں زیر تعلیم 22 سالہ بھارتی طالب علم ساکیت سری نواسیا تقریباً چھ دنوں سے لاپتہ تھے، آج ان کی لاش مل ہے۔ اطلاعات کے مطابق کرناٹک کے رہنے والے ساکیت سری نواسیا یونیورسٹی آف کیلیفورنیا، برکلے میں کیمیکل اور بائیو مالیکولر انجینئرنگ میں ماسٹر ڈگری کر رہے تھے۔

انہیں آخری بار 9 فروری کو کیمپس سے تقریباً ایک کلومیٹر کے فاصلے پر دیکھا گیا تھا، جس کے بعد جھیل انزا اور برکلے ہلز کے علاقوں میں انہیں تلاش کیا گیا۔ سان فرانسسکو میں بھارتی قونصل خانے نے تصدیق کی کہ مقامی حکام نے ان کی لاش برآمد کر لی ہے اور یقین دہانی کرائی ہے کہ ان کی باقیات کو جلد از جلد ہندوستان واپس بھیجنے کے لیے تمام ضروری مدد فراہم کی جائے گی۔

قونصلیٹ نے سوشل میڈیا پر لکھا کہ یہ بتاتے ہوئے انتہائی دکھ ہو رہا ہے کہ مقامی پولیس نے لاپتہ بھارتی طالب علم ساکیت سری نواسیا کی لاش ملنے کی تصدیق کر دی ہے۔ ہم اس مشکل وقت میں ان کے اہل خانہ اور چاہنے والوں سے دلی تعزیت کا اظہار کرتے ہیں۔ قونصل خانہ خاندان کو تمام ضروری مدد فراہم کرنے کے لیے تیار ہے، جس میں مقامی حکام کے ساتھ رابطہ کاری اور جلد از جلد میت کی بھارت واپسی کا بندوبست کرنا شامل ہے۔

قونصل خانے نے مزید کہا کہ اس کے اہلکار خاندان کے ساتھ براہ راست رابطے میں ہیں اور تمام ضروری رسمی کارروائی میں ان کی مدد کریں گے۔ سرچ کے دوران یونیورسٹی کیمپس سے کافی دور ٹلڈن ریجنل پارک کے قریب ایک گھر کے پاس سے سرینواسیا کے پاسپورٹ اور لیپ ٹاپ پر مشتمل ایک بیگ ملا۔

آئی آئی ٹی مدراس میں بھی پڑھائی کی تھی

آئی آئی ٹی مدراس کے سابق طالب علم سری نواسیا نے بنگلورو میں سری وانی ایجوکیشن سنٹر میں پڑھائی کی تھی۔ اس کے لنکڈ ان پروفائل کے مطابق، وہ ان چھ موجدوں میں سے ایک تھا جنہوں نے "ہائپر لوپ کے لیے مائیکرو چینل کولنگ سسٹم اور اس کے طریقہ کار" کے لیے پیٹنٹ کیا تھا۔ دوست اور ساتھی اسے ایک تیز دماغ، عاجزی، قابلیت اور وفاداری سے بھر پور شخص کے طور پر یاد کرتے ہیں۔

مزید پڑھیں: پنوں قتل سازش معاملہ: بھارتی شہری کا امریکہ میں اعتراف جرم، 24 سال قید کی سزا