مشرقِ وسطیٰ کشیدگی کے باعث دہلی ایئرپورٹ پر سیکڑوں مسافر پھنس گئے، درجنوں پروازیں منسوخ

نئی دہلی : مشرقِ وسطیٰ میں بڑھتی کشیدگی کے باعث فضائی حدود کی بندش نے عالمی فضائی آپریشن متاثر کر دیے ہیں، جس کے نتیجے میں اندرا گاندھی انٹرنیشنل ایئرپورٹ پر سیکڑوں مسافر پھنس گئے۔ امریکہ اور اسرائیل کی جانب سے ایران پر حملوں اور ایران کی جوابی کارروائی کے بعد خطے میں فضائی حدود پر سخت پابندیاں عائد کر دی گئی ہیں۔ اس کے باعث کئی بین الاقوامی ایئرلائنز کو پروازیں منسوخ یا متبادل راستوں پر منتقل کرنا پڑا۔

حکام کے مطابق 28 فروری کو ملکی ایئرلائنز کی 410 پروازیں منسوخ کی گئیں جبکہ یکم مارچ کو مزید 444 پروازوں کی منسوخی متوقع ہے۔ مغربی سمت جانے والی پروازیں، خاص طور پر یورپ اور ریاستہائے متحدہ امریکہ کے لیے روانہ ہونے والی فلائٹس، شدید متاثر ہوئی ہیں۔ دبئی جانے اور آنے والی پروازوں میں بھی نمایاں خلل دیکھا گیا۔ ایک مسافر، جو دہلی سے سعودی عرب روانہ ہونے والا تھا، نے بتایا کہ اس کی پرواز اچانک منسوخ ہو گئی اور وہ 14 گھنٹے سے معلومات کا انتظار کر رہا ہے۔

وزارت شہری ہوابازی نے بیان جاری کرتے ہوئے کہا کہ مشرقِ وسطیٰ کی صورتحال عالمی فضائی راستوں کو متاثر کر رہی ہے۔ ڈائرکٹر جنرل آف سیول ایویشن، ایئرلائنز کے ساتھ مسلسل رابطے میں ہے تاکہ مسافروں کی حفاظت اور ضابطہ جاتی تقاضوں کی پاسداری یقینی بنائی جا سکے۔ ادھر ممبئی ایئرپورٹ میں بھی شدید رش اور پروازوں کی منسوخی کی اطلاعات ہیں۔

یہ بھی پڑھیں: آیت اللہ علی خامنہ ای کی ہلاکت پر بھارت کے مختلف شہروں میں احتجاج، لکھنؤ میں تین روزہ سوگ اور کشمیر میں ہڑتال کا اعلان

دہلی ایئرپورٹ انتظامیہ نے مسافروں کو مشورہ دیا ہے کہ ایئرپورٹ روانگی سے قبل اپنی پرواز کی تازہ ترین صورتحال متعلقہ ایئرلائن سے ضرور معلوم کریں۔ حکام کا کہنا ہے کہ جغرافیائی و سیاسی حالات کے پیش نظر آئندہ چند روز تک فضائی آپریشن معمول پر آنے میں وقت لگ سکتا ہے۔