گلمرگ (کوثر عرفات) : جموں و کشمیر کے وزیر اعلیٰ عمر عبداللہ نے بدھ کے روز کہا کہ گلمرگ میں منعقدہ کھیلو انڈیا سرمائی کھیل نہ صرف اس سیاحتی مقام کو فروغ دیتے ہیں بلکہ اسکیئنگ ڈھلوانوں اور دیگر متعلقہ سہولیات کی ترقی میں بھی حکومت کی مدد کرتے ہیں تاکہ اسے عالمی معیار کا اسکیئنگ مرکز بنایا جا سکے۔

میڈیا سے گفتگو کرتے ہوئے وزیر اعلیٰ نے گلمرگ میں کھیلو انڈیا سرمائی کھیلوں کے پانچویں ایڈیشن کے انعقاد پر خوشی کا اظہار کیا اور اسے علاقے کی ترقی کے لیے اہم قرار دیا۔

انہوں نے کہا: ’’حالیہ برف باری کے بعد علاقے کا سروے کیا گیا اور اسی کے مطابق ایونٹ کا انعقاد کیا گیا۔ میں چاہتا ہوں کہ یہاں عالمی معیار کی اسکیئنگ ڈھلوانیں تعمیر کی جائیں تاکہ یہ مقامی روزگار کے مواقع میں اضافے کا سبب بھی بنے۔‘‘

یاد رہے کہ کھیلو انڈیا ونٹر گیمز 2025 کے دوسرے مرحلے کا آغاز 9 مارچ کو گلمرگ میں ہوا، جہاں ایونٹ کے کامیاب اور محفوظ انعقاد کو یقینی بنانے کے لیے سخت سیکیورٹی انتظامات کیے گئے ہیں۔