کولکاتا: کلکتہ خلافت کمیٹی نے اطلاع دی ہے کہ ریڈ روڈ پر عیدالاضحی کی نماز طے شدہ شیڈول کے مطابق دن صبح ساڑھے آٹھ بجے ادا کی جائے گی۔ قابل ذکر ہے کہ کولکاتا کی تاریخی ریڈ روڈ پر سو سال سے زائد عرصے سے عید الفطر اور عید الاضحی کی نماز ادا کی جاتی رہی ہے۔ کلکتہ خلافت کمیٹی اس کا مجموعی طور پر انتظام کرتی ہے۔
واضح رہے کہ اس سال عید الاضحی کی نماز کی اجازت کے حوالے سے اچانک پیچیدگی پیدا ہوگئی۔ فورٹ ولیم نے ایک خط بھیجا جس میں کہا گیا کہ فوجی ضرورت کی وجہ سے اس علاقے میں سات اور آٹھ جون کو نماز عید ادا کرنے کی اجازت نہیں دی جا سکتی۔
اس کے بعد وزیر اعلیٰ ممتا بنرجی نے معاملے میں مداخلت کی۔ انہوں نے خود پہل کر کے مسئلے کو حل کرنے کی کوشش کی۔ تازہ اطلاع کے مطابق وزیر اعلیٰ کی پہل سے مسئلہ حل ہو گیا ہے۔
ریاستی وزیر اور خلافت کمیٹی کے صدر جاوید احمد خان نے کہا، "ایک تکنیکی مسئلہ تھا، ہم نے فوجی حکام اور ریاستی انتظامیہ سے بات کی، ریاست کی عزت مآب وزیر اعلیٰ ممتا بنرجی نے خود مداخلت کی۔"
تمام مسائل حل ہو چکے ہیں۔ عید الضحیٰ کی نماز کا اجتماع ریڈ روڈ پر ہوگا۔ انہوں نے مزید کہا کہ نماز عید پہلے سے طے شدہ شیڈول کے مطابق صبح 8:30 بجے ادا کی جائے گی۔
مزید پڑھیں: عید الاضحی اور قربانی کی شرعی اہمیت اور فضائل و مسائل
