حیدرآباد: تلنگانہ میں نشہ آور انجکشن لینے سے فرسٹ ایئر انٹرمیڈیٹ کے طالب علم کی موت نے ہلچل مچا دی ہے۔ حیدرآباد سے متصل رنگاریڈی ضلع کے بالاپور تھانہ علاقہ کے تحت شاہین نگر کے تین انٹرمیڈیٹ طلبہ اکثر انجیکشن کی شکل میں نشہ آور درد کش گولیاں سالائن میں ملا کر لیتے تھے۔ تین دن قبل انجکشن لینے والے تینوں طالب علم شدید بیمار ہو گئے۔ 17 سالہ نابالغ کی علاج کے دوران موت ہو گئی۔ متوفی انٹرمیڈیٹ فرسٹ ایئر کا طالب علم تھا۔
طالب علم کے والد نے بالاپور پولیس اسٹیشن میں شکایت درج کرائی۔ پولیس نے تفتیش کی تو پتہ چلا کہ 22 سالہ شہباز اور ایک اور نابالغ نے بھی انجکشن لگایا تھا۔ ڈاکٹروں نے بتایا کہ ان کی حالت مستحکم ہے۔
تفتیش کے دوران پولیس نے ساحل نامی شخص کی نشاندہی کی ہے جو یہ نشہ آور گولیاں سپلائی کرتا تھا۔ تفتیش میں انکشاف ہوا ہے کہ ساحل تینوں طالب علموں کو ایک ویران جگہ پر لے جا کر انجکشن لگاتا تھا۔ پولیس نے بتایا کہ 17 اپریل کو بھی تینوں طالب علموں نے نشہ آور انجکشن لگائے اور وہ شدید بیمار ہو گئے۔
پولیس نے ملزم ساحل کو گرفتار کر لیا ہے اور اس سے پوچھ گچھ کر رہی ہے۔ بالاپور پولیس کا کہنا ہے کہ مکمل تفصیلات تحقیقات کے بعد سامنے آئیں گی۔
